MATEO 2
2
Magonakaki tuwanta yoqkiśtanJesusa thonśñi thonchićha
1Jesusaki Belén wathkiś Judea khita yoqkiś mathtaćha, ni Herodeski nïpacha reytaćha, niźaśa Magonakaki tuwanta yoqkiśtan Jerusalén watha irantiźkichićha, ni Magonakaki warawaranaka qhurñitaćha śiśxapa, 2niźaśa ninakaki pewkśićha:
–¿Xaqhsikin ni judiunakź uśhka mathta reyxo? Niźaśa nïź warawara tuwanta yoqkin werhnakki cherchinćha niźaśa nïźkiś amtil thonućha.
3Ni rey Herodeski, xalla ni Magonakaź chïta nonźku muspaysi khissićha, niźaśa ni Jerusalén wathchiś źoñinakami muspaysi khissiśaqaśśa. 4Niźaśa ni rey Herodeski qhawśñi kuchanchićha, thappacha ni timlu chawkh jilirinaka niźaśa lï utt'ayñinaka, ninakźkiś pewkśićha xaqhsikin Mesías khita mathśtantaxo. 5Ni źoñinakaki qhäśićha:
–Ni Belén wathkiś Judea yoqkin; xalla nuź khjirchićha ni Yöś kuchanźkita chïñiki:
6‘Niźaśa ni Belén Judá yoqkiś,
anaź amki añcha qoltallam
ni cheqan chawkh wathnakźkiśtan
niźaśa amkiśtan
tshi irpiñi ulnakićha
xalla nïki weth Israel
wathaź irpakićha.’
7Neqhśtan Herodeski ni Magonaka xamaśit qhawśićha, niźaśa ninakźkiśtan śumpacha ni warawara thensi thuñi śiśśićha. 8Xalla neqhśtan ninaka, Belén watha kuchanchićha tuź khikan:
–Ni Belén watha oqa, niźaśa ni uśhkiśtan śumpacha purwiyt'akićha; neqhśtan ni uśha wathźku wethkiś maśkakićha, niźaśa werhśaqal ni uśha amti oqaćha.
9Xalla ni reyź chïtanaka nonźku, ni Magonakaki Belén watha oqhchićha. Niźaśa ninakaź tuwanta yoqkin cherta warawaraki ninakź tukkin oqatćha, niźaśa ni warawaraki ni uśha xaqhsikiś mathtataźlaxa, xalla ni juntuñ tshitsićha. 10Xalla ni Magonakaki ni warawara cherźku añcha chipchićha. 11Neqhśtan qhuya luśhśićha, niźaśa ni uśha Mariy mätanpacha cherśićha; niźaśa nïź tukkiś killśićha, niźaśa ni uśhkiś amtichićha. Neqhśtan ninakź päś pitaja khetźku qori niźaśa inśinśu niźaśa mirra onanchićha. 12Xalla neqhśtan ni magonakźkiś ćhhüsqatchćha, ana Herodes qhutñi kuttaxu, neqhśtan ninakaki ninakź yoqa yaqha jikhśuñ kuttichićha.
Jesusaki mä ephźtanpachaEgiptu yoqa śhoxśićha
13Xalla ni Magonakaź oqhtan, tshi Yöś anjilaki Joseź thxaxan ćhhüsqatchićha, tuź khikan: “Źäźna, ni uśha niźaśa mätanpacha źinźna niźaśa chhichku oqa ni Egiptu yoqa. Xalla nikhum eklakićha werh maśinśkama, ni Herodeski ti uśha konśxapa qhurakićha.”
14Joseki źäźku ni wënpacha, ni uśhtan niźaśa mätanpacha chhichku oqhchićha Egiptu oqhñi jikhśqhutñi. 15Xalla nikhu Herodes tikhśkama źelhchićha. Xalla nuźupan watchićha, Yöś Ephź kuchanźkita chïñinakź taqukama: “Ni Egiptukiśtan weth Machh qhawśinćha.”
Herodeski okhalanaka konźkaxukuchanchićha
16Neqhśtan Herodeski näśićha ni Magonakaź q'ottikiśtan, niźaśa muspa ana wali źaxwchićha, neqhśtan piśk watkiśtan qossuk okhalanaka konźkaxu kuchanchićha, thappacha ni Belén wathchiś niźaśa ni wath muytata źelhñinakźkinami. 17Xalla nuź watchićha ni Jeremías Yöś kuchanźkita chïñiź chïtakama: Xalla tuź khichićha:
18“Tshi xora qhawñi Ramakin nonźtaćha,
qäyi niźaśa chawkh llaki.
Na Raquelki, näźa okhalźkiśtan qätćha
niźaśa ana quśtami iyawkhetćha
xalla ni okhalanaka tikhśiźkhen.”
Jesusaki mä ephźtampachaNazaret watha kuttiźkichićha
19Xalla ni Herodes tikhźtikiśtan, tshi Yöś anjilaki Joseź thxaxan ćhhüsqatchićha Egiptu yoqkiś źelan, niźaśa tuź khichićha: 20“Źäźna, ni uśha niźaśa mätanpacha źinźna niźaśa Israel yoqa kutta, xalla ni uśha konś pekñinakaki tikhśićha.”
21Neqhśtan Joseki źäźku, nïź uśha niźaśa mätanpacha źinśićha, neqhśtan Israel yoqa oqhchićha. 22Xalla neqhśtan Joseki ni Arquelao nïź ephź Herodes irpiśkiś irpan, Joseki ni watha oqhś eqhsićha; niźaśa Yöś Eph Joseźkiś thxaxan ćhhüsqatchićha Galilea yoqa oqaxu. 23Xalla ni yoqa irantiźku, Nazaret chawkh wathkiś qami qallantichićha, xalla tïki watchićha ni Yöś chïñinakaź chïtakama; ni Jesusaki Nazareno khitaśaqaś khiśtanćha.
اکنون انتخاب شده:
MATEO 2: CHIPBO
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Nuevo Testamento Chipaya © Sociedad Bíblica Boliviana, 2004.