使徒 25
25
保羅上訴羅馬皇帝
1 非斯都到任三日後，對凱撒利亞上耶路撒冷去。 2祭司長㧯猶太人个領袖向佢告保羅。佢等請求非斯都， 3恩准將保羅送去耶路撒冷；事實上，佢等陰謀愛在路上埋伏㓾死佢。 4非斯都應佢等講：「保羅這下拘留在凱撒利亞，𠊎無幾久愛轉去該位。 5你等个領袖做得㧯𠊎共下去，若係該人有做麼介犯法个事，就在該位告佢。」
6 非斯都在佢等該位住十頭八日就轉凱撒利亞去。第二日佢就開庭，命令人帶保羅來。 7保羅來到，該兜對耶路撒冷來个猶太人圍圍遒企等，用盡多嚴重个罪名告佢，總係全部拿毋出證據來。 8保羅為自家辯護講：「無論係違背猶太人个法律，褻瀆聖殿，抑係冒犯羅馬皇帝，這兜事𠊎一件也毋識犯過。」
9總係非斯都愛俾猶太人歡喜，就問保羅：「你願意上耶路撒冷，在該位接受𠊎對這件案仔个審判麼？」
10 保羅講：「這下𠊎就係企在皇帝个法庭，這位就係𠊎應當受審判个所在。𠊎對猶太人並毋識做過麼介毋著个事，這也係你自家明明知个。 11若係𠊎犯法，有麼介該死个罪，𠊎絕對毋會逃避刑罰。若係佢等告𠊎个毋係事實，無人做得將𠊎交給佢等。𠊎愛對皇帝上訴！」
12 非斯都㧯佢个參謀商量後，就講：「既然你對皇帝上訴，你就去皇帝該位！」
非斯都對亞基帕王講起保羅个事
13過一站日仔以後，亞基帕王㧯百妮基來凱撒利亞拜訪非斯都，表示歡迎。 14在該位住幾日後，非斯都將保羅个事對亞基帕王講：「這位有一個人，係腓力斯留下來个囚犯。 15上擺𠊎去耶路撒冷，該片猶太人个祭司長㧯長老來告佢，要求𠊎將佢定罪。 16𠊎㧯佢等講，照羅馬人个規矩，被告吂同原告對質，還吂有機會為自家辯護以前，做毋得定罪。 17等佢等來到這位以後，𠊎無延纏時間，第二日就開庭，命令將該人帶來。 18原告全部企起來告佢，總係所告个並毋係𠊎想像个罪。 19佢等㧯佢爭論个係關係宗教个問題，還有一個名安到耶穌个人；這人已經死掉，總係保羅講佢還生生。 20這個案仔𠊎毋知愛樣般判正好。𠊎問保羅係毋係願意上耶路撒冷，在該位受審判。 21總係，保羅請求將佢留下來，佢愛上訴到皇帝該位去。所以𠊎命令將佢留在監獄肚，等候押送去皇帝該位。」
22 亞基帕王對非斯都講：「𠊎也想愛親身聽這人講看仔。」
非斯都講：「天光日你就做得聽佢講。」
23第二日，亞基帕王㧯百妮基大擺排場，帶等一群指揮官㧯城內个貴族，共下入去大廳。非斯都一命令，保羅就被人帶入來。 24非斯都講：「亞基帕王，在座个各位！請看這個人；佢就係在這位㧯耶路撒冷所有个猶太人對𠊎申告，極力要求𠊎愛給佢死个。 25總係，𠊎查毋出佢犯到麼介該死个罪；同時，佢既然愛對皇帝上訴，𠊎就決定押送佢去。 26關係這個人，𠊎無麼介確實个資料可以奏明皇帝；所以，𠊎帶佢到各位面前來，特別係亞基帕王个面前，查明案情後，𠊎正有好上奏。 27照𠊎看，押送囚犯無指出罪名係無合理个。」
اکنون انتخاب شده:
使徒 25: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012
