使徒 24
24
猶太人个領袖告保羅
1過五日，大祭司亞拿尼亞㧯幾個長老，同一個名安到帖土羅个律師，來到凱撒利亞。佢等在總督腓力斯个面前告保羅。 2保羅被人喊到公堂；帖土羅就告佢講：
「腓力斯大人啊！因為你賢明个治理，𠊎等正有長期个太平，國家个行政有盡大个改革。 3你个德政，𠊎等隨時隨地滿心感謝無停。 4𠊎毋敢加講來勞攪你，只有求你施恩聽𠊎等簡單个申告： 5𠊎等發現這個人像發瘟个人共樣。佢在全世界猶太人个中間製造混亂，係拿撒勒黨个一個頭目， 6連聖殿也敢褻瀆，𠊎等就將佢捉起來。#24:6 有兜古卷加第 6 節个下半節到第 8 節个上半節：「𠊎等本來想愛照𠊎等个法律審判佢， 7 無想到，指揮官呂西亞用武力來干涉，將佢對𠊎等手中搶走， 8 然後命令告佢个人來你這位。」 8你審問佢就會知𠊎等告佢个一切理由。」 9在場个猶太人也同聲告佢講，事實就係恁樣。
保羅為自家辯護
10這時，總督指示保羅講話。保羅就講：
「𠊎知你在本國辦案仔盡多年，所以𠊎樂意在你面前為自家辯護。 11你查就知，𠊎上耶路撒冷去禮拜，到這下正十二日定定。 12佢等並無看到𠊎在聖殿肚㧯麼人辯論，也無看到𠊎在會堂抑係城肚煽動大眾。 13佢等無法度對你提出告𠊎个證據。 14總係，有一件事𠊎愛承認：佢等喊做異端个道，就係𠊎敬拜𠊎等祖先个上帝个根據。𠊎也相信摩西个法律㧯先知書所記个一切。 15𠊎㧯佢等對上帝有共樣个盼望，就係希望所有个人，無論善惡，攏總會對死復活。 16所以，𠊎勉勵自家，在上帝㧯人个面前，常常保持清白个良心。
17「𠊎離開耶路撒冷已經有好多年。𠊎這擺去，係將救濟同胞个錢帶轉去，也愛在該位獻祭。 18佢等在聖殿肚看到𠊎个時，𠊎已經行潔淨禮，堵堵獻等祭；𠊎並無聚集眾人，也無作亂。 19若有，就係幾個對亞細亞省去个猶太人在該位；該兜人若係愛告𠊎，應該來你面前申告。 20若無，喊這兜當時在場个人自家講看仔，𠊎在議會申訴个時，佢等發現𠊎有麼介罪。 21𠊎企在佢等面前个時，只有大聲講過一句話，就係：『𠊎今晡日受你等審問，係因為𠊎相信死人復活。』」
22 腓力斯對這道本來有相當个認識，就宣佈退堂講：「等指揮官呂西亞來到，𠊎正來判斷你等个事。」 23佢命令該軍官看守保羅，給佢較自由兜仔，准親友來供給佢所需要个東西。
保羅在腓力斯㧯土西拉个面前
24幾日後，腓力斯㧯佢个猶太夫人土西拉共下來。佢喊保羅來，聽佢講論有關基督耶穌个信仰。 25保羅也講到有關公義、節制、將來个審判等教訓；腓力斯感覺盡驚，就對保羅講：「你暫時倒轉去，有機會𠊎正喊你來。」 26因為腓力斯盡希望保羅會送錢給佢，所以常常喊佢來，㧯佢談論。
27過兩年，波求‧非斯都接腓力斯个位做總督。腓力斯為到愛得到猶太人个歡喜，就將保羅繼續留在監獄肚。
اکنون انتخاب شده:
使徒 24: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012
