KORINTHTE II 9

1Ajiahchu misiangthoute diing a natohna lam thu chu na kawmva ka hung gelh a ngai sih hi; 2Bang jiahin ahiai i chih leh na lungsim kipeidante uh ka he a, hu thu ah, Akaia gam kipeihsa a, a umna kumkhat ahita chi'n Makedonia gam a mite kawmah ka hung suang a; huleh na phatuamngaihna un mi tampite a suthathou hi. 3Ahihvangin hichilam thu a nanguh ka hung suanna a thawn ahih louhna diingin unaute ka hung sawl hi; ka soi bangtah a kipeihsa a na um theihna diingun; 4Huchilou inchu Makedonia gam a mite ka kawm a hungin, nanguh kimansa louin hung mu tale uh, keiuh (nanguh ka hung chi sih uh) hi hung tahsanga ka hung suanna lam vah ka mualphoukha diing uhi. 5Hujiahin malai a na chiamsa uh silpiah chu, laahsah thoh hilou a, phaltaha pe zaw a, mansa diam a na koihna diingun, a hun ma in unaute chu na kawmva hung masa diing a hasot ngai in ka ngaihtuah hi.

Pathian kipaahpih thohlawm piahdan

6Hizongleh hichu ka soi ahi, A theh tawm in a aat tawm diing a, a theh tam in a aat tam diing hi. 7Mi chinin a lungtang a, a tup bang jel in pia heh; phal lou sasa a, ahihlouhleh piah louhtheihlouh a ngai a pe louin; ajiahchu Pathian in kipaahtaha petu chu a lungsiat hi. 8Huleh Pathian in hehpihna zousiah na tungvah ahung vuh thei hi; huchi'n nanguh bangchih laipouhin sil hoih zousiaha buchinga um zingin, natoh hoih chinteng na tong thei diing uhi. 9(A thehjah a; migentheite kawmah a pia a; a dihtatna chu kumtuang in a um zing hi, chih gelh bangin. 10Huleh a thehtupa kawma haichi petu in na neeh diinguh tanghou ahung pia a, na haichi theh uh a pungsah a, huleh na dihtatna gah uh zong a khang sah hi; ) 11Sil phal diing a bangkim a suhhauhsat a um in, huin chu keiuh jalin Pathian kawmah kipaahthu soina a umsah hi. 12Ajiahchu hi natohna in misiangthoute taahsap awng a huhsah chauh ahi sih a, Pathian kawma kipaahthu soina tampi in a luang let hi. 13Hi natohna apat Khrist tanchinpha nuai a na kituhluutna uleh, amah uleh midang zousiah kawma na silphal dan uh kilat jiahin amahun Pathian a paahtawi uhi. 14Huleh amahun zong nanguh diing a hung haamteisahna in, na tungva Pathian hehpihna loupitah jiahin nanguh ahung ngai mahmah uhi. 15A silthawnpiah soiseeng guallouh jiahin Pathian kawmah kipaahthu um heh.

اکنون انتخاب شده:

KORINTHTE II 9: SIMTBSI

های‌لایت

کپی

مقایسه

به اشتراک گذاشتن