Fīripo 4
4
1ꞌO ira, e te taina ē, e uꞌi e haka noho e oho te kōrua manaꞌu ꞌi ruŋa i a Ietū. E manaꞌu rahi rō atu ꞌana a au ki a kōrua, e haŋa rahi rō atu ꞌā, ꞌe hai kōrua a au e koa nei.
He hatu mo te taina hoko rua o Fīripo
2He ani atu a au ki a kōrua, e ꞌEvoria ē, ꞌe e Tinitike ē: ka haka kore te riri o roto i a kōrua; a kōrua, paꞌi, he taina haka moe i te manaꞌu o ruŋa i a Ietū. 3ꞌE a koe, e te hokorua aŋa ōꞌoku ē: e hāꞌūꞌū ki te ŋā taina ena. A rāua ananake ko kuā Keremente ꞌe tētahi atu nuꞌu i aŋa takoꞌa rō ꞌi muri i a au ꞌi te aŋa he haka ꞌite he oho i te ⌊roŋo riva-riva o ruŋa i a Ietū⌋. Te rāua ꞌīŋoa nā ꞌi ruŋa i te puka o te ꞌAtua, puka ꞌi ruŋa e pāpaꞌi ena te ꞌīŋoa o te nuꞌu ravaꞌa i te ora ꞌāpī ꞌina he hopeꞌa raꞌa.
He hatu mo te taꞌatoꞌa
4E koa e oho nō kōrua ꞌo te ai o kōrua ꞌa Ietū Kiritō. ꞌĪ a au he kī haka ꞌou atu: ¡E koa kōrua! 5E ꞌite e te nuꞌu taꞌatoꞌa: nuꞌu riva kōrua. Te hoki iŋa mai, paꞌi, o Ietū ko hāhine ꞌana.
6ꞌIna ko manaꞌu rahi ki te meꞌe topa atu ꞌi ruŋa i a kōrua. E pure ki te ꞌAtua, e ani ki a ia mo hāꞌūꞌū atu, ꞌe ꞌina ko rehu mo māuru-uru. 7Mo aŋa o kōrua i te meꞌe ena, he vaꞌai atu e te ꞌAtua i te haumārū ꞌina e ko aŋi-aŋi e te manaꞌu taŋata, ꞌe mo nā haumārū e hāpaꞌo i te kōrua māhatu ꞌe i te kōrua manaꞌu ꞌo te ai o kōrua ꞌa Ietū Kiritō.
8ꞌE tāꞌaku vānaŋa hopeꞌa mo kōrua, e te taina ē: e manaꞌu ki te meꞌe parautiꞌa, ki te meꞌe taꞌatoꞌa tano mo moꞌa, ki te meꞌe tano ki te mata o te ꞌAtua, ki te meꞌe ꞌina he hara, ki te meꞌe nehe-nehe, ki te taꞌatoꞌa meꞌe riva-riva. Te kī: e manaꞌu ki te meꞌe taꞌatoꞌa tī-tika ꞌe tano mo haꞌahana-hana.
9E aŋa tahi kōrua i te meꞌe hāpī atu e au, he meꞌe ŋaroꞌa ꞌe takeꞌa era kōrua mai i a au. Pē ira he hokorua atu e te ꞌAtua vaꞌai mai i te haumārū.
