約翰 9
9
醫好出世就瞙目个人
1耶穌在路上看到一個出世就瞙目个人。 2厥學生問佢講：「先生，這個人出世就瞙目，係麼人个罪造成个？係佢自家个罪，抑係厥爺𡟓个罪呢？」
3耶穌應講：「佢个瞙目㧯自家抑係爺𡟓个罪攏總無關係，係愛在厥身上彰顯上帝个作為。 4日時頭，𠊎等應當愛做該『差𠊎來个』个工作；暗晡時一到，就無人能工作。 5𠊎在世間个時，就係世間个光。」
6講這個話以後，耶穌呸口潾在地上，用口潾攪泥，膏瞙目个目珠， 7㧯佢講：「你去西羅亞个水池洗。」 (西羅亞个意思係「奉差派」。) 佢就去洗，倒轉來个時，已經看得到了。
8佢个鄰舍㧯該兜常常看到佢討食个人講：「這個人毋係平常坐在這位討食个嗎？」
9有兜講：「就係佢！」也有兜講：「毋係佢，㧯佢相像定定。」
該人自家講：「係𠊎。」
10佢等問佢講：「若目珠樣般看得到呢？」
11佢應講：「有一個名安到耶穌个，用湳泥膏𠊎个目珠，㧯𠊎講：『你去西羅亞个水池洗。』𠊎就去，一洗就看得到。」
12佢等問講：「該人在㖠位？」
佢應講：「𠊎毋知。」
法利賽人追究瞙目个事
13佢等帶該頭擺瞙目个人去見法利賽人。 14耶穌攪泥醫好厥目珠，該日係安息日。 15法利賽人又查問該人係樣般看得到个。佢㧯佢等講：「佢用湳泥膏𠊎个目珠，𠊎一洗就看得到。」
16有兜法利賽人講：「做這個事个人無可能係對上帝該位來个，因為佢無遵守安息日个規定。」
另外有兜人講：「有罪个人樣會行恁樣个神蹟呢？」佢等中間就發生紛爭。
17所以，該兜法利賽人又問瞙目个人講：「既然佢醫好若目珠，你講佢係樣般个人？」
佢應講：「佢係一個先知。」
18該兜猶太人个領袖毋肯信佢頭擺係瞙目个，這下已經看得到；等到將佢个爺𡟓尋來， 19佢等就問講：「這係若孻仔麼？你等毋係講佢一出世就瞙目嗎？恁樣，這下樣會看得到呢？」
20佢个爺𡟓應講：「佢係𠊎等个孻仔，𠊎等也知佢一出世就瞙目。 21佢這下樣般看得到，係麼人醫好厥目珠，𠊎等就毋知。佢已經大了，你等去問佢，佢自家會講！」 22佢个爺𡟓恁樣講，係因為驚猶太人个領袖；當時猶太人个領袖已經講好，假使有人承認耶穌係基督，就愛將佢逐出會堂。 23所以佢个爺𡟓應講：「佢已經大了，你等去問佢！」
24佢等再一擺將該出世就瞙目个人喊來，對佢講：「在上帝个面前，你一定愛講實話！𠊎等知該隻人係一個罪人。」
25佢應講：「佢係毋係罪人，𠊎毋知；總係𠊎知一項事：𠊎本來係瞙目个，這下看得到！」
26佢等問講：「佢對你做麼介？佢樣般醫好若目珠？」
27佢應講：「𠊎㧯你等講過，你等毋愛聽。做麼介這下又愛聽呢？敢講你等也想愛做厥學生係麼？」
28佢等就罵佢講：「你正係該隻人个學生！𠊎等係摩西个學生！ 29𠊎等知上帝識㧯摩西講過話；總係該隻人，𠊎等根本毋知佢係對㖠位來个！」
30佢應講：「這就奇怪了！佢醫好𠊎个目珠，總係你等毋知佢係對㖠位來个！ 31𠊎等知上帝毋愛聽罪人个祈求；佢只有聽該敬拜佢、並實行佢旨意个人。 32創造世界以來，出世就瞙目个，吂識聽過有人醫好厥目珠。 33這個人若毋係對上帝來个，佢麼介都無法度做。」
34佢等責備佢講：「你這出世在罪惡中个東西，樣般敢教訓𠊎等！」佢等就將佢逐出會堂。
靈性个瞙目
35耶穌聽講佢等將佢逐出會堂个事，就尋到佢，問佢講：「你信人子麼？」
36佢應講：「先生，請㧯𠊎講麼人係人子，𠊎就信佢！」
37耶穌㧯佢講：「你已經看到佢，這下㧯你講話个就係佢。」
38佢講：「主啊，𠊎信！」就拜耶穌。
39耶穌講：「𠊎來世間个目的係愛審判，俾瞙目个看得到，看得到个反轉變做瞙目。」
40在厥身邊，有兜法利賽人聽到這個話，就問佢講：「敢講你將𠊎等也看做瞙目个係麼？」
41耶穌應講：「你等若係瞙目个，你等就無罪；這下你等講『𠊎等看得到』，恁樣，你等還係在罪中。」
اکنون انتخاب شده:
約翰 9: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012
