出埃及記 23
23
正義㧯公當
1「做毋得傳謠言；做毋得㧯壞人連手做假見證。 2做毋得跈眾人做壞事；在打官司个事上做毋得跈眾人冤枉正直； 3窮苦人打官司个時也做毋得偏心保護佢。
4「若係你堵到仇敵个牛抑係驢迷路，愛牽轉去交還佢。 5若係仇敵个驢揹忒重跌倒，愛幫助佢將驢扶起來，做毋得閃開。
6「窮苦人打官司个時，你做毋得冤枉正直。 7做毋得用無影無跡个事來告人；做毋得判正直無罪个人死刑；因為𠊎一定愛責罰做這種壞事个人。 8做毋得被人个紅包收買；因為收紅包會使人青盲，又會曲解義人个話。
9「做毋得欺負對外地來个旅客；因為你等識在埃及做過旅客，經驗過做旅客个滋味。」
第七年㧯第七日
10「六年中你愛耕種田地，收成產物； 11總係在第七年，你愛俾土地歇睏，做毋得耕種。愛俾窮苦人食該兜產物，賸下个給野獸食。你个葡萄園㧯橄欖園也愛照樣辦理。
12「一禮拜六日做事，總係第七日做毋得做事，好俾你个牛、驢休息，並使你个奴才㧯暫住个旅客全部有好來回復元氣。
13「𠊎 — 上主對你等講過个話，你等愛認真遵守。做毋得向其他个神明祈禱，連佢等个名也做毋得提到。」
三大節期
(出埃及記 34:18-26；申命記 16:1-17)
14「逐年愛為𠊎守三大節期。 15愛在亞筆月，就係你離開埃及該隻月，照𠊎所吩咐个守除酵節。在節期个七日中，愛食無酵餅。
「做毋得空手來敬拜𠊎。
16「你愛在開始收成農產物个時守收割節。
「你愛在秋季摘果子个時守收藏節。
17「逐年堵到這三大節期，你屋下所有个男人全部愛來敬拜𠊎 — 至高个上主。
18「你獻牲祭个時，做毋得拿牲祭个血㧯有酵个餅共下獻。節期所獻牲祭个油，做毋得留到第二朝晨。
19「逐年愛將你所收成最好个新出農產物帶到上主 — 你上帝个聖殿。
「做毋得用羊乸个乳來煮細羊仔。」
應許㧯指示
20「𠊎愛派天使在你路途中保護你，𢱋你到𠊎為你預備个地方去。 21你愛謹慎聽從佢，做毋得悖逆佢；若無，佢一定毋會赦免你等个過犯，因為係𠊎差派佢去个。 22若係你聽從佢，遵守𠊎所有个命令，𠊎就做你仇敵个仇敵，做迫害你个人个敵人。 23𠊎个天使會行在你頭前，𢱋你進入亞摩利人、赫人、比利洗人、迦南人、希未人、耶布斯人該位去；𠊎愛消滅佢等。 24做毋得跪拜佢等个神明，也做毋得服事它兜；做毋得跈佢等个宗教。愛消滅佢等个神像，打碎佢等敬拜个柱像。 25你等愛敬拜𠊎 — 上主、你等个上帝，𠊎就賜食物㧯水給你，又愛除掉你所有个病痛。 26在你國內毋會有落胎抑係毋會𫱔个細妹仔。𠊎愛賜給你長壽。
27「𠊎愛使該兜抵抗你个人驚𠊎，使㧯你相㓾个人著驚；所有个對敵全部會在你面前轉身逃走。 28𠊎愛派大黃蜂 #23:28 「大黃蜂」抑係「大災難」。在你頭前逐走希未人、迦南人㧯赫人。 29總係𠊎無愛在一年內逐出佢等，免得土地荒廢，增加多多个野獸來害你等。 30𠊎會漸漸逐走佢等，直到你等人數增加，做得承受該土地。 31𠊎愛為你定邊界，對紅海到幼發拉底河；對地中海到沙漠地帶。𠊎愛將該地方个人交在你个手中；你前進个時，愛逐走佢等。 32做毋得㧯佢等抑係佢等个神明立約。 33做毋得俾佢等住在你个國內，驚怕佢等會害你得罪𠊎。若係你跪拜佢等个神明，這會成做害死你个陷阱。」
اکنون انتخاب شده:
出埃及記 23: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012