He māuru-uru
10Ko koa ꞌana ꞌe ko māuru-uru ꞌana a au ki te ꞌAtua ꞌo te haka takeꞌa haka ꞌou mai o kōrua, ꞌi te hora nei, i te kōrua manaꞌu iŋa mai ki a au hai haka maꞌu mai o kōrua hai moni. Ko ꞌite ꞌana e au he manaꞌu nō te aŋa o kōrua mo hāꞌūꞌū mai. Te meꞌe nō, he ravaꞌa iho e kōrua i te rāveꞌa pē hē ana haka maꞌu mai i te kōrua hāꞌūꞌū. 11Taꞌe he hape o tāꞌaku meꞌe e kī atu ena a au i te meꞌe nei. A au, paꞌi, ko ꞌite ꞌana mo koa i te meꞌe nō era ꞌāꞌaku i ai. 12E ꞌite rō ꞌā a au pē hē te noho iŋa ꞌi roto i te oŋe ꞌe pē hē te noho iŋa ꞌi roto i te mau. ꞌE e ꞌite takoꞌa rō ꞌana a au mo koa ka ai atu e mākona rō ꞌā ꞌo e maruaki rō ꞌana, e ai rō ꞌā ꞌo e taꞌe ai rō ꞌā tāꞌaku meꞌe. 13Meꞌe nō era mo topa mai, e ꞌite nō e au mo maꞌu, māuru-uru ki a Ietū Kiritō, kope haka pūai mai i a au. 14ꞌE, ka ai atu pē ira, he māuru-uru atu a au i hāꞌūꞌū mai ai kōrua ꞌi tōꞌoku ꞌati.
15Ko ꞌite ꞌana a kōrua, e te taina o Fīripo ē, hora oho era ōꞌoku mai Mātērōnia mo haka ꞌite mo oho i te roŋo riva-riva o ruŋa i a Ietū, hora e haka moe iho ꞌana kōrua i te manaꞌu ꞌi ruŋa i a ia, ko kōrua mau nō te nuꞌu i hāꞌūꞌū mai hai moni. 16ꞌĀtā ꞌi te hora era ōꞌoku ꞌi Tētārōnika, taꞌe nō e tahi haka maꞌu iŋa mai o kōrua hai moni. 17Te meꞌe nei e au e kī atu ena taꞌe ꞌō he haŋa ōꞌoku mo hāꞌūꞌū mai; tōꞌoku haŋa mo ꞌata haꞌamaitai atu e te ꞌAtua ꞌo te hāꞌūꞌū mai o kōrua i a au.
18He haka ꞌite atu a au: te meꞌe taꞌatoꞌa haka maꞌu mai era e kōrua ki a Epafororito ko tuꞌu mai ꞌana; rahi riꞌa-riꞌa ꞌe ꞌina he meꞌe hape toe ꞌāꞌaku. Te meꞌe nei pa he tūtia ꞌeo vaꞌai ki te ꞌAtua, ꞌe he meꞌe koa ꞌāꞌana. 19ꞌE mo te ꞌAtua, ki a ia a au e tāvini nei, e vaꞌai atu i te meꞌe taꞌatoꞌa hape o kōrua mai te hauhaꞌa taꞌe pau ꞌāꞌana ꞌo te ai o kōrua ꞌa Ietū Kiritō. 20Ki haꞌahana-hana tahi tātou ki te ꞌAtua, he Matuꞌa o tātou, ꞌātā ki te hopeꞌa raꞌa. ⌊ꞌĀmene⌋.
He ꞌaroha
21E ꞌaroha atu kōrua ki te nuꞌu taꞌatoꞌa ⌊haka moe i te manaꞌu⌋ ꞌi ruŋa i a Ietū. Te ŋā taina nei o muri i a au ꞌī e ꞌaroha atu ena ki a kōrua. 22ꞌĪ e ꞌaroha takoꞌa atu ena te taina taꞌatoꞌa haka moe i te manaꞌu ꞌi ruŋa i a Ietū o nei. ꞌE te nuꞌu o nei aŋa ki te ꞌariki rōmano, ko rāua te meꞌe ꞌata ꞌaroha atu ki a kōrua. 23Ka ai ꞌi ruŋa i a kōrua taꞌatoꞌa te riva rahi o Ietū Kiritō, he Pūꞌoko Haka Tere o tātou.
اکنون انتخاب شده:
Fīripo 4: rap
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2018, Wycliffe Bible Translators, Inc. All rights reserved.