Fīripo 2
2
E tuꞌu te kōrua manaꞌu pa he manaꞌu iŋa o Ietū
1E te taina, mo ai e pūai rō ꞌā a kōrua ꞌo te ai o kōrua ꞌa Ietū Kiritō, mo ai e ŋaroꞌa rō ꞌana e kōrua i te ora ꞌo te haŋa atu ōꞌona ki a kōrua, mo ai e koa rō ꞌana a kōrua ꞌo te ai o te ⌊Vārua Maitai⌋ ꞌi roto i a kōrua, ꞌe mo ai he nuꞌu māhatu ꞌaroha kōrua, 2e haŋa ia kōrua ꞌi roto i a kōrua ꞌā, e noho kōrua ꞌi roto i te haumārū, ꞌe e ai te kōrua manaꞌu e tahi mau nō, ki koa mau rō ai a au mo kōrua. 3ꞌIna kōrua ko aŋa e tahi aŋa mo haka tuꞌu pē nei ē: ꞌauē ꞌō kōrua ē. Ana aŋa kōrua e tahi meꞌe, e aŋa hai haumārū ꞌe hai manaꞌu pē nei ē: i hau rō atu te tētahi nuꞌu ki a kōrua. 4ꞌE ꞌina ko kimi i te riva-riva mo kōrua mau nō; e uꞌi takoꞌa i te riva-riva mo te rua. 5E tuꞌu te kōrua manaꞌu pa he manaꞌu iŋa o Ietū 6pē nei ē:
Ka ai atu a ia he ꞌAtua,
i haŋa nō mo haka rē i rā tōroꞌa
7mo haka riro i a ia he taŋata,
ꞌe mo tuꞌu mai ōꞌona pa he tāvini.
ꞌE, ꞌi tōꞌona haꞌere iŋa pa he taŋata,
8te meꞌe i aŋa he haꞌatura ki te ꞌAtua
ꞌātā ki te roa he haꞌatiꞌa i a ia mo mate,
ꞌe ꞌātā mo mate ꞌi ruŋa i te tātaurō,
he ūtuꞌa mo te nuꞌu taparahi-taꞌata.
9ꞌO ira te ꞌAtua i vaꞌai ai ki a Ietū
i te tōroꞌa hopeꞌa o te nui-nui,
ꞌe i te parau o te meꞌe taꞌatoꞌa,
10ki tū-turi ꞌe ki haꞌamuri tahi ai ki a Ietū
te meꞌe taꞌatoꞌa ꞌi te raŋi, ꞌi ruŋa i te henua ꞌe ꞌi te pōꞌauahi,#2.10 Te haꞌaauraꞌa: te merahi taꞌatoꞌa, te nuꞌu ora, te nuꞌu mate ꞌe te tātane taꞌatoꞌa.
11ki kī ai te ŋā meꞌe taꞌatoꞌa nei pē nei ē:
he parautiꞌa mau ꞌā a Ietū Kiritō he Pūꞌoko Haka Tere o te meꞌe taꞌatoꞌa.
Pē ira ka haꞌahana-hana tahi ena ki te ꞌAtua Matuꞌa.
Te noho iŋa tano ꞌi te ao nei
12E te taina, hora era ōꞌoku ꞌi muri i a kōrua, he haꞌatura nō te kōrua aŋa ki te ꞌAtua. ꞌE, hora nei, ꞌina a au o muri o kōrua, e ꞌata haka pūai te kōrua haꞌatura iŋa ki a ia mo aŋa mo oho nō o kōrua, hai moꞌa, i te meꞌe tano aŋa e te nuꞌu eꞌa mai roto i te ūtuꞌa o te hara. 13O te ꞌAtua, paꞌi, te haka poreko ꞌi roto i a kōrua i te haŋa mo haꞌatura ki a ia ꞌe te vaꞌai atu i te pūai mo aŋa o kōrua i te meꞌe mo koa ōꞌona.
14Te meꞌe taꞌatoꞌa aŋa e kōrua, ana aŋa ꞌina ko tātake ꞌe ꞌina ko hēŋuꞌi-ŋuꞌi, 15ꞌo ai te kōrua hape ꞌe te kōrua meꞌe taꞌe tano mo tuhi atu e te taŋata. ꞌI roto i te nuꞌu haꞌavare ꞌe taparahi-taꞌata o te ao nei e riro kōrua he ŋā poki o te ꞌAtua ꞌina e tahi hape. E māꞌeha kōrua ꞌi roto i a rāua pa he hetuꞌu pura ꞌi roto i te pōhāhā 16koia ko haka ꞌite ko oho i te vānaŋa o te ꞌAtua ki a rāua, vānaŋa vaꞌai i te ora ꞌāpī ꞌina he hopeꞌa raꞌa. Mo aŋa o kōrua pē ira, he koa a au mo kōrua ꞌi te hora o Ietū ka hoki mai ena ꞌo te ꞌite ōꞌoku pē nei ē: tāꞌaku aŋa aŋa atu ꞌi roto i a kōrua kai māuꞌa.
