但以理書 8
8
看到綿羊牯㧯山羊牯
1 伯沙撒王在位个第三年，𠊎 — 但以理看到第二隻異象 #8:1 對這位到 12:13 原文係恢復用希伯來文寫个 (看 2:4)。。 2在異象中，𠊎忽然發現自家在以攔省个京城書珊。𠊎企在烏萊河壩滣， 3看到一隻綿羊牯企在該位，牠有兩支長角，總係長短無共樣，較長个角係較慢生出來个。 4𠊎看到綿羊牯用角向西片、北片、南片鬥過去；所有个動物全部無法度抵抗牠，也無法度閃開牠个威力。牠歡喜樣般做就樣般做，越來越強大。
5𠊎當想該係麼介意思个時，忽然看到一隻山羊牯對西片走過來，行過全地，遽到像腳無貼地。牠兩隻目珠中間生一支盡惹目个角。 6牠向𠊎頭下看到該隻企在河壩滣兩支角个綿羊牯發譴撞等過去。 7𠊎看到牠攻擊綿羊牯，發譴來撞牠，撞斷綿羊牯个兩支角。綿羊牯無力好抵抗，橫在地上，受蹂踏，無人能救綿羊牯脫離牠个手。
8該山羊牯緊自高自大；總係當牠个權力達到最強个時，牠个角斷掉。在原來个所在另外生出四支盡惹目个角，指向天个四方。 9對這四支角中間个一支角又生出一支細角；這細角向南片、東片、㧯該當靚个地 #8:9 「該當靚个地」指以色列。擴張勢力。 10牠个力量強大到能攻擊天軍㧯星辰，將有兜天軍㧯星辰㧹到地上，並蹂踏它兜。 11牠甚至公然對抗天軍个元帥，逐日阻擋人向佢獻祭，又毀壞佢个聖殿。 12牠迫人民在該位犯罪，逐日獻無應該獻个祭 #8:12 「牠迫人民…祭」抑係譯做「牠派來个軍隊在該位犯罪，毋準人獻逐日愛獻个祭」 (參考 11:31)，希伯來文个意思無清楚。，將真理㧒落在地上。這細角一切个所做全部順利。
13接等，𠊎聽到一個天使問另外一個天使：「在異象中出現个這兜事愛繼續幾久呢？逐日應該獻个祭，換做該得人惱个罪惡愛到幾久呢？天軍㧯聖殿被牠蹂踏愛到幾時呢？#8:13 「逐日…愛到幾時呢？」希伯來文个意思無清楚。」
14佢應講 #8:14 「佢應講」係照一兜古譯本，希伯來文係「佢對𠊎講」。：「這兜事愛繼續兩千三百個暗晡㧯朝晨 #8:14 「兩千三百個暗晡㧯朝晨」可以算做「兩千三百日」抑係「一千一百五十日」 (參考 7:25)。，聖殿正會恢復淨浰。」
天使加百列解釋異象
15𠊎 — 但以理當想愛了解這異象到底係麼介意思，忽然間有一個外貌像人个企在𠊎个面前。 16𠊎聽到對烏萊河有人聲喊講：「加百列啊，㧯這個人講這異象个意思！」 17加百列行到𠊎塍頭；𠊎當驚，就伏在地上。
佢對𠊎講：「人子啊，你愛了解這異象。這異象係有關歷史个結局。」 18佢講話个時，𠊎伏在地上，毋知人事。總係佢將𠊎扶起來， 19對𠊎講：「𠊎愛指示你上帝个發譴到最尾會樣般；這異象係有關佢所定个結局。
20「你所看到該有兩支角个綿羊牯係指米底亞㧯波斯帝國。 21山羊牯係指希臘帝國，牠兩隻目珠中間該支盡惹目个角係指第一個王。 22該支角拗斷以後正生出來个四支角係指這帝國愛分做四個王國，總係它兜个力量無法度㧯原來个帝國比。
23「這兜王國个末期，罪惡當滿个時，有一個兇惡、詭詐个王會出現。 24佢个勢力越來越大，總係毋係靠自家个能力。佢愛造成極大个毀滅；佢所做个一定成功。佢愛消滅該兜當強又當有力个人㧯上帝个聖民。 25因為佢搞怪，佢个詭計項項成功。佢自高自大，在人無提防个時忽然間出手，消滅盡多人。佢甚至公開㧯萬王之王做對敵，總係佢最尾會被超過人个力量消滅。 26有關暗晡㧯朝晨个異象 #8:26 「暗晡㧯朝晨个異象」參考 8:14。已經向你解釋了。這異象一定會實現；總係你這下愛保守祕密，因為它係指遠遠个日仔講个。」
27𠊎 — 但以理心肚當操煩，病倒幾日。以後𠊎䟘起來，轉到工作所在，辦理王指派給𠊎个事務；總係𠊎被這個異象摝到無葛無煞，毋明白其中个意思。
اکنون انتخاب شده:
但以理書 8: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012