阿摩司書 5
5
呼喊以色列人悔改
1聽啊，以色列人，𠊎愛為你等唱一首哀歌：
2人家女以色列已經跌倒，
䟘毋起來了。
姖被人㧒在地上，
無人將姖扶起來。
3至高个上主恁樣講：「以色列个城，派出一千個兵仔，賸一百個轉來；派出一百儕，賸十儕轉來。」
4上主向以色列人講：「愛尋𠊎正有生路。 5毋好到別是巴去禮拜。毋好到伯特利去尋𠊎；因為伯特利會無掉。毋好去吉甲；因為吉甲个人會被人捉去。」
6愛尋上主，你等正有生路。若係你等毋去尋佢，佢會像一陣火將約瑟个後代燒掉。這陣火會將伯特利个人民燒掉，無人會打烏。 7你等會堵到災難了！因為你等歪曲正義，蹧踏人民个權利！
8上主創造星辰，
造昴星㧯參星。
佢喊日時頭變做暗晡頭，
將烏暗變做光明。
佢將海洋个水倒在地上。
佢个名係上主。
9佢使勢力強大个滅亡，
使城堡被人打橫掉。
10你等當惱別人在法庭主持公道、公正無私。 11你等欺負窮苦人，搶佢等个糧食；你等用石頭起盡靚个大屋，總係絕對無法度住；你等耕種盡靚个葡萄園，總係絕對無法度啉所出个酒。 12𠊎知你等个罪過當多，罪惡當大。你等欺負好人，被人收買，在法庭冤枉窮苦人。 13這係邪惡个時代；莫怪聰明人全部毋講話了。
14愛追求良善，脫離邪惡，你等正有生路。恁樣，就照你等講个，上主 — 萬軍个元帥上帝正會正經㧯你等共下。 15惱邪惡，愛良善，在法庭伸張正義。恁樣，可能上主 — 萬軍个元帥上帝就會向約瑟後代賸到个人施恩。
16所以，至高个上主 — 萬軍个元帥上帝恁樣講：「街路逐所在會有悲傷大噭个聲，講：『唉哉！唉哉！』唱哀歌个人全部被人請掉了，只有去拉耕種人來𢯭手代噭。 17葡萄園肚只有聽到悲傷个噭聲。這兜事一定會發生，因為𠊎愛來責罰你等。」上主恁樣宣佈了。
18等上主个日仔來到个人啊，你等慘了！上主个日仔對你等有麼介好處呢？上主个日仔對你等係烏暗，毋係光明。 19該日仔到个時，你等無所在好走閃，像一個人閃過獅仔，又堵到熊！又像一個人轉到屋下，當痶个時，用手扶壁，又給蛇咬到。 20上主个日仔會帶來烏暗，毋係光明；該係傷心个日仔，無一些仔希望。
21上主恁樣講：「𠊎盡惱你等个節期，忍毋下你等个大會！ 22你等獻个燒化祭㧯素祭，𠊎毋接受；獻當肥个頭牲做平安祭，𠊎也無愛看。 23𠊎無歡喜你等吵鬧个歌聲，也無愛聽你等彈奏个琴聲。 24反轉，愛俾公平像大水滾滾沖等下！愛俾公義像溪水直直流等去！#5:24 本節抑係譯做「反轉，愛俾正義伸張，親像滾滾湧出个大水！愛俾公道通行，親像長流不息个江河！」
25「以色列人啊，在曠野該四十年，你等並無獻麼介牲儀抑係禮物給𠊎！ 26這下你等揹起自家雕刻个偶像 — 撒固王神㧯迦溫星神。 27所以𠊎愛將你等逐到大馬士革外背遠遠个所在去。」上主恁樣宣佈了；佢个名係萬軍个元帥上帝。
اکنون انتخاب شده:
阿摩司書 5: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012