馬太 17
17
改變形像
(馬可 9:2-13；路加 9:28-36)
1六日以後，耶穌帶等彼得，㧯雅各、約翰兩兄弟，恬恬仔上一座高山。 2在佢等面前，耶穌个形像改變：佢个面發光像日頭，衫也像光恁白。 3忽然，三個學生看到摩西㧯以利亞在該位同耶穌講話。 4彼得對耶穌講：「主啊，𠊎等在這位盡好！你若係愛，𠊎在這位搭三間寮仔，一間給你，一間給摩西，一間給以利亞。」
5 彼得个話還吂講煞，有一垤燦爛个雲出現，遮等佢等。忽然有聲對雲中傳出來講：「這係𠊎所惜个孻仔，𠊎所歡喜个。你等愛聽從佢！」
6學生聽到這個聲，就伏落去，非常著驚。 7耶穌行過來，拍佢等，講：「䟘起來，毋使驚！」 8佢等昂頭一看，無看到別人，只有耶穌在該位。
9佢等下山个時，耶穌吩咐佢等講：「人子吂對死復活以前，千萬毋好將所看到个異象講給人聽。」
10學生問佢講：「經學教師樣會講，以利亞定著愛先來呢？」
11耶穌講：「有影，以利亞愛先來使萬事復原。 12總係𠊎㧯你等講，以利亞已經來了，可惜人毋認識佢，反轉隨心所愛來對待佢。共樣，人子也會受佢等个苦毒。」
13這時，學生正知耶穌所講个，係指施洗約翰。
醫好被鬼附身个細人仔
(馬可 9:14-29；路加 9:37-43)
14佢等轉到眾人該位个時，有一個人進前來，跪在耶穌面前， 15講：「主啊，求你可憐吾孻仔！佢發豬乸瘵，非常痛苦，常常跌落火底背抑係水中去。 16𠊎帶佢來見你个學生，總係佢等無辦法醫好佢。」
17耶穌應講：「你等這世代个人樣般恁無信心，恁腐敗！𠊎還愛在你等這位幾久呢？還愛忍耐你等幾久呢？將細人仔帶來𠊎這位！」 18然後，耶穌責備該鬼；鬼一出來，細人仔个病即時就好了。
19事後，學生暗中來問耶穌講：「𠊎等樣般無法度將該鬼逐出去呢？」
20耶穌應講：「因為你等个信心忒細。𠊎實在㧯你等講，你等个信心若係有一粒芥菜子恁大，就係對這座山講：『對這位徙到該位去！』它也會徙過去。無麼介事係你等做毋到个。」#17:20 有兜古卷加 21 節：「只有靠禁食㧯祈禱正逐得走這種个鬼，以外無別个辦法。」
耶穌再預言自家个死㧯復活
(馬可 9:30-32；路加 9:43-45)
22學生攏總聚集在加利利个時，耶穌對佢等講：「人子會被人交在人个手中； 23佢等會殺害佢，總係第三日佢會復活。」
學生聽到，非常憂愁。
納聖殿稅个問題
24耶穌㧯學生來到迦百農个時，有幾個收聖殿稅个人來見彼得，問佢講：「你等个先生毋係愛納聖殿稅嗎？」 25彼得講：「當然愛納。」
彼得入屋肚去个時，耶穌先問佢講：「西門，納關稅抑係人頭稅給這世間个君王个，係本國个公民抑係外國人？你想樣般？」
26 彼得講：「係外國人！」耶穌講：「既然係恁樣，本國个公民就毋使納稅。 27總係，𠊎等莫犯到這兜人。你去湖邊釣魚，將釣到个頭一尾魚仔捉來，打開魚嘴，你會看到一個銀幣；該錢就係你㧯𠊎兩儕愛納个聖殿稅，你就拿去給佢等。」
اکنون انتخاب شده:
馬太 17: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012
