創世記 43
43
約瑟个阿哥帶便雅憫到埃及
1 迦南地區个飢荒越來越嚴重。 2雅各一家人已經將對埃及糴轉來个糧食全部食掉了。雅各就對該兜孻仔講：「你等再去糴兜糧食轉來。」
3 猶大對阿爸講：「該儕人盡嚴警告𠊎等，若無帶滿老弟共下去，就毋使想去見佢个面。 4若係你肯俾滿老弟㧯𠊎等共下去，𠊎等就去代你糴糧； 5你若毋肯俾佢去，𠊎等就無愛去，因為該人講過，𠊎等若無帶滿老弟共下去，就毋使想去見佢个面。」
6 以色列講：「你等做麼介恁樣害𠊎呢？樣使㧯該人講你等還有一個老弟呢？」
7佢等應講：「該人特別詳細查問𠊎等㧯屋下个情況，講：『你等个阿爸還在麼？還有其他个兄弟麼？』𠊎等無法度毋回答佢个問題；𠊎等樣般會知佢愛𠊎等帶滿老弟去呢？」
8 猶大對厥爸以色列講：「將細人仔交給𠊎，𠊎等黏時出門，恁樣全家大細就毋會餓死。 9𠊎自家來擔保，𠊎願負全部个責任。若係𠊎無將佢平安帶轉來交還你，𠊎甘願永遠承擔這個罪。 10若毋係𠊎等拖拖挷挷，𠊎等已經去兩擺轉來了！」
11佢等个阿爸以色列講：「既然恁樣，你等就帶兜乳香、蜂糖、香料、沒藥、開心果㧯杏仁這兜本地个特產，做禮物送給該儕人。 12你等也愛帶兩倍个錢去，將上擺袋肚發現个錢銀送還佢；該可能係有人放毋著。 13帶等滿老弟，黏時倒轉去埃及見該人。 14願全能个上帝使該人憐憫你等，俾便雅憫㧯你等另外一個兄弟平安轉來。論到𠊎，若係定著愛喪掉孻仔，喪掉就算了！」
15佢等就帶等禮物、兩倍个錢，㧯便雅憫出發，去到埃及，企在約瑟个面前。 16約瑟看到便雅憫㧯佢等共下來，就對管家講：「帶這兜人轉吾屋下去；當晝𠊎愛㧯佢等共下食飯。去㓾一隻頭牲，準備筵席。」 17管家照命令將佢等帶到約瑟个屋下。
18佢等因為被人帶到約瑟个屋下，就當著驚，心肚想：「一定係為到上擺放轉𠊎等袋肚該兜錢，𠊎等正會被人帶到這位來。無一定佢等係想愛攻擊𠊎等，害𠊎等，搶走𠊎等个驢仔，強迫𠊎等做奴才。」 19因為恁樣，佢等一到約瑟屋下門口，就對管家講： 20「先生啊！請聽𠊎等講；𠊎等上擺係為到糴糧到這位來个。 21𠊎等轉去，半路過夜个時，打開袋仔，發現逐儕自家个錢全部還在袋肚；這下𠊎等將該兜錢帶轉來還你。 22𠊎等另外又帶錢來糴糧；上擺毋知麼人將錢放轉𠊎等个袋肚？」
23管家講：「放心，毋使驚，一定係你等个上帝，你等阿爸个上帝，將財寶放在你等个袋肚；你等个錢𠊎早就收起來了！」接等佢將西緬帶出來交還佢等。
24管家帶佢等入約瑟个屋肚，㨮水給佢等洗腳，又餵佢等个驢仔。 25佢等將禮物準備好勢，愛等當晝約瑟轉來个時送給佢，因為佢等得到通知愛㧯約瑟共下食晝。 26約瑟轉屋下个時，佢等將禮物帶入來獻給佢、跪佢。 27約瑟問佢等有平安麼？又問：「你等識講過年老个阿爸，佢老人家平安麼？還健麼？」
28佢等應講：「你个僕人𠊎等个阿爸還盡健。」接等佢等又跪佢。
29 約瑟看到自家共𡟓个老弟便雅憫，就講：「這位就係你等講過个滿老弟係麼？」又講：「後生仔！願上帝賜福給你！」 30約瑟看到自家个親老弟，激動到會忍毋住，就遽遽離開、閃入自家个間肚去噭。 31佢洗過面正出來，強強忍等，命令開桌食飯。 32佢等為約瑟擺一桌，佢个兄弟另外一桌，共下食个埃及人又另外一桌，因為埃及人認為㧯希伯來人共桌食飯盡無體面。 33約瑟使佢个兄弟在厥面前坐席，攏照大細个順序坐等。恁樣个安排使兄弟感覺當奇怪，彼此緊看。 34約瑟將佢該桌个菜分給佢該兜兄弟；便雅憫分到个係別人个五倍。佢等㧯約瑟共下啉食，非常快樂。
اکنون انتخاب شده:
創世記 43: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012