以西結書 46
46
君王㧯節期
1至高个上主恁樣講：「在一禮拜工作个六日中，內院東門一定愛關等。總係在安息日㧯初一，東門愛打開來。 2祭司為君王獻燒化祭抑係平安祭个時，君王愛對這門个走廊入來，企在門柱堘頭。佢愛在該位禮拜，禮拜後就出去。這隻門愛一直打開來，臨暗仔以前做毋得關掉。 3逐個安息日㧯初一，全國人民全部愛在這門前敬拜上主。 4在安息日，君王愛向上主獻無缺點个細羊牯六隻、綿羊牯一隻做燒化祭。 5該隻綿羊牯愛㧯十七公升半个素祭共下獻；該兜細羊牯所配合个素祭做得隨君王个意思獻。十七公升半个素祭愛㧯三公升个橄欖油共下獻。 6初一，佢愛獻無缺點个細牛牯一隻、細羊牯六隻、綿羊牯一隻。 7該隻牛牯、該隻綿羊牯全部愛㧯十七公升半个素祭共下獻；該兜細羊牯所配合个素祭做得隨君王个意思獻。十七公升半个素祭愛㧯三公升个橄欖油共下獻。 8王愛對這門个走廊出入。
9「無論㖠隻節期，人民來敬拜上主个時，對北門入去个，愛對南門出來；對南門入去个，愛對北門出來。麼人都做毋得對共隻門出入，一定愛對相對該隻門出去。 10人民入來个時，王也愛入來；人民出去个時，王也愛出去。 11在節期㧯大會个日，逐擺獻一隻牛牯，逐擺獻一隻綿羊牯，全部愛㧯十七公升半个素祭共下獻。逐隻細羊牯所配合个素祭做得隨獻祭个人个意思獻。十七公升半个素祭愛㧯三公升个橄欖油共下獻。
12「在王用燒化祭抑係平安祭向上主獻甘心祭个時，愛為佢打開通向內院个東門。佢愛照安息日个條例獻燒化祭㧯平安祭。佢離開以後，門愛關起來。」
逐日愛獻个祭
13上主講：「逐朝晨愛獻一隻無缺點一歲个細羊牯做燒化祭給上主。逐日都愛獻這種祭。 14逐朝晨也愛獻三公升麵粉㧯一公升橄欖油做素祭；油係摻在麵粉肚用个。獻素祭給上主係永久个條例。 15逐朝晨愛獻細羊牯、麵粉、㧯橄欖油給上主做燒化祭，做毋得停。」
王㧯土地
16至高个上主恁樣講：「若係君王將自家个土地賜給王子，該垤地就歸屬王子，永遠做佢个產業。 17若係君王將自家个土地賜給佢个官員，該垤地係暫時歸屬官員定定，到『自由年 #46:17 「自由年」就係「禧年」，參考利未記 25:10 。』，官員愛將該垤地還君王。因為這係王族个產業，只有王子正做得承接這土地。 18君王做毋得侵佔人民个產業。佢一定愛對王族个產業分土地給王子；做毋得欺負人民、侵佔𠊎子民个土地、迫佢等離開自家个產業。」
聖殿个灶下
19後來，該人帶𠊎過接近內院北門个通路 #46:19 「過接近內院北門个通路」參考 42:4 。，到向北該兜房間个門口；屋底背个房間係聖个，係給祭司用个。佢指這兜房間西片个一個所在俾𠊎看。 20佢講：「這所在係給祭司煮贖罪祭㧯贖過失祭个肉用个，也係焙素祭用个。恁樣，佢等就毋使將聖物帶到外院，傷害到人民。」
21-22接等，佢帶𠊎到外院，指給𠊎看外院个四隻角頭，逐隻角頭全部有細庭院，長二十公尺，闊十五公尺。 23逐隻庭院全部有石牆，石牆下有灶頭。 24該人㧯𠊎講：「這兜所在係灶下。聖殿个工作人員在這位煮人民所獻个祭物。」
اکنون انتخاب شده:
以西結書 46: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012