1 Kōrinto 11
11
1E te taina, e haka tere kōrua pē au, pa he haka tere iŋa nei ōꞌoku i a au pa he ⌊Kiritō⌋.
ꞌI te hora e taka-taka ꞌā mo pure ki te ꞌAtua
2E koa rō ꞌana a au ꞌo te rava manaꞌu mai o kōrua ki a au ꞌe, takoꞌa, ꞌo te maꞌu ꞌo te oho nō o kōrua i te hāpī haka ꞌite atu era e au. 3E haŋa rō ꞌana a au mo aŋi-aŋi riva-riva e kōrua i te meꞌe nei: te Kiritō he pūꞌoko haka tere o te ŋāŋata, te ŋāŋata he pūꞌoko haka tere o te ŋā viꞌe, ꞌe te ꞌAtua he pūꞌoko haka tere o te Kiritō.
4Mo puꞌa o te taŋata i tōꞌona pūꞌoko ꞌi te hora pure ꞌo ꞌi te hora haka ꞌite i te roŋo vaꞌai ki a ia e te ꞌAtua, e taꞌe moꞌa ꞌana i te Kiritō. 5ꞌE te viꞌe, mo taꞌe puꞌa i tōꞌona pūꞌoko ꞌi te hora pure ꞌo ꞌi te hora haka ꞌite i te roŋo vaꞌai ki a ia e te ꞌAtua, e haka haꞌamā ꞌā i tāꞌana kenu pa he meꞌe: ko varu māreŋo ꞌana i te pūꞌoko. 6Mo taꞌe puꞌa o te viꞌe i tōꞌona pūꞌoko, i hau ꞌi te tano mo varu māreŋo i a ia. ꞌE mo manaꞌu o te viꞌe he meꞌe haꞌamā e tahi te varu i te pūꞌoko ꞌo te varu māreŋo i a ia, e puꞌa ia te pūꞌoko.
7Te taŋata ꞌina ko puꞌa i te rāua pūꞌoko. ꞌI ruŋa i a ia e takeꞌa ena te pūai ꞌe te nui-nui o te ꞌAtua. ꞌE te meꞌe takeꞌa mai te viꞌe he pūai ꞌe he hōnui o te taŋata. 8Te taŋata taꞌe mai te viꞌe i aŋa ai; he viꞌe te meꞌe i aŋa mai te taŋata. 9ꞌE te taŋata taꞌe mo hokorua o te viꞌe i aŋa ai; he viꞌe te meꞌe i aŋa mo hokorua o te taŋata. 10ꞌO ira te viꞌe e puꞌa i tōꞌona pūꞌoko hai kahu pa he tāpaꞌo mo takeꞌa ꞌātā e te merahi e haꞌatura rō ꞌā ki te kenu.
11ꞌI te haka tere iŋa o tātou o te nuꞌu ⌊haka moe i te manaꞌu⌋ ꞌi ruŋa i a Ietū, te taŋata ꞌe te viꞌe e ai ena mo hāꞌūꞌū ki a rāua, te viꞌe ki te taŋata ꞌe te taŋata ki te viꞌe. 12He parautiꞌa te meꞌe ena: te viꞌe raꞌe i aŋa ai mai te taŋata, ꞌe he parautiꞌa takoꞌa, te taŋata e poreko ena mai roto i te viꞌe. ꞌE te meꞌe taꞌatoꞌa mai te ꞌAtua e ai ena.
13E te taina, mo haka topa riva-riva i te manaꞌu he ꞌite e kōrua pē nei ē: e ko tano te ŋā viꞌe mo pure ki te ꞌAtua ꞌina he puꞌa i te rāua pūꞌoko. 14Ka manaꞌu kōrua: ki te tātou haka tere iŋa te haka roa-roa o te taŋata i tōꞌona rauꞌoho pa he viꞌe he meꞌe haꞌamā e tahi. 15ꞌE mo te viꞌe he meꞌe nehe-nehe e tahi te rauꞌoho ro-roa vaꞌai ki a ia e te ꞌAtua pa he meꞌe mo ꞌapi o tōꞌona pūꞌoko. 16Mo manaꞌu o te kope e tahi e hape rō ꞌana tāꞌaku meꞌe vānaŋa atu ena, he kī atu a au: he meꞌe nei te meꞌe hāpī e mātou e te ⌊ꞌāpōtoro⌋, ꞌe he meꞌe maꞌu e te nuꞌu haka moe i te manaꞌu ꞌi ruŋa i a Ietū ꞌi te kona taꞌatoꞌa.
