1 Iovani 3
3
1Ka haka topa rā te kōrua manaꞌu ꞌi te rahi o te haŋa o te ꞌAtua Matuꞌa ki a tātou e kī mai ena e ia he ŋā poki tātou ꞌāꞌana, ꞌe he aŋi ꞌā, ꞌāꞌana mau ꞌā a tātou. ꞌO ira te nuꞌu o te ao haka tere hai manaꞌu taŋata e taꞌe māhani ena ki a tātou, he taꞌe māhani o rāua ki te ꞌAtua.
2E te taina, he ŋā poki tātou o te ꞌAtua. Ka ai atu ꞌina a tātou kai takeꞌa vave ꞌā pē hē te tātou huru pe muꞌa ka oho ena, a tātou e ꞌite rō ꞌana pē nei ē: ka tuꞌu haka ꞌou mai ena a Ietū Kiritō, te tātou huru pē ia ꞌā ꞌi te meꞌe era he takeꞌa iho mau e tātou i a ia. 3ꞌE taꞌatoꞌa nuꞌu tiaki ki te hoki iŋa mai o Ietū Kiritō, e haka tapa rō ꞌana mai roto i te hara, mo riro o rāua pē Ietū Kiritō, he taŋata hara kore.
4Kope nō era mo hara, e hape ꞌā ki te haka tere iŋa o te ꞌAtua; te hara, paꞌi, he hape ki te haka tere iŋa o te ꞌAtua. 5E ꞌite rō ꞌana e kōrua: a Ietū i oho mai ai ki te ao nei mo haka kore i te hara o te taŋata, ꞌe ko ꞌite takoꞌa ꞌana e kōrua: ꞌina ōꞌona hara. 6Te nuꞌu taꞌatoꞌa haka noho nō i a rāua ꞌi muri i a Ietū ꞌina he noho ꞌi roto i te hara. ꞌE te nuꞌu noho ꞌi roto i te hara, kai takeꞌa ꞌe kai māhani ꞌā i a ia.
7E te ŋā poki ꞌāꞌaku ē, e uꞌi kōrua ꞌo reo-reo rō atu: te kope aŋa i te meꞌe tī-tika, he taŋata tano ki te mata o te ꞌAtua, pē Ietū. 8ꞌE te kope aŋa i te meꞌe taꞌe tano ꞌa Rukifero. Mai te haꞌamata iŋa o te ao, paꞌi, a Rukifero e hara e oho mai ena. ꞌE te Poki o te ꞌAtua i oho mai ai mo te meꞌe mau nei ꞌā: mo haka kore i te meꞌe aŋa e Rukifero.
9ꞌIna e tahi poki parautiꞌa o te ꞌAtua noho ꞌi roto i te hara ꞌo te ai ꞌi roto i a ia te manaꞌu o te ꞌAtua; ꞌina he haŋa haka ꞌou mo hara ꞌi te ai ōꞌona o te ꞌAtua.
10E ꞌite rō ꞌana ko ai te ŋā poki o te ꞌAtua ꞌe ko ai te ŋā poki ꞌa Rukifero: te kope taꞌe aŋa i te meꞌe tano ꞌe taꞌe haŋa ki tōꞌona taina, taꞌe o te ꞌAtua.
He roŋo o te meꞌe ena he haŋa
11He roŋo nei te roŋo ŋaroꞌa e kōrua mai te hora haka moe era i te kōrua manaꞌu ꞌi ruŋa i a Ietū: e here tātou ki a tātou ꞌā. 12ꞌIna ko ai tātou pē ⌊Kāiŋa⌋. A ia ꞌa Rukifero, ꞌe i tiŋaꞌi i haka mate ai i tōꞌona taina. ¿ꞌO te aha i tiŋaꞌi ai i tōꞌona taina? ꞌO te ai te meꞌe aŋa o tōꞌona taina he meꞌe riva-riva ꞌe tāꞌana meꞌe aŋa he meꞌe taꞌe tano.
13E te taina, ꞌina kōrua ko huru kē ana maꞌu i te riri mo kōrua e te taŋata o te ao nei. 14E ꞌite nei ko eꞌa ꞌana a tātou mai roto i te mate ꞌe ko oꞌo ꞌā ki roto i te ora he here o tātou ki te tātou taina. Te kope taꞌe haŋa ki tōꞌona taina kai eꞌa ꞌana mai te mate. 15Te kope maꞌu i te riri mo tōꞌona taina he kope taparahi-taꞌata tiŋaꞌi taŋata, ꞌe a kōrua ko ꞌite ꞌā ꞌina e tahi kope tuꞌu pē rā mo ravaꞌa i te ora ꞌāpī ꞌina he hopeꞌa raꞌa.
16A tātou e ꞌite rō ꞌā he aha te meꞌe he haŋa ki te rua ꞌo te ai i vaꞌai rō a Ietū i a ia mo mate mo tātou. Pē ira takoꞌa ꞌā a tātou ana meꞌe mo te tātou taina. 17Kope nō era e ai rō ꞌā tōꞌona hauhaꞌa o te ao nei, ꞌe he takeꞌa i tōꞌona taina e ai rō ꞌana tāꞌana meꞌe hape ꞌe ꞌina he hāꞌūꞌū, ¿e ai mau rō ꞌana hō i a ia te haŋa o te ꞌAtua mo te rua?
18E te ŋā poki ꞌāꞌaku ē, ꞌina ko ai te tātou haŋa ki te rua hai haha nō; te tātou haŋa e haka takeꞌa hai meꞌe riva-riva aŋa e tātou. 19Pē ira ka ꞌite nei: o roto i te parautiꞌa a tātou, ꞌe ꞌina e tahi meꞌe mo haka haꞌamā i a tātou ꞌi muꞌa i te ꞌAtua. 20ꞌE mo haka ꞌite mai e te māhatu ko hape ꞌā a tātou, e manaꞌu: te ꞌAtua ꞌata nui-nui ki te tātou māhatu; e ꞌite rō ꞌana, paꞌi, i te meꞌe taꞌatoꞌa.
21E te taina, mo taꞌe haka ꞌite mai o te tātou māhatu e hape rō ꞌā a tātou, ꞌina ia he meꞌe mo haꞌamā o tātou ꞌi muꞌa i te ꞌAtua, 22ꞌe he vaꞌai mai e ia i te taꞌatoꞌa meꞌe o tātou mo no-noꞌi ꞌo te ai e haꞌatura rō ꞌana a tātou ki tāꞌana roŋo ꞌe e aŋa rō ꞌā i tāꞌana meꞌe haŋa. 23ꞌE te roŋo ꞌāꞌana: he haka moe i te tātou manaꞌu ꞌi ruŋa i tāꞌana Poki ko Ietū Kiritō ꞌe he haŋa a tātou ki te rua, pa he meꞌe haka ꞌite mai era e ia. 24Te nuꞌu haꞌatura ki tāꞌana roŋo, ꞌi roto i a ia e noho ena, ꞌe a ia ꞌi roto i rā nuꞌu. E ꞌite nei a tātou: ꞌi roto o tātou e noho ena hai ⌊Vārua Maitai⌋ vaꞌai mai era e ia.
اکنون انتخاب شده:
1 Iovani 3: rap
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2018, Wycliffe Bible Translators, Inc. All rights reserved.