但以理書 4
4
尼布甲尼撒第二隻夢
1 尼布甲尼撒王向世界逐國、逐族、講逐種話个人發出下背个通知：
「願你等大享平安！ 2𠊎願意將至高上帝向𠊎顯明个神蹟奇事講出來。
3上帝个神蹟樣會恁偉大！
佢行个奇事樣恁有權能！
佢个主權永永遠遠；
佢个統治直到萬代！
4「𠊎 — 尼布甲尼撒在王宮肚住到平安好勢，享受榮華富貴； 5總係𠊎發一個惡夢，看到得人驚个異象。 6𠊎召集巴比倫王宮所有个顧問到𠊎面前來，愛佢等為𠊎解夢。 7所有算命个、會法術个、行邪術个、㧯星象家全部來。𠊎將𠊎發个夢㧯佢等講，總係佢等無法度為𠊎解釋。 8後來但以理入來。 (佢又安到伯提沙撒，係照𠊎神明个名安个。) 佢心肚有至聖神明 #4:8 「神明」抑係譯做「上帝」， 4:9 共樣。个靈。所以𠊎將夢㧯佢講： 9『算命个領袖伯提沙撒啊，𠊎知你心肚有至聖神明个靈，你知所有奧秘个事。這就係𠊎發个夢，請你為𠊎解釋。』
10「𠊎當好睡个時，看到一隻異象：在大地个中央有一頭大樹， 11它越來越大，又當強壯，高到堵天；世上所有个人全部看得到。 12它个樹葉盡靚，樹頂結滿果子，罅全世界个人食。野獸在它樹影下歇睏，飛鳥在樹枝頂做藪；各種生物都食它个果子。
13「𠊎在眠床頂愐這異象个時，看到一個看守个天使對天頂下來。 14佢大聲喊：『倒橫樹仔，剁掉樹桍，搖𢫫樹葉，打下果子。將樹下个野獸㧯樹頂个飛鳥逐走。 15留樹頭在地泥下，用銅條鐵鍊圍等，放在野外个青草當中。
「『將這個人留在野外；俾佢㧯野獸共下食草，由在露水打濕。 16有七年 #4:16 「七年」原文直譯係「七期」，這章出現幾擺。久，佢毋會有人个心智，毋會再有人个思想；佢就像野獸。 17這係看守个天使宣告个裁決，為到愛使世間人知，人个國家係至高上帝掌管个；上帝有權將國權賜給佢所揀選个人，就算係卑微个人，上帝也使佢掌權。』」
18 尼布甲尼撒王講：「這就係𠊎發个夢。伯提沙撒啊，請為𠊎解夢。王宮顧問當中無一個人能為𠊎解夢；總係你做得到，因為你心肚有至聖神明 #4:18 「神明」抑係譯做「上帝」。个靈。」
但以理解夢
19 但以理，又安到伯提沙撒，一聽到這話，驚到講毋出話。王講：「伯提沙撒啊，毋好俾這夢㧯它个信息嚇倒。」
伯提沙撒應講：「𠊎个主啊，願這夢㧯它个意思係指你个仇敵！ 20你所看到該頭樹仔，越來越大，又當強壯，高到堵天，世上所有个人全部看得到； 21它个樹葉盡靚，樹頂个果子盡多，罅全世界个人食。野獸在它下背歇睏，飛鳥在它樹枝頂做藪。
22「王啊，你就係該頭大樹，又高又壯。你个權勢大到堵天；你个統治達到全世界。 23王當看个時，有一個看守个天使對天頂下來，講：『將這樹倒下來，毀掉它，只有留樹頭在地泥下，用銅條鐵鍊圍等，放在野外个青草當中；由在露水打濕這個人，俾佢㧯野獸共下生活七年。』
24「王啊，這就係夢个意思；這將愛發生在𠊎主𠊎王身上个事係至高上帝个裁決： 25你愛對人群中被人逐走，㧯野獸共下生活；你愛像牛恁樣食草，睡在野外，由在露水打濕。七年後，你正會承認係至高上帝掌管人類所有个國家；佢有權將國家賜給佢所揀選个人。 26天使命令將樹頭留在地泥下；該係說明，在你承認天頂个上帝掌管全世界以後，你會再一擺做王。 27所以，王啊，請聽𠊎个勸話：做毋得再犯罪，愛憑公義行事，憐憫窮人；恁樣，你可能會繼續強盛。」
28這兜事全部在尼布甲尼撒王身上實現了。 29十二隻月以後，佢在巴比倫王宮个涼臺頂散步个時， 30佢講：「看啊，巴比倫城樣般雄壯！𠊎用權勢建設這城做京城，來顯明𠊎个榮光㧯威嚴。」
31佢這個話還吂講煞，天頂就發出聲音講：「尼布甲尼撒王，你聽！你个王權這下離開你了。 32你愛對人群中被人逐走，㧯野獸共下生活，像牛恁樣食草。七年後，你正會承認至高上帝有權掌管人類所有个國家，有權將國家賜給佢所揀選个人。」
33這兜話即時就實現。尼布甲尼撒對人群中被人逐走，像牛恁樣食草，由在露水打濕。佢个毛生到像鷹鳥个毛，手指甲、腳指甲生到像鳥仔个爪。
尼布甲尼撒頌讚上帝
34王講：「七年過去了，𠊎 — 尼布甲尼撒注目望天；𠊎个聰明恢復了。𠊎頌讚至高个上帝，將榮光尊貴歸給永生个上帝。
佢个統治永永遠遠；
佢个主權直到萬代。
35在佢眼中，地上个人民卑微；
天使㧯世間人全部係佢掌管个。
麼人敢攔等佢个手？
麼人敢對佢講：『你做麼介？』
36「𠊎个聰明恢復轉來該時，𠊎个光榮、威嚴，㧯王國个榮光也全部歸還𠊎。𠊎个參謀㧯大臣全部擁護𠊎；𠊎重新得到个權勢比以前還較大。
37「這下，𠊎 — 尼布甲尼撒稱頌、尊崇、敬拜天頂个君王。佢个所做正直公平；佢能降低驕傲个人。」
اکنون انتخاب شده:
但以理書 4: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012