使徒 3
3
彼得㧯約翰醫好瘸腳个人
1有一日，下晝三點鐘祈禱个時，彼得㧯約翰上聖殿去。 2在該安到美門个所在，有一個出世就瘸腳个人，逐日被人扛來放在門口，對入聖殿个人討食。 3佢看到彼得㧯約翰愛入聖殿去，就求佢等救濟佢。 4佢等注神看佢；彼得講：「你看𠊎等！」 5佢就注意看佢等，希望會得到麼介東西。 6彼得對佢講：「金銀𠊎全部無，總係𠊎愛將𠊎所有个給你：𠊎奉拿撒勒人耶穌基督个名吩咐你，䟘起來行！」 7然後彼得牽等佢个右手，扶佢䟘起來。該人个腳㧯腳㬹骨黏時得到氣力， 8就跳起來，企等，開始行路。佢同佢等共下入去聖殿；佢緊行緊跳，頌讚上帝。 9眾人全部看到佢一片行，一片頌讚上帝； 10佢等一認出佢就係該坐在聖殿个美門口个乞食仔，就因為所發生个事感覺非常希奇。
彼得在聖殿肚傳福音
11在所羅門廊下，該人牽等彼得㧯約翰；在場个人感覺盡奇怪，全部走去看。 12彼得看到，就對佢等講：「以色列同胞啊，做麼介看這件事做奇怪呢？做麼介緊注目看𠊎等呢？你等恅到𠊎等係靠自家个能力抑係虔誠使這個人行路嗎？ 13亞伯拉罕、以撒、雅各个上帝，就係𠊎等祖先个上帝，已經榮耀佢个僕人耶穌；這耶穌，你等將佢交給官府；彼拉多決定愛放佢，總係你等在彼拉多个面前卻棄絕佢。 14佢係聖潔公義个，你等卻棄絕佢，要求彼拉多透放一個㓾人个兇手給你等。 15恁樣，你等將生命个主害死；總係上帝使佢對死復活。𠊎等就係這件事个見證人。 16這瘸腳个人得到勇健，就係因為耶穌个名所發出个能力。這個人，你等識佢。你等所看到發生在佢身上个事，係因為佢信耶穌个名。因為信耶穌，佢正會完全好起來；這係你等親眼看到个。
17「這下，兄弟啊，𠊎知你等㧯你等个官長恁樣對待耶穌，係因為無了解。 18上帝早就通過眾先知預言基督的確會受苦；這預言已經實現。 19所以，你等愛悔改，轉向上帝，佢就會赦免你等个罪。 20恁樣，主會賞賜你等靈力換新个日仔；該時，佢愛差遣耶穌降臨，就係佢為你等所選个基督。 21基督一定愛留在天頂，直到萬物復興个時節；這係上帝在古早通過佢个聖先知个嘴所宣佈个。 22摩西講過：『主 — 你等个上帝愛對你等个兄弟中為你等興起一個先知，像佢興起𠊎一樣 #3:22 「為你等…一樣」抑係譯做「為你等興起一個像𠊎一樣个先知」。。佢對你等所講个話，你等全部愛聽。 23毋聽從這先知个人，就愛對上帝个子民中除掉。』 24所有講預言个先知，連撒母耳㧯在佢後背來个，全部有宣佈這兜日仔所愛發生个事情。 25你等係先知个繼承人；你等承接上帝㧯你等个祖先所立个契約。上帝對亞伯拉罕講過：『𠊎愛通過你个後代賜福給地上个萬民。』 26所以，上帝興起佢个僕人，先差佢到你等這位來，賜福給你等，使你等每一個人回頭，離開邪惡个道路。」
اکنون انتخاب شده:
使徒 3: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012
