Kulu 5
5
Siti ’ngʉ́ gba Ananɨa ne Safila
1Abhomʉ-o, kpála bini ɨnde adʉ ’lɨ e me Ananɨa, adje lɨe ne wala e Safila. U atsɨndjɨ edyɨ gba o-o. 2Anɨ aha té tɨa ango-o, ao pɨ e. Anɨ atsia anʉ ao dudu-o kala obhʉlʉ titima gba Yesu-o . Wala anɨ adʉ ambɨla ’ngʉ́ tété ndjɨndjɨ. 3Abhomʉ-o, Piele apa pɨ anɨ me: «Ananɨa, mo ozɨba me Satana pite nɨ ngʉ́ nɨ? Mo opa eu pɨ Bu Bhobua , anga mo oha té tɨa na edyɨ-e, mo oo pɨ mʉ. 4Kala me mʉ tsɨndjɨ edyɨ ango-o, a ko nako naamʉ dɨ? La di-e, mo otsɨndjɨ lɨe, tɨa ango-o, a ko nako naamʉ dɨ? Mo ozɨba me nɨ mene ngua ’ngʉ́ ɨnde-e ka nɨ? Mʉ pite okpála de, engʉ́ bini, mo opite bhomʉ-o Ebhe.» 5Bha lɨ nedhɨnga ɨnde lɨ Ananɨa adje engʉ́ bhomʉ-o lɨe, anɨ atɨ, anɨ atsia akpi. Ndʉ okpála hana ɨnde adje engʉ́ ango-o, adʉ ne tsʉlʉ naali. 6Abhomʉ-o, omakombise ago. U agala kuo anɨ ne bongo , u ae, u atsia anʉ azɨ.
7Masɨkpe de pɨta saa bata-a, wala Ananɨa ago alɨ oo me anɨ nde mbɨla engʉ́ ɨnde akodho ’kpɨ́-e de. 8Piele ayi anɨ me: «Pa nga mʉma, yi atsɨndjɨ bha ndjʉ edyɨ gba yi-e bhʉ́ mase ɨnde-e?» Ɵlɵ-o agie me: «A moko, ya atsɨndjɨ bhʉ́ mase bhomʉ-o.» 9Abhomʉ-o, Piele atsia apa pɨ anɨ me: «Yi adje lɨyi ne ’ko mʉ ngʉ́ nale Bua gba Ngámá-a ngʉ́ nɨ? Djedje nga! Okpála ɨnde ɨ kolo nazɨ ’ko mʉ-o, u alʉlʉ lɨ bhotɨ bhomʉ. U abɨ́ bhadi mʉ moko!» 10Bha lɨ nedhɨnga bhomʉ-o, ɵlɵ-o atɨ kuto bhʉ́ li ’dhʉ Piele, anɨ atsia akpi. Omakombise alɨ, u abhaka me anɨ nde akpi. Abhomʉ-o, u ae kuo anɨ, u atsia anʉ azɨ anɨ dengo ’ko e. 11Ndʉ okpála na Piga gba Ebhe-e hana, di ne ndʉ okpála hana ɨnde adje engʉ́ ɨnde akodho ’kpɨ́-e, adje tsʉlʉ naali.
Obhʉlʉ titima gba Yesu-o amene ongamba ’ngʉ́ bhelé
12Obhʉlʉ titima gba Yesu-o adʉ amene nanɨ ongamba ’ngʉ́ di ne okɨaka ’ngʉ́ bhelé bhʉ́ ká okpála. Ndʉ omabhuka hana adʉ apo bhʉ́la o sa basa ɨnde u aɨ e me «Sa ngba ’tɨ gba Salomo.» 13Kpála bini bhʉ́ ká okpála bhende ɨ bhuka de-e le nanɨ nalɨ bhʉ́ ká uo de, abana lɨ ndʉ okpála hana adʉ apa ’ngʉ́ gba uo-o lɨe ndjɨndjɨ-o. 14Obhosɨ bhelé naali di ne olɨsɨ bhelé naali ɨnde abhuka Ngámá-a, adʉ alɨ bhʉ́ ká omabhuka, u atsia adʉ abe ndʉ o. 15U aholo belegʉ apandja okpála na kuo lɨ okpadjɨ. U adʉ aseke uo pɨ́ okalagba di ne pɨ́ otsala. U adʉ amene mo-o, anga u adʉ abhundja me ɨ dʉ me Piele nde akodho ’kpɨ́ oo, kulu anɨ de pʉ mbo pɨ́ sʉka uo, amba anɨ kobho. 16Okpála bhelé adʉ di ayie bhʉ́ okʉtɨ na ngo Yelusalema, u adʉ ago ne okpála na kuo di ne okpála ɨnde adʉ ne osisiti bua bhʉ́ o-o. Ndʉ uo hana atsia adʉ akobho.
