羅馬書 8
8
順從聖靈个生活
1這下，該兜生在基督耶穌生命底背个人就毋使受定罪了。 2因為聖靈个規則，就係使人同基督耶穌結連得到生命个，已經將你 #8:2 「你」另外有兜古卷係「𠊎」。對罪㧯死个法則之下釋放出來。 3因為肉體个軟弱，摩西个法律無法度成就个，上帝已經親自成就了。上帝差派自家个孻仔，使佢同𠊎等人類共樣有罪个肉體，為到愛定肉體底背个罪，將罪除掉。 4上帝恁樣行，係愛使法律个正當要求實現在𠊎這兜毋降服肉體，只有順從聖靈个人身上。 5因為，降服肉體个人心肝所想个就係肉體个事；順從聖靈个人心肝所想个就係聖靈所要求个事。 6心向等肉體，結果就係死；心向等聖靈，正會得到生命㧯平安。 7所以，心向等肉體个人就係同上帝作對；因為佢毋順從上帝个規則，事實上也做毋到。 8降服肉體个人，得毋到上帝个歡喜。
9論到你等，若係上帝个靈正經住在你等底背，你等个生活就毋會受肉體个支配，唯有受聖靈个管理。人無基督个靈，就毋係屬佢。 10總係，基督若住在你等底背，就算你等个身體會因為罪來死，上帝个靈也會使你等得到生命 #8:10 「上帝个靈也會使你等得到生命」抑係譯做「你等个靈會繼續生下去」。，因為上帝已經使你等成做義人了。 11上帝个靈使耶穌對死復活；這個靈若住在你等底背，恁樣，這個使基督對死復活个上帝，也會通過住在你等底背个聖靈，將生命賜給你等會死个身體。
12所以，兄弟姊妹啊，𠊎等个生活毋應該再被肉體支配了。 13你等若降服肉體，定著會滅亡；你等若靠聖靈治死罪惡个行為，的確會得到生命。 14被上帝个靈帶領个人，佢等就係上帝个子女。 15因為，上帝所賜个靈毋係愛使你等做奴隸來著驚；係愛使你等做上帝个子女。通過聖靈，𠊎等喊上帝：「阿爸！𠊎个爺！」 16上帝个靈㧯𠊎等个靈相共證明𠊎等係上帝个子女。 17既然係上帝个子女，𠊎等就有好享受上帝為佢个子民所預備个福氣，也愛同基督共下享受上帝為佢所保留个；因為，若係𠊎等分擔基督个苦難，𠊎等就有好分享佢个榮光。
將來个榮光
18𠊎想，𠊎等這下个苦難，同將來愛顯明給𠊎等个榮光來比，實在毋算麼介。 19一切受造个，攏總熱誠盼望上帝个眾子女顯明出來。 20因為歸個受造个變做虛空，毋係本身个意思，係上帝个旨意。總係，受造个還係在盼望， 21有一日會脫離敗壞个轄制，得到同上帝个子女分享光榮个自由。 22𠊎等知，直到這下，一切受造个全部在痛苦中緊噌，像生產前个陣痛。 23毋單淨受造个恁樣，𠊎這兜有聖靈做最先熟个果子个人，也係心肝歎息，等候上帝收養𠊎等做佢个子女，好使自家歸個人得到自由。 24𠊎等得救係因為盼望。𠊎等所盼望个，若係已經看到，還安到麼介盼望哪！麼人還盼望佢所看到个呢？ 25𠊎等若係盼望吂看到个，𠊎等就會忍耐來等。
26共樣，𠊎等个軟弱有聖靈幫助。𠊎等本來毋知愛樣般祈禱；總係，聖靈親自用講毋出个歎息來為𠊎等對上帝祈求。 27鑒察人心个上帝知聖靈个意思，因為聖靈照上帝个旨意，代聖徒祈求。
28𠊎等知，上帝同該兜敬愛佢个人，就係佢照自家个旨意所呼召个，共下工作，使萬事攏總有利益 #8:28 「上帝…利益」另外有兜古卷係「世間所發生个一切事情，對該兜敬愛上帝个人，就係上帝照自家个旨意呼召个該兜人，攏總有利益」。。 29因為上帝預先認識佢等，預先將佢等揀選出來，愛使佢等同佢个孻仔有共樣个特質，好俾佢个孻仔在多多兄弟姊妹中做長子。 30上帝所預先揀選个人，佢就呼召佢等；佢所呼召个人，佢就宣判佢等做義人；佢宣判做義人个，佢就俾佢等分享榮光。
耶穌顯明上帝个痛惜
31既然恁樣，𠊎等愛樣般講呢？上帝若在𠊎等這片，麼人能同𠊎等作對呢？ 32連自家个孻仔，佢也拌得犧牲，賜給𠊎等眾人。敢講佢毋會將萬物也白白賜給𠊎等嗎？ 33麼人會告上帝所揀選个人呢？上帝已經宣佈佢等無罪了！ 34恁樣，還有麼人會定佢等个罪呢？敢係過身个基督耶穌嗎？無可能！事實上，佢早就復活，這下坐在上帝个右片，在該位代𠊎等祈求！ 35既然恁樣，有麼人能使𠊎等同基督个痛惜隔絕呢？係患難嗎？係困苦嗎？係迫害嗎？係肚飢嗎？係窮苦嗎？係危險嗎？係刀劍嗎？ 36像聖經所講：
為到你个緣故，𠊎等歸日等死；
人看𠊎等像係愛㓾个羊。
37攏總毋係！在這一切事情頂高，𠊎等靠痛惜𠊎等个主已經穩贏了！ 38因為𠊎確信，無麼介能使𠊎等同上帝个痛惜隔絕：不管係死，抑係生；係天使，抑係其他在天頂掌權个；係這下个，抑係將來个； 39係在高天个，抑係在深淵个；抑係受造个宇宙中一切个東西。無麼介能使𠊎等同上帝个痛惜隔絕；佢个痛惜係通過𠊎等个主基督耶穌賜給𠊎等个。
اکنون انتخاب شده:
羅馬書 8: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012