17Pa he tūtia vaꞌai e kōrua ki te ꞌAtua mo koa ōꞌona te ꞌati e ꞌamo ena e kōrua ꞌo te ⌊haka moe i te manaꞌu⌋ ꞌi ruŋa i a Ietū ꞌe ꞌo te aŋa o kōrua ki a ia. ꞌE mo haŋa o te ꞌAtua mo ꞌāmui i tōꞌoku mate ki te tūtia vaꞌai e kōrua ki a ia, pa he huri iŋa i te manu tūtia hai vino, e koa nō a au, pa he koa iŋa nei ōꞌoku mo kōrua. 18Pē ira takoꞌa kōrua: ana topa mai i te meꞌe nei, e koa kōrua mōꞌoku.
Timoteo
19Ana haŋa a Ietū, e ko roa he uŋa atu a au i a Timoteo, ꞌe, ka hoki mai ena a ia mai i a kōrua, he koa a au ꞌi te parau ꞌāpī ka maꞌu mai ena o ruŋa i a kōrua. 20O roto o tōꞌoku hokorua ko ia mau nō te kope manaꞌu pē au, haŋa hai māhatu mo riva-riva o kōrua. 21Te tētahi te meꞌe manaꞌu raꞌe he riva-riva o rāua, taꞌe ꞌō he aha te meꞌe haŋa ꞌa Ietū. 22Ko ꞌite ꞌana, hoꞌi, kōrua pē hē te huru o Timoteo ꞌe pē hē a ia i hāꞌūꞌū i oho mai ai mo haka ꞌite i te ⌊roŋo riva-riva o te ꞌAtua⌋. E hāꞌūꞌū mai nei pa he poki mau ꞌana ꞌāꞌaku. 23ꞌO ira, ki ꞌite a au he aha te meꞌe ka topa mai ena, ka uŋa iho atu ena e au, 24ka ai atu te parautiꞌa, ꞌī a au e haka noho rō ꞌā i tōꞌoku manaꞌu ꞌi ruŋa i te ꞌAtua pē nei ē: e ko roa he oho takoꞌa atu a au ki a kōrua ena.
Epafororito
25ꞌĪ a au e manaꞌu takoꞌa ꞌā mo uŋa atu i te tātou taina ko Epafororito, kope uŋa mai era e kōrua mo hāꞌūꞌū mai ki a au. A ia he hokorua aŋa ōꞌoku ꞌe pa he vaꞌehau haka ꞌou e tahi o te ⌊Kiritō⌋.
26A Epafororito e koromaki rō ꞌana ki a kōrua taꞌatoꞌa. ꞌĪ e manaꞌu rahi atu ena ꞌi te ꞌite o kōrua pē nei ē: i māui-ui rō a ia. 27ꞌE he aŋi mau ꞌā i māui-ui rō, ꞌātā i oho rō mo mate. ꞌE, te ꞌAtua i haka ꞌaroha rō i a ia ꞌe i a au takoꞌa, ꞌo ꞌata rahi rō te māui-ui ꞌi roto i tōꞌoku māhatu.
28ꞌĪ a au he haka keꞌo-keꞌo he haka uŋa atu mo koa o kōrua ꞌo te takeꞌa haka ꞌou i a ia, ꞌe pē ira e ko manaꞌu rahi haka ꞌou atu a au. 29Ka tuꞌu atu ena a ia, e toꞌo kōrua hai māhatu, pa he taina haka moe i te manaꞌu ꞌi ruŋa i a Ietū. Te nuꞌu pē ia e moꞌa e kōrua. 30A Epafororito, paꞌi, i vaꞌai rō i a ia ki te mate mo aŋa ki a Ietū. Te parautiꞌa, i oho rō mo mate ꞌi te hāꞌūꞌū mai i a au ꞌi te aŋa ꞌina e ko ravaꞌa e kōrua mo aŋa he kore o kōrua o muri i a au.
اکنون انتخاب شده:
Fīripo 2: rap
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2018, Wycliffe Bible Translators, Inc. All rights reserved.