2 Kōrinto 9
9
1ꞌE o ruŋa i te meꞌe he haꞌaputu i te moni mo te taina veve o Hērutarema, ¡¿mo aha atu ꞌā a au ana pāpaꞌi haka ꞌou atu?! 2Ko ꞌite riva-riva ꞌana, paꞌi, e au e haŋa rō ꞌana a kōrua mo hāꞌūꞌū. ꞌE tāꞌaku aŋa he ꞌaꞌamu nō hai koa ki te nuꞌu o Mātērōnia pē nei ē: mai tū matahiti oti era ꞌā, a kōrua, te nuꞌu o Ākāia, e haŋa rō ꞌana mo hāꞌūꞌū. ꞌE te rahi raꞌa o te nuꞌu o ira ko haŋa takoꞌa ꞌā mo hāꞌūꞌū i te aŋa nei, he ꞌite i te rahi o te haŋa o kōrua mo hāꞌūꞌū.
3ꞌE, kai ai atu pē ira, he uŋa atu a au i te ŋā taina nei mo hāꞌūꞌū atu, ꞌo taꞌe tano tāꞌaku vānaŋa kī era o ruŋa i a kōrua. Te meꞌe haŋa: ka tuꞌu atu ena a au, ko taka-taka ꞌā te moni i a kōrua, 4ꞌo oho tāꞌue atu te nuꞌu o Mātērōnia ꞌi muri i a au he takeꞌa kai taka-taka ꞌā i a kōrua, ꞌe he haꞌamā a au. ꞌE, ¡¿mo aha atu ꞌā ana kī atu pē hē kōrua ka haꞌamā takoꞌa ena?! E ꞌaꞌamu rō ꞌana, paꞌi, mātou: a kōrua e haka tano tahi rō ꞌana i te kōrua meꞌe kī. 5ꞌO ira a au i manaꞌu ai mo vānaŋa ki te ŋā taina nei mo oho atu mo uꞌi i a kōrua ꞌi raꞌe ki a au, mo hāꞌūꞌū atu mo haka mao i rā meꞌe kī era e kōrua. Pē ira ka tuꞌu atu ena a mātou, he takeꞌa e te taina taꞌatoꞌa i vaꞌai ai a kōrua hai māhatu, taꞌe ꞌō ꞌo te ai ko kī atu ꞌā.
E hāꞌūꞌū hai māhatu
6E manaꞌu kōrua ki te vānaŋa nei: «Te kope taꞌe ꞌoka rahi, meꞌe taꞌe rahi te meꞌe ka kato era; ꞌe te kope ꞌoka rahi, meꞌe rahi ka kato era». 7Taꞌatoꞌa o kōrua ana vaꞌai i te meꞌe manaꞌu ꞌi roto i te māhatu hai haŋa, ꞌe taꞌe ꞌō ꞌo te ai ko kī atu ꞌā e te rua. Te ꞌAtua, paꞌi, e haŋa rō ꞌā ki te kope vaꞌai i te meꞌe hai koa. 8ꞌE i a ia te pūai mo haꞌamaitai hai rauhuru nō atu meꞌe ꞌo hape e tahi meꞌe o kōrua, ꞌe, ꞌi te rahi, he topa ꞌātā mo hāꞌūꞌū ki te tētahi. 9E kī rō ꞌana, paꞌi, ꞌi ruŋa i te ⌊Pāpaꞌi Moꞌa⌋ mo te kope riva:
«E rahi rō ꞌā te vaꞌai iŋa ki te nuꞌu veve,
ꞌe tōꞌona riva era e ko rehu ki te hora hopeꞌa».
10O te ꞌAtua te vaꞌai i te karu ki te nuꞌu ꞌoka, ꞌe i te kai ki te taŋata. ꞌĀꞌana takoꞌa te vaꞌai ꞌe te haka rahi i te meꞌe ai o kōrua, mo ꞌata rahi o te kōrua hāꞌūꞌū ki te rua. 11Pē ira ka ai ena rauhuru nō atu kōrua hauhaꞌa ꞌe he tano mo hāꞌūꞌū ki te rua hai māhatu. Te moni haka taka-taka ena e kōrua ka maꞌu ena e mātou he rāveꞌa haka ꞌou e tahi mo māuru-uru o te tātou ŋā taina era o Hērutarema ki te ꞌAtua. 12Te maꞌu i te hāꞌūꞌū nei ki te ŋā taina era o ira taꞌe nō e maꞌu ꞌā i te meꞌe hape o rāua, e aŋa takoꞌa ꞌā i te meꞌe mo ꞌata māuru-uru o rāua ki te ꞌAtua. 13Hai hāꞌūꞌū ena o kōrua he haꞌahana-hana te taina o Hērutarema ki te ꞌAtua ꞌi te ꞌite e maꞌu ꞌe e haꞌatura rō ꞌana kōrua ki te ⌊roŋo riva-riva o te ꞌAtua⌋ o ruŋa i a Ietū Kiritō, ꞌe ꞌi te rahi o te kōrua hāꞌūꞌū iŋa ki a rāua ꞌe ki te taŋata taꞌatoꞌa. 14ꞌE ꞌātā he pure hai māhatu mo kōrua ꞌi te takeꞌa i te riva rahi o te ꞌAtua ꞌi ruŋa i a kōrua. 15¡Ki māuru-uru tahi tātou ki te ꞌAtua ꞌo te vaꞌai mai i te hauhaꞌa hopeꞌa o te nui-nui, hauhaꞌa ꞌina he vānaŋa mo haꞌaauraꞌa, he Poki ena ꞌāꞌana!
اکنون انتخاب شده:
2 Kōrinto 9: rap
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2018, Wycliffe Bible Translators, Inc. All rights reserved.