羅馬書 12
12
服事上帝个生活
1所以，兄弟姊妹啊，既然上帝憐憫𠊎等，𠊎勸你等愛將自家準做生生个祭物獻給上帝，專心服事佢，來得到佢个歡喜。這係你等應該獻个，係真實个敬拜。 2毋好學這個世間，反轉愛俾上帝完全改變你等个心思意念，你等就會查明上帝个旨意，知麼介係良善个、係完美个、係佢所歡喜个。
3靠上帝給𠊎个恩賜，𠊎愛對你等逐個人講：毋好看自家忒高，反轉愛謙卑，逐儕照上帝所賜个信心來量自家个重輕。 4一個身體有好多个肢體，逐個肢體有無共樣个功能。 5像恁樣，雖然𠊎等係盡多人，𠊎等在基督个底背係一體个；身為佢身體个肢體，𠊎等係互相結連个。 6既然上帝賜𠊎等逐儕無共樣个恩賜，𠊎等就愛好好運用，來做應該做个事。上帝所賜个恩賜，若係講預言，就愛照信心个程度去講； 7若係服務，就愛去服務；若係教導，就愛去教人； 8若係勸勉，就愛去勸勉；若係救濟，就愛大方；若係做領袖，就愛認真打拚；若係憐憫人，就愛歡歡喜喜。
9惜別人愛真心。愛惱邪惡，親近良善。 10愛相親相愛，像惜兄弟姊妹一樣；愛誠心誠意來互相尊重。 11毋好懶尸，愛認真打拚，用火熱个心服事主。 12在盼望中愛歡歡喜喜；在患難中愛忍耐；祈禱愛迫切。 13愛同窮苦个兄弟姊妹分享你所有个；愛接待外鄉人。
14愛祝福迫害你个人；無毋著，愛祝福，毋好咒詛。 15愛同歡喜个人共下歡喜，同噭个人共下噭。 16無論對麼人，愛彼此同心。毋好驕傲，反轉愛就近卑微；也毋好恅到自家盡聰明。
17壞款待你个，你毋好壞款待佢；大家看做好个事，愛煞猛去做。 18愛用你全部个本事去㧯大家和好。 19朋友啊，毋好為自家報冤仇，等到上帝發譴个時，佢正代你伸冤較贏，因為聖經講：「主講：伸冤在𠊎；𠊎一定會報應。」 20聖經又講：「你个敵人若係肚飢，愛拿給佢食，嘴燥，愛拿給佢啉；你恁樣行，會使佢見笑到無葛無煞 #12:20 「使佢…無煞」原文直譯係「將火炭堆在佢个頭那頂高」。。」 21總講，毋好被壞贏走去；愛用好來贏過壞。
اکنون انتخاب شده:
羅馬書 12: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012