Lucca 16
16
A parabula di u intindenti malunestu
1È dissi à i discipuli: «un riccu avia unu intindenti, chì li fù ditta ch'ellu li magnava a so robba. 2È ellu u chjamedi è li dissi: “ch'aghju intesu? Dà mi i conti di u to guvernu, chì u me intindenti ùn poi più essa.” 3È u intindenti dissi da sè à sè: “cumu avaraghju da fà, chì u me patroni mi caccia u guvernu? Da zappà ùn aghju forza, è à dumandà a carità mi ni vargugnariu. 4Ma a sò ciò ch'e aghju da fà, quand'È saraghju missu fora da u impiecu, par fà mi riceva da a ghjenti in casa soia.” 5Chjamedi tutti quilli chì avianu debbiti cù u so patroni è dissi à u prima: “tù, quantu li devi à me patroni?” 6Quillu dissi: “centu cerri d'oliu.” È u intindenti li dissi: “eccu u to listinu: posa subitu è scrivi cinquanta.” 7Dopu à un antru li dissi: “è tù quantu devi?” Quillu dissi: “centu mizini di granu. Li dici: eccu u to contu, scrivi uttanta.” 8È u patroni filicitedi ancu u intindenti pocu unestu d'essa statu cusì sinnatu; chì i figlioli di issu mondu sò più sinnati cà i figlioli di a luci, par ciò chì tocca à i soii l'affari; 9ed eiu vi dicu: Acquisteti vi l'amichi cù i soldi di a inghjustizia, chì cusì quand'ì vo sareti spruvisti sareti ricivuti in li casi eterni. 10À chì hè fidu in lu pocu, ancu in l'assai fidu hè, è à chì hè infidu in lu pocu, ancu in l'assai infidu hè. 11Cusì sì pà i soldi di a inghjustizia ùn fusti fidi, pà u veru bè, quali si fidarà di voi? 12È sì pà a robba di l'altri ùn fusti fidi, ciò chì vi veni quali u vi darà? 13Nisun servu pò serva dui patroni; chì à unu u vularà mali è à quillu altru u tinarà caru, o sarà fidu à unu è disprizzarà quillu altru. Un pudeti essa servi di Diu è di u Soldu#16,13 Paragunà cù Mt 6,24..»
A Legi è u Regnu di Diu
(Mt 11,12-13)
14Sintianu tuttu què i Farusei chì u danaru li piacia, è si ridianu d'ellu. 15È Ghjesù li dissi: «voi seti di quilli chì facinu inveci d'essa ghjusti davanti à a ghjenti, ma Diu cunnosci i vostri cori; parchì ciò chì hè altu ind'è l'omi hè un schifeghju davanti à Diu. 16A Legi è i prufeti sò ghjunti insini à Ghjuvanni; da tandu u Vangelu di u Regnu di Diu veni purtatu è ugnunu faci i sforzi da entra ci o è ugnunu l'assalta. 17Ma hè più faciuli ch'elli sparischinu u celi è a tarra, cà di caccià una sola lettara da a Legi. 18À chì lascia a moglia è si ni piglia una antra hè adulteru, è quilla chì hè stata lasciata s'ella si marita hè adultera.»
U riccu è Lazaru
19«Ci era un riccu, si vistia di porpura è di linu finu, è a si gudia tutti i ghjorni ind'u lussu. 20Ma un puvarellu chjamatu Lazaru era chjinatu davanti à u purtoni di u riccu, cupartu à piaghi; 21è avaria bramatu, ellu, di magnà si ciò chì cascava da a tola di u riccu; ma ancu i ghjacari vinianu à liccà li i piaghi. 22È si ni morsi u puvarellu è fù purtatu da l'agnuli à cantu à Abraamu#16,22 Paragunà cù Lc 13,28.; è morsi ancu u riccu è fù intarratu. 23È indi l'inferni aprì l'ochji, mentri ch'ellu patia i turmenti, è vidi da luntanu à Abraamu , è à Lazaru à cantu ad ellu. 24È u chjamedi: “o Abrà, o bà, abbii pietà di mè è manda à Lazaru, ch'ellu ciotti a punta di u ditu in l'acqua è ch'ellu mi rinfreschi a lingua, chì soffru troppu in issa fiamma.” 25È Abraamu li dissi: “u me figliolu, ramenta ti chì tù ai ricivutu tuttu u bè ind'a to vita, è cusì Lazaru hà ricivutu u mali; ma oramai quì hè ricuvaratu, è tù strazii. 26È in soprappiù, trà noi è voi un abissu maiò hè statu missu, chì quilli chì da quì volinu passà ind'è voi ùn la possinu fà, è chì mancu da culà induv'è vo' seti ùn provinu à passà ind'è noi.” 27È u riccu dissi: “tandu ti ni precu, o bà, manda lu in casa di babbu, 28chì aghju cinqui fratelli, ch'ellu i privenghi, ch'elli ùn venghinu ancu elli in stu locu di u turmentu.” 29È li dissi Abraamu: “anu à Musè è i prufeti; ch'elli i stianu à senta.” 30Ma ellu dissi: “innò chì ùn basta, o Abrà, o bà, ma sì da trà li morti veni calchì sia à truvà li si anu da cunverta.” 31È li dissi: “sì à Musè è i prufeti ùn li credinu, mancu s'ellu risuscitessi unu da trà li morti, ùn saranu cunvinti.”»
اکنون انتخاب شده:
Lucca 16: 4EvCors
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Société biblique française, 1994