U aholo obhʉlʉ titima gba Yesu
17Abhomʉ-o, bhele kpála gba odimandɵ gba Ebhe-e di ne ndʉ okpála hana ɨnde adʉ bhʉ́ dabɨlɨ bini ne anɨ-e, a akʉnda napa me libi oSadukai , adje siti bua naali pɨndjɨ obhʉlʉ titima gba Yesu. U atsia apa me, a ayo namene uo sisiti. 18U aholo obhʉlʉ titima-o, u atsia ato uo bhʉ́ tɨkpʉ bhe na ngbéngbé-o. 19La sukpe-e, andjelu bini gba Ngámá aʉ obhɵ bhotɨ na tɨkpʉ-o. Anɨ apandja obhʉlʉ titima-o. Anɨ atsia apa pɨ uo me: 20«Yi nʉ bhʉ́ ’ngbé ’tɨ Ebhe gba omaYuda. Oo, yi kpokpo pɨ okpála ndʉ ’ngʉ́ hana ɨnde atsia mʉkobho na mbɨa-o.» 21Obhʉlʉ titima-a amene bhadi mo-o. Kɵkpɨ́ naali-e, u anʉ bhʉ́ ’ngbé ’tɨ Ebhe, u atsia aholo nasuno pɨ okpála.
Lɨ nedhɨnga bhomʉ-o, bhele kpála gba odimandɵ gba Ebhe-e bhʉ́ dabɨlɨ bini ne okpála gba e-e, u aɨ Libi okpála natsia ’kpɨ́ lɨ ’ngʉ́ gba omaƗsalaele-o. U atsia atima okpála me u nʉ ha obhʉlʉ titima-a bhʉ́ tɨkpʉ, amba u go ne uo. 22Engʉ́ bini, lɨ okpála ango-o anʉ lɨe, u bhaka uo bhʉ́ tɨkpʉ de. U agie lɨo, u atsia apa pɨ Libi okpála natsia ’kpɨ́ lɨ ’ngʉ́ gba omaYuda-a me: 23«Ya abhaka me ’bhɵ tɨkpʉ-o nde ani lɨe ndjɨndjɨ. Okpála nalila tɨkpʉ-o nde adʉlʉ lɨ obhɵbhɵ. La-a, ya aʉ bhotɨ-e lɨe, ya abhaka kpála bhʉ́bhʉ́ oo belegʉ de bini!» 24Lɨ ngámá gba okpála nalila ’ngbé ’tɨ Ebhe-e, di ne ongbengbe odimandɵ gba Ebhe , adje engʉ́ ango-o lɨe-e, mabhundja gba uo angbɨngɨ naali. U mbɨla de me a akolo lɨ obhʉlʉ titima-a ne mangua ’ngʉ́ dho-ie de. 25Pɨpɨta-a, kpála bini ago, anɨ apa pɨ uo me: «Yi djedje nga! Okpála ɨnde yi abu nako o bhʉ́ tɨkpʉ-o, uo mbɨa ɨnde-e bhʉ́ ’ngbé ’tɨ Ebhe. U alʉlʉ malʉlʉ, u ngasuno pɨ okpála.»
26Abhomʉ-o, ngámá gba omʉlila-a anʉ ne osʉdha gba e-o. Anɨ aha obhʉlʉ titima-a, anɨ ago ne uo. Engʉ́ bini, u mene uo sisiti de. Padhá de, anga u adʉ akpe me okpála abhíli o ne teme de. 27Pɨta anɨ ago ne uo lɨe, anɨ ao uo kala Libi okpála natsia ’kpɨ́ lɨ ’ngʉ́ gba omaYuda-o. Abhomʉ-o, bhele kpála gba odimandɵ gba Ebhe-e aholo nayiyi uo me: 28«Ya aha nako lɨ́lɨ pɨ yi kpekpeke me yi asúno ne ’lɨ kpála bhomʉ-o de. La-a, nasuno gba yi-e aha Yelusalema libhomu! Yi ngakʉnda me ngʉte kpála bhomʉ-o tuko pɨ́ ya!»
29Piele di ne obhʉlʉ titima koko agie me: «A ayo me ya mene lɨ́lɨ gba Ebhe ane lɨ́lɨ gba okpála. 30Ngayi-e, yi abhɵlɵ Yesu lɨ kulusi. Engʉ́ bini, Ebhe gba ogbi nɨ́-e azuku anɨ bhʉ́ ká okpála ɨnde amu. 31Ebhe aee anɨ abhʉ́lá lɨ pá ’kpa e na kokpa, anɨ ao anɨ Ngámá di ne Mʉkobho . Anɨ amene mo-o ngʉbula me okpála na Ɨsalaele dji bua o, amba Ebhe e siti ’ngʉ́ gba uo-o. 32Ya au ongʉ́ bhomʉ-o ne djila ya makpe. Bu Bhobua, ɨnde lɨ Ebhe ngaha e pɨ okpála ɨnde ngamene lɨ́lɨ gba anɨ-e, au di.»
33Lɨ Libi okpála natsia ’kpɨ́ lɨ ’ngʉ́ gba omaYuda adje engʉ́ ango-o lɨe, u abɨ ’gʉ́ naali. U di me bhili obhʉlʉ titima gba Yesu-o. 34Engʉ́ bini mʉFalisai bini ɨnde adʉ ’lɨ e me Gamaliele, a adʉ bhʉ́ ká uo. A adʉ mʉsuno na lɨ́lɨ . Ndʉ okpála hana adʉ amanga anɨ ndjɨndjɨ. Anɨ ayie bhʉ́lá. Anɨ ayo me u pandja nga obhʉlʉ titima-a kilidjo. 35Pɨpɨta-a, anɨ atsia apa me: «Ngayi okpála na Ɨsalaele, yi lila lɨyi ndjɨndjɨ lɨ ’ngʉ́ ɨnde yi adji amene e lɨ kʉte okpála ɨnde-o! 36Padhá de, anga ane nga ekpɨ́ bhelé de, kpála bini akoto nako, a adʉ ’lɨ anɨ me Teudasɨ. Anɨ adʉ apa me nɨ ne ’ngbé kpála. Okpála masɨkpe de kámá badha adʉ akpata anɨ. Engʉ́ bini, u abhɵlɵ anɨ lɨe, ndʉ okpála hana ɨnde adʉ akpata anɨ-e atsia atsambala. Abhomʉ-o, engʉ́ gba anɨ-e atsia andjia.
37Pɨta anɨ-e, lɨ nedhɨnga u adʉ atanga okpála lɨe, Yuda, kpála na Galilaya, akoto. Anɨ agbele okpála nganda e bhelé. Ngaanɨ di-e, u abhɵlɵ anɨ. Abhomʉ-o, okpála ɨnde adʉ akpata anɨ-e atsia atsambala. 38Kaka mbɨa ɨnde-e, ma apa pɨ yi me yi adhédhe lɨ okpála ɨnde-e de. Yi o uo. Padhá de, anga ɨ dʉ me mabhundja di ne ongʉ́ gba uo nde ayie ka okpála-a, ɨ kólo padhá. 39Engʉ́ bini, ɨ dʉ la me ongʉ́ bhomʉ-o nde ayie ka Ebhe-e, yi tɨ́ da nabhɵbhɵlɵ de. E-e! Yi agʉ́ gbele ne Ebhe de.»
Abhomʉ-o, Libi okpála natsia ’kpɨ́ lɨ ’ngʉ́ gba omaYuda atsia azɨba mabhundja gba Gamaliele-o. 40U aɨ obhʉlʉ titima-o. U aha lɨ́lɨ me u bhɨ uo ne fimbo. U aha di lɨ́lɨ pɨ uo kpekpeke me u akpó ’ngʉ́ matá ne ’lɨ Yesu belegʉ de bini. Pɨpɨta-a, u atsia atse ’kpa lɨ uo. 41Abhomʉ-o, obhʉlʉ titima-a akoto me u nde abedhe ne djalɨ bedhe. Padhá de, anga Ebhe au ndjɨndjɨ me u zʉ lɨkabhu ngʉbula ’lɨ Yesu. 42Ekpɨ́ bini ne bini hana, u adʉ bha nasuno di ne nakpokpo Bádha Ngali gba Yesu Masɨya bhʉ́ ’ngbé ’tɨ Ebhe di ne bhʉ́ otɨ gba o-o.
اکنون انتخاب شده:
Kulu 5: mdm
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2015, Wycliffe Bible Translators, Inc. All rights reserved.
