出埃及記 3
3
上帝呼召摩西
1 摩西為佢个丈人老米甸祭司葉特羅掌羊；有一日，佢將羊群帶過沙漠，去到上帝个山，就係何烈山。 2在該位，上主个天使對竻藪个火焰中向摩西顯現。摩西看到竻仔𤏸火，總係無燒掉。 3佢想：「樣恁奇怪，竻仔樣毋會燒掉呢？𠊎愛過去看這個大異象。」
4主上帝看到摩西行前來，就對竻藪中喊佢：「摩西！摩西！」
摩西應講：「𠊎在這位！」
5上帝講：「做毋得再行前來。脫掉你个鞋，因為你所企个地方係聖地。」 6佢又講：「𠊎係若祖先个上帝，係亞伯拉罕个上帝，以撒个上帝，雅各个上帝。」摩西遮等面，毋敢看上帝。
7上主講：「𠊎已經看到𠊎个子民在埃及受苦；𠊎已經聽到佢等受監工管轄、發出个哀求。佢等个痛苦，𠊎攏總知。 8所以𠊎下來，愛對埃及人手中將佢等救出來，𢱋佢等到盡肥、又闊又大、流乳㧯蜜个地方去：該所在係迦南人、赫人、亞摩利人、比利洗人、希未人㧯耶布斯人住个地方。 9𠊎確實聽到以色列人哀求个聲，也看到埃及人樣般欺負佢等。 10這下𠊎愛派你去埃及王該位，將吾子民以色列人對埃及𢱋出來。」
11總係摩西對上帝講：「𠊎算麼介？𠊎樣做得去埃及王該位，將以色列人對埃及𢱋出來呢？」
12上帝應講：「𠊎愛㧯你共下。你𢱋吾子民出埃及以後，你等愛在這山頂敬拜𠊎；這就係𠊎派你去个證據。」
13 摩西對上帝講：「當𠊎去㧯以色列人講：『你等祖先个上帝派𠊎到你等這位來』，佢等會問：『佢安到麼介名？』該時𠊎愛樣般㧯佢等講呢？」
14上帝對摩西講：「𠊎係自有永有个 #3:14 「𠊎係自有永有个」㧯希伯來話神名「耶和華」个發音相近；「耶和華」在本譯本譯做「上主」。。你去㧯以色列人講：『該自有永有个派𠊎到你等這位來。』」 15上帝又對摩西講：「你愛對以色列人恁樣講：『上主 — 你等祖先个上帝，就係亞伯拉罕个上帝，以撒个上帝，雅各个上帝，派𠊎到你等這位來。』𠊎个名永遠安到上主，世世代代全部愛恁樣紀念𠊎。 16你去召集以色列人个長老，㧯佢等講：『上主 — 你等祖先个上帝，就係亞伯拉罕、以撒、雅各个上帝，識向𠊎顯現，講：𠊎實在看顧你等，𠊎已經看到埃及人樣般欺負你等。 17𠊎決定愛𢱋你等出埃及。你等已經受盡困苦；𠊎愛帶你等到流乳㧯蜜、盡肥个土地，就係迦南人、赫人、亞摩利人、比利洗人、希未人㧯耶布斯人住个地方。』
18「𠊎个子民會聽你个話。然後你愛帶以色列該兜長老去見埃及王，對佢講：『上主 — 希伯來人个上帝識向𠊎等顯現。這下請你准𠊎等行三日个路，到曠野去向上主 — 𠊎等个上帝獻祭。』 19𠊎知，若毋係𠊎迫佢，埃及王就毋會放你等走。 20總係𠊎愛用𠊎大能个手行各樣个神蹟來刑罰埃及。到最尾埃及王就會放你等走。
21「𠊎愛在埃及人个面前施恩給𠊎个子民；所以，你等離開該位个時，你等毋會空手走。 22以色列个婦女逐儕愛到隔壁个屋下去，對埃及㧯外族个婦女討金銀㧯衫褲。你等愛將這兜東西給子女掛在身上；恁樣你等就將埃及人个財富搶走。」
اکنون انتخاب شده:
出埃及記 3: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012