Te kai haka manaꞌu ki te mate o Ietū
(Māteo 26.26-29; Marko 14.22-25; Ruka 22.14-20)
17Te meꞌe nei ꞌāꞌaku ka pāpaꞌi atu ena taꞌe mo koa o kōrua. I ꞌite ai a au e taka-taka ena kōrua mo haꞌamuri ki te ꞌAtua, he meꞌe rake-rake te meꞌe ai, taꞌe he meꞌe riva-riva. 18Te meꞌe ꞌāꞌaku i ŋaroꞌa: e taka-taka ena a kōrua, he tātake nō te aŋa ꞌe he haka topa-topa kē-kē, ꞌe ki tōꞌoku manaꞌu e ai rō ꞌā te parautiꞌa o te vānaŋa nei. 19¡E topa-topa kē-kē mau ꞌā pēaha kōrua ki takeꞌa ai ko ai te kope tano ki te mata o te ꞌAtua! 20E taka-taka ena, paꞌi, kōrua mo kai i te kai haka manaꞌu i te mate o te tātou Pūꞌoko Haka Tere, e hopeꞌa ena taꞌe toe mo manaꞌu ki a ia, 21ꞌi te meꞌe era ꞌi te hora o te kai, e ai rō ꞌā te nuꞌu kai raꞌe, ꞌina he tiaki ki te tētahi nuꞌu. Pē ira e ai ena te nuꞌu oho mai te kona taka-taka o kōrua e maruaki rō ꞌā, ꞌe tētahi e taꞌero rō ꞌana. 22¿Ka kī ꞌō ꞌina kōrua hare mo kai ꞌe mo unu ꞌi ira? ¿He aha kōrua e taꞌe moꞌa ena i te nūnaꞌa taŋata haka moe i te manaꞌu ꞌi ruŋa i a Ietū? ¿He aha e haka haꞌamā ena i te nuꞌu ꞌina rāua meꞌe? ¿He aha tāꞌaku meꞌe mo kī atu? ¿Ko koa ꞌana a au? ꞌIna a au kai koa.
23E te taina, te meꞌe nei ꞌāꞌaku ka kī atu ena mai te tātou Pūꞌoko Haka Tere mau ꞌā i ꞌite mai ai, ꞌe i haka ꞌite rō atu e au ki a kōrua: A Ietū, te tātou Pūꞌoko Haka Tere, ꞌi te pō hoꞌo mau era ꞌā i a ia, i toꞌo ai i te haraoa e tahi ki tōꞌona rima, 24ꞌe, ki oti te māuru-uru ki te ꞌAtua, he mo-more he kī: «Te meꞌe nei he hakari ōꞌoku ka mate ena mo te riva-riva o kōrua. E aŋa i te meꞌe nei pa he meꞌe mo manaꞌu ki a au». 25ꞌE pē ira takoꞌa ꞌana, i oti era te kai, he toꞌo i te hapaina vino ki tōꞌona rima ꞌe he kī: «Te meꞌe nei he toto ōꞌoku ka pariŋi ena mo kōrua, he tāpaꞌo o te ⌊haka tere iŋa ꞌāpī o te ꞌAtua ananake ko te taŋata⌋. E aŋa i te meꞌe nei pa he meꞌe mo manaꞌu ki a au». Pē ira i kī ai e Ietū. 26ꞌO ira, e te taina ē, ꞌina ko rehu: taꞌatoꞌa hora kai o kōrua i te haraoa ꞌe unu i te vino pa he meꞌe mo manaꞌu ki a ia, e haka ꞌite e oho ꞌā, ꞌātā ki te hoki iŋa mai o te tātou Pūꞌoko Haka Tere, o ruŋa i tōꞌona mate iŋa mo tātou.
Pē hē mau te kai haka manaꞌu ki te mate o Ietū
27Kope nō era mo kai i te haraoa ꞌe mo unu i te vino haka manaꞌu i te mate o te tātou Pūꞌoko Haka Tere ꞌe ꞌina he moꞌa ꞌe ꞌina he manaꞌu i te haꞌaauraꞌa parautiꞌa o rā meꞌe, e hara ꞌana ki te hakari ꞌe ki te toto mau era ꞌā o te tātou Pūꞌoko Haka Tere. 28ꞌO ira, ꞌi raꞌe ki te kai ꞌe ki te unu i rā meꞌe, e haka topa te manaꞌu hoki e tano mau rō ꞌana tuꞌu māhatu ki te ꞌAtua. 29ꞌE mo kai ꞌe mo unu tahaŋa nō ꞌina kai manaꞌu hia, e kimi ꞌana koe i toꞌu ūtuꞌa. 30ꞌO te aŋa i te meꞌe nei meꞌe rahi o kōrua ko māui-ui ꞌā, ko rehe-rehe ꞌana te hakari ꞌe tētahi ko mā-mate ꞌā. 31Mo haka topa riva-riva i te tātou manaꞌu ꞌi raꞌe ki te kai i rā kai, e ko haka ūtuꞌa mai e te ꞌAtua. 32ꞌE mo haka ūtuꞌa mai, he meꞌe mo aŋi-aŋi e tātou, ꞌo haka ūtuꞌa rō i a tātou ꞌi muri i te nuꞌu o te ao taꞌe haka moe i te manaꞌu ꞌi ruŋa i a ia.
33ꞌO ira, e te taina ōꞌoku ē, hora taka-taka o kōrua mo kai mo manaꞌu ki a Ietū, e tiaki ki te tētahi nuꞌu. 34ꞌE mo maruaki o te kope e tahi o roto i a kōrua, ka kai rō ꞌai ꞌi tōꞌona hare, ꞌo haka ūtuꞌa i a kōrua e te ꞌAtua, he taꞌe tano o te kōrua haka tere iŋa ꞌi te hora haka taka-taka mo manaꞌu i te mate o te tātou Pūꞌoko Haka Tere.
ꞌE te tētahi meꞌe ꞌui mai era e kōrua, ki tuꞌu atu a au ana haka ꞌite atu.
اکنون انتخاب شده:
1 Kōrinto 11: rap
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2018, Wycliffe Bible Translators, Inc. All rights reserved.