撒迦利亞書 12
12
耶路撒冷會得救
1以下係上主所啟示有關以色列个話：
上主鋪開穹蒼，建立大地，賜生命給人類。佢講： 2「𠊎愛使耶路撒冷像一杯酒，它周圍个國家啉這杯酒後，會像酒醉个人捩來捩去。佢等包圍耶路撒冷个時節，也會圍攻猶大其他个城市。 3該日，𠊎愛使耶路撒冷像一垤大石牯，所有想愛擎起這垤石牯个國家會受重傷。世上所有个國家愛聯合起來攻打耶路撒冷。 4到該日，𠊎 — 上主愛使佢等一切个馬仔著驚，使騎馬个發癲。𠊎愛看顧猶大家，使列國所有个馬仔青盲。 5該時，猶大該兜族長心肚就會講：『耶路撒冷个人民倚靠上主 — 萬軍个元帥、佢等个上帝；這就成做𠊎等个力量。』
6「該日，𠊎愛使猶大該兜族長像樹林个火、禾稈堆底背个火把；佢等愛向左向右燒滅四圍个列國，總係耶路撒冷人還係安全住在城內。
7「𠊎 — 上主愛先使猶大軍隊得勝，俾大衛个後代㧯耶路撒冷个人民所得个光榮，毋會超過猶大。 8到該日，𠊎 — 上主愛保護耶路撒冷人；佢等當中盡軟弱个，也會像大衛恁堅強。大衛个後代會帶領佢等，像𠊎 — 上帝、像𠊎 — 上主个天使帶領佢等一樣。 9該日，𠊎愛消滅一切來攻擊耶路撒冷个外國人。」
傷心大噭
10「𠊎愛使大衛个後代㧯耶路撒冷人充滿憐憫㧯祈禱个靈。佢等愛仰望該被佢等刺死个，為佢傷心大噭，像喪掉獨生子个人一樣；佢等愛為佢噭到盡痛苦，像死長子个人一樣。 11該日，耶路撒冷會有人噭到非常悽慘，像人在米吉多平原為到哈達‧臨門#12:11 「為到哈達‧臨門」：可能指迦南㧯敘利亞个植物神巴力。逐年植物枯燥死掉个時，拜巴力个人認為它也死掉，所以為到它傷心大噭。這幾隻字另外抑係譯做「个哈達‧臨門」，指米吉多平原中一個地名。恁樣傷心大噭。 12該日，這地方每一個家族會傷心大噭：大衛家个男人在一個位所，女人在另外一個位所；拿單家个男人在一個位所，女人也在另外一個位所； 13利未家个男人在一個位所，女人也在另外一個位所；示每家个男人在一個位所，女人也在另外一個位所。 14其他所有个家族也係男人在一個位所，女人也在另外一個位所。」
اکنون انتخاب شده:
撒迦利亞書 12: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012