何西阿書 2
2
1所以，以色列人啊，你等愛向自家个兄弟講：「你等係上帝个子民」；向姊妹講：「你等係上主所痛惜个。」
無守貞節个歌蜜 — 無忠實个以色列
2愛㧯你等个阿姆辯論，因為姖已經毋係𠊎个𡜵娘，𠊎也毋係厥老公。愛勸姖除掉滿面个淫亂，毋好再顯出胸脯去引誘人。 3若係姖毋聽，𠊎愛脫掉姖个衫褲，使姖赤身露體，像正出世該時共樣。𠊎愛使姖像曠野，像沙漠，使姖嘴燥到死。 4𠊎無愛惜姖个子女，因為佢等係淫婦𫱔个。 5佢等个阿姆犯姦淫，係毋知見笑个妓女 #2:4-5 「係淫婦𫱔个…見笑个妓女」抑係譯做「像佢等个阿姆，像該妓女共樣毋知見笑」。。姖㘙㘙唸唸講：「𠊎愛去靠該兜情郎；因為𠊎个食物、水、羊毛、布料、橄欖油㧯酒全部係佢等給𠊎个。」
6所以，𠊎愛用竻仔做籬笆塞等姖个路；𠊎愛做圍牆，使姖連細路也尋毋到。 7姖想愛㧯契哥偷走，總係逐毋到佢等；姖逐所在去尋，總係尋毋到。所以姖講：「𠊎還係轉到原旦个老公該位去！以前㧯佢共下个光景比這下較好！」
8姖毋承認給姖五榖、新酒㧯橄欖油个係𠊎；其實連姖獻給巴力神明个金銀也係𠊎大方給姖个。 9所以，到收割个時，𠊎愛拿轉𠊎給姖个五榖，到做酒个時節，𠊎愛收轉𠊎給姖个新酒；𠊎也愛搶轉𠊎給姖遮膚身个羊毛㧯布料。 10𠊎愛在姖該兜契哥面前將姖个衫褲脫淨淨；無人做得對𠊎手中將姖救走。 11𠊎愛停掉姖所有个歡樂，禁止姖个年節、月初、安息日，㧯一切个宗教大會。 12𠊎愛敗壞姖个葡萄樹㧯無花果樹，因為姖講：「這兜係𠊎該兜情郎賞給𠊎个。」𠊎愛使姖个果園成做荒林；野獸愛來食該兜果子。 13𠊎愛判姖；因為姖在節日向該兜巴力燒香，用耳環㧯珠寶來打扮，跈契哥走，卻將𠊎毋記得。𠊎 — 上主恁樣宣佈了。
上主痛惜佢个子民
14看啊，𠊎愛帶姖到曠野，安慰姖，好嘴勸姖。 15𠊎愛將葡萄園還姖，使「災難山壢」成做「希望門」；在該位，姖會聽𠊎个話，像姖後生離開埃及个時共樣。 16該時，姖會承認𠊎 — 上主做姖个老公，無再將𠊎喊做巴力#2:16 「巴力」：迦南人神明个名，意思係「主」抑係「主人」；另外一個意思係「老公」。。 17𠊎愛喊姖將該兜巴力放毋記得，絕對做毋得再提起它兜个名。
18該時，𠊎愛㧯飛禽、走獸、爬蟲立約，喊牠兜毋好傷害𠊎个子民。𠊎愛毀滅弓箭、刀劍，停止戰爭，俾𠊎个子民享受太平。
19 以色列啊，𠊎愛討你永遠做𠊎个𡜵娘。
𠊎愛用公義、公平、慈愛㧯憐憫做聘金來討你。
20𠊎也愛用誠實來討你；
你就會正經認識𠊎 — 上主。
21-22該時，𠊎愛聽𠊎子民以色列#2:21-22 「以色列」：希伯來文直譯係「耶斯列」，參考 1:4，11。个祈禱；
𠊎愛喊天降甘露滋潤大地，
地就會出產五榖、新酒㧯橄欖油。
23𠊎愛將𠊎个子民種在這垤土地；
𠊎愛對「無受到憐憫」个施行憐憫；
𠊎愛對「毋係𠊎子民」个講：「你等係𠊎个子民」。
佢等定著會講：「你係𠊎等个上帝。」
اکنون انتخاب شده:
何西阿書 2: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012