ESITELE 3
3
Lao ke tamatei te kau Sutea katoa
1I te hili o te u mea aia, nee fakatotonu leva e te hau ko Asuelusi ke hiki ki oluga ia Amane, foha o Ametata, te tagata Akake; nee ina hiki tona higoa pea mo tona tuulaga i oluga o te kau aliki katoa ae nee nonofo i ona tafa. 2Nee peluki te u tuli mo tulolo te u ulu o te u tagata faifekau fuli a te hau, ae nee tutuu i te matapa o te hau, ia mua o Amane, koteuhi ko te fakatotonu aia a te hau o uhiga mo ia. Kae nee mole pe la peluki e Maletokeo tona tuli pea nee mole tulolo pe ia ia. 3Pea nee ui leva e te u tagata faifekau a te hau, ae nee nonofo i te matapa o te hau kia Maletokeo: Kotea e ke maumaui ai te fakatotonu a te hau? 4I te aho fuli nee natou palalau kia ia ki te mea aia, kae nee mole pe la fakalogo ia ia kia natou, pea nee natou fakaha leva ia kia Amane, o tupu ke sio pe e tuu mau aipe ia ia i tana fakapapau; koteuhi nee ina fakaha kia natou ko he Sutea ia ia. 5Pea nee sio leva ia Amane e mole pe peluki e Maletokeo tona tuli pea nee mole pe tulolo ia ia i ona mua. Nee fonu leva ia ia i te ita; 6kae nee ina fakanoai ke fa tona nima kia Maletokeo toko tahi, koteuhi nee fakaha kia ia te hahai o Maletokeo, kae nee loto ia ia ke maumaui te hahai fuli o Maletokeo, te kau Sutea fuli ae nee nonofo i te u puleaga o Asuelusi.
7I te uluaki mahina, ae ko te mahina o Nisane, i te tau hogofulu ma lua o te hau o Asuelusi, nee fakatotonu leva e Amane ke li te u Pulimi*, ke iloi te aho pea mo te mahina ae e lelei ki ana fakatuutuu; pea nee to leva te mate i te toho ki te hogofulu ma lua mahina, ae ko te mahina o Atale.
8Pea nee ui leva e Amane ki te hau ko Asuelusi: E i ai i te u fenua fuli o tou puleaga he hahai ae kua mavetevete pea kua mavae i te u hahai ake ae, pea e kehekehe anatou lao mo te u lao a te hahai fuli, pea e mole pe natou fakalogo ki te u lao a te hau. Koia e mole aoga ai ki te hau ke ina tuku natou ke natou malolo! 9Kapau e lelei ki te hau, pea ke tohi te fakatotonu ke tamatei natou; pea e au fua anai ni fuai tenalio paaga e hogofulu afe ke foaki kia nima o te kau pule fenua, o tupu ke tuku natou ki te koloa a te hau.
10Nee too leva e te hau tona mama i tona nima o foaki kia Amane, foha o Ametata, te tagata Akake, te fili o te kau Sutea. 11Pea nee ui leva e te hau kia Amane: Kua foaki atu kia koe te paaga pea mo te hahai aena; fai te mea ae e ke loto ki ai.
12Nee paui leva e te kau sikalaipe a te hau i te aho hogofulu ma tolu o te uluaki mahina, pea nee tohi leva o mulimuli ki te mea katoa ae nee fakatotonu e Amane ki te kau aliki katoa a te hau, mo te kau kovana o te fenua taki tahi, pea mo te kau pule o te hahai taki tahi, ki te fenua taki tahi o mulimuli ki tana faitohi, ki te hahai taki tahi o mulimuli ki tana lea. Nee tohi leva i te higoa o te hau ko Asuelusi, o fakamooni aki te mama o te hau. 13Pea nee ave leva te u tohi e ni kau avetohi ki te u fenua fuli o te hau, o tupu ke maumaui, mo tamatei pea mo pulihi te hahai Sutea katoa, te u tupulaga mo te u matua, te u toe mo te u fafine, i he aho e tahi, i te aho hogofulu ma tolu o te mahina hogofulu ma lua, ae ko te mahina o Atale, pea ke tuku ke too onatou koloa. 14Nee tuku i te u loto tohi aia, he hiki o te tohi ae nee fakatotonu e te hau ke fakaha i te fenua taki tahi, pea nee ina haga o fakaafe te hahai fuli ke nonofo teuteu ki te aho aia. 15Nee olo fakavilivili leva te kau avetohi, o mulimuli ki te fakatotonu a te hau. Nee fakaha foki te fono aia i Suse, te kolo mua; pea nee lolotoga inu te hau mo Amane, kae nee maveuveu te kolo ko Suse.
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland