Yosua 14
14
Ohukabaniamo hw'esituundu sy'esyaalo sy'emuumbo wa Yorodaani
1Olukano luloondaho luno lukana koti esyaalo sya Kanani esy'emuumbo wa Yorodaani syakabanisibwamo mu baandu ba Yisiraeli. Eliasaari omulaamisi, Yosua omwaana wa Nuuni, alala neende abeemirisi b'amadaala k'enono cha Yisiraeli basikabaniamo mu baandu baabwe. 2#Hub 26:52-56; 34:13. Mani koti sa lu Omwaami yali niyalagira Musa, ebituundu by'ebyaalo bitaanu-na-bine neende esituundu, eby'enono chali nichiri emuumbo wa Yorodaani byakabwaanga mu hwehoonyera ohuubba eha bati: 3#Hub 32:33; 34:14,15; Amal 3:12-17. Musa yali niyamala hale ohuberesa enono chibiri neende esituundu eloba lyali niliri engereha wa Yorodaani; nae haba siyali niyaberesaho omukabo kwoosi enono y'Abaleefi daawe. 4Olwohuba abaandu ba Yosefu bali nibali nono chibiri choong'ene, nga nicho Manaase neende Efuraimu; nihaandi abulao esituundu syoosi esyali nisichia ohubereswa Abaleefi hu loba elyo, nae ebiko byoong'ene bi baba nibamenyamo, alala neende amaloba kaabwe k'enjayiro ch'ebyaayo byaabwe haandi neende ohulimamo ebyohulya byaabwe. 5Mani abaandu ba Yisiraeli bakabaniamo eloba elyo koti lu Omwaami yali niyalagira Musa.
Hebburoni siberesebwa Kalebbu
6 #
Hub 14:30. Olwoola, abaandu baandi ohutula mu nono ya Yuda beecha eyiri Yosua mu Giligaali. Mulala hu bo, olaangwa mbwe Kalebbu omwaana wa Yefune Omukenisi, yamuboolera ati, “Ngaandi ewe omanyire bulai bweene ebiindu bi Omwaami yaboolera Musa omuundu wa Nasaae, mu Kadesi Bbarinea ebidiira hweewe neende hweese. 7#Hub 13:1-30. Ese ndali ni ndi emyaaka amahumi kane eky'obuhuluundu, Musa omuhalaabani w'Omwaami niyaanduma ohutula mu Kadesi Bbarinea ohuchia ohuhemeresa mu loba lino. Ese ndamuleetera obwadyeeri bweene koti lu bwali nibufwaana. 8Kata katyo, nae abasaacha bali naange, beecha bachaaka ohutiihirisa sa abaandu beefwe. Nae ese mubwadyeeri bweene ndeesa oluyaali mu Omwaami Nasaae waange. 9#Hub 14:24. Mani olwohuba mbwe ese ndahola endyo, Musa yasuubisa ati, ese neende abaana baange huchia mubwaadyeeri bweene ohunyoola omukabo kweefwe hu bweefwe, hu loba li ndali omweene nindaseenaho neende amakulu kaange. 10Nae bulaanu ewe bonaho. Emyaaka amahumi kane amalaamba kahamala ohubitao ohutula Omwaami n'aboolera atyo Musa. Ebiha ebyo nibyo bi Yisiraeli yali niyiri ohuhalakanisiramo mu siparara, koti lu Omwaami yali niyasuubisa, yaniinda ndabaao omulamu ohutula esiha esyo. Bulaanu ewe siingisa emoni chao wundewuunje wuumanyirise bulai! Ese bulaanu mbano ndi neende emyaaka amahumi kataanu-na-kadatu neende kitaanu eky'obuhuluundu 11nihaandi mbano ese sisiiri sa neende amaani enyaanga yino koti lu ndali esiha sira si Musa yandumiramo. Sisiiri sa neende amaani akanyala ohukera ndaachia ndalwaana ebiita, oba ndaahola esiindu siindi syoosi. 12Mani bulaanu, ewe ngabe esyaalo sy'ebigulu-gulu esyo, si Omwaami yaasuubisa hu ludaalo olwo, lu basaacha baange ba ndali nabo alala neende ese omweene hwaboolera bi hwali nihubweene. Hwahuboolera esiha esyo huti, olwiibulo lwa kirahula kyali nikilaangwa mbwe Anaaki, kyali nikiliyo nikyamenya mu biko bihoongo muno haandi ebyoombahirwaho ebida. Mani awuundi Omwaami anyala ohuba n'achia ohuba naange mani syesi ndaanyala ohuchia ndaakiiruhania ndaakimala mu biko ebyo, koti sa lu Omwaami mweene yali n'aboolere.”
13Yosua yaberesa Kalebbu omwaana wa Yefune ehabi, mani yaamuberesa esiko sya Hebburoni ohuba esyae sy'elalira. 14Mani neende buti, Hebburoni sisisiiri sa esiko sy'abeechuhulu ba Kalebbu omwaana wa Yefune Omukenisi, olwohuba neende obweesikwa obuungi yeesa oluyaali mu Omwaami, Nasaae wa Yisiraeli. 15Bino nibisisiiri ohuba bityo, Hebburoni syali nisilaangwa mbwe esiko sya Aribba. (Aribba yali niye owali omuhunuufu ohiramo mu baandu b'Anaaki.)
Bulaanu omuleembe kwabaao muno mu syaalo esyo.
©Bible Society of Kenya, 2019
©Bible Society of Uganda, 2019