使徒 16
16
提摩太跈保羅㧯西拉
1 保羅來到特庇㧯路司得。在路司得有一個信徒，名安到提摩太。厥姆係猶太人，也係信徒，總係厥爸係希臘人。 2在路司得㧯以哥念个眾信徒盡稱讚提摩太。 3保羅想愛帶提摩太共下去，就㧯佢行割禮，因為該所在个猶太人全部知厥爸係希臘人。 4佢等經過逐個城，就將耶路撒冷个眾使徒㧯長老所定个例規交給佢等，吩咐佢等遵守。 5因為恁樣，各教會个信心越發堅固，信徒日日增加。
馬其頓个呼聲
6佢等經過弗呂家㧯加拉太地區，因為聖靈毋肯佢等在亞細亞省傳福音。 7佢等到每西亞邊界个時，想愛入去庇推尼省，總係耶穌个靈禁止佢等， 8所以佢等𫟧過 #16:8 「𫟧過」抑係譯做「經過」。每西亞，去特羅亞。 9該暗晡，保羅看到一個異象：有一個馬其頓人企在該位，求佢講：「請你來馬其頓幫助𠊎等！」 10保羅一看到這個異象，𠊎等就黏時準備去馬其頓，因為𠊎等確信係上帝呼召𠊎等去傳福音給該所在个人。
呂底亞歸主
11𠊎等坐船對特羅亞出發，直接駛到撒摩特喇，第二日到尼亞坡里。 12𠊎等對該位行到馬其頓頭一區个一個城市 #16:12 「馬其頓…城市」另外有兜古卷係「馬其頓區个主要城市」抑係「馬其頓行政區个主要城市」。腓立比；這城市也係羅馬个殖民區。𠊎等在該位住幾日。 13安息日，𠊎等出城去河壩滣，心內想，猶太人可能會來這地方祈禱。𠊎等坐下來，對聚集在該位个婦女傳道理。 14當中有一個對推雅推喇城來个婦女，名安到呂底亞，係賣紫色布个。姖係敬拜上帝个人；主開姖个心，俾姖留心聽保羅所講个話。 15姖㧯姖全家人攏總領洗禮。事後，姖請求𠊎等講：「你等若係認為𠊎係誠心信主，請來吾屋下住。」姖就強強留𠊎等。
在腓立比監獄
16有一日，𠊎等去該祈禱个所在，有一個使女對面行等來。這使女有邪靈附身，會卜卦算命，所以代厥主人賺盡多錢。 17姖歸路跈等保羅㧯𠊎等，大聲喊講：「這兜人係至高上帝个僕人，愛對你等宣佈得救个道路！」 18姖連連好多日恁樣緊喊；最後保羅感覺盡惱，就轉身，對該邪靈講：「𠊎奉耶穌基督个名，命令你對厥身上出來！」該邪靈黏時就出來。
19使女个主人知佢等个財源斷掉去了，就揪等保羅㧯西拉，拉佢等去廣場見官府个人。 20佢等帶佢等到羅馬官長个面前，告佢等講：「這兜人係猶太人，來擾亂𠊎等个城市。 21佢等提倡違法个規矩，係𠊎等羅馬人做毋得接受，做毋得實行个！」 22眾人也相爭攻擊佢等；該兜官長就吩咐脫佢等个衫，鞭打佢等。 23兵仔將保羅㧯西拉打到盡厲害，然後將佢等關在監獄肚，命令看守个人嚴嚴掌好。 24看守个接到命令，將佢等關在監獄內層，兩腳用枷鎖等。
25大約在半夜，保羅㧯西拉在該位祈禱、吟詩頌讚上帝，其他个囚犯聽到耳側側。 26忽然，有大地動，連監獄个地基也搖動；一下仔，所有个監門全部打開來，囚犯个鎖鍊也𢫫下來。 27看守个醒過來，看到監獄个門全部大開，恅到所有个囚犯已經逃走，就挷出刀仔來，想愛自殺。 28保羅看到，大聲喊講：「毋好傷害自家，𠊎等全部還在這位！」
29看守个喊人擎火把來，就撞入去，伏在保羅㧯西拉个腳前，愊愊掣。 30然後，佢帶佢等出來，問講：「兩位先生，𠊎愛做麼介正會得救？」
31佢等講：「信主耶穌，你㧯你全家人就會得救。」 32兩儕又對佢㧯佢全屋下人講解主个道理。 33該暗晡，當時，看守个帶佢等去洗傷口；佢㧯佢全家人黏時領洗禮。 34佢請保羅㧯西拉去厥屋下，擺桌請佢等食。佢㧯全家人因為信上帝，就充滿歡喜。
35第二日打早，羅馬个官長派警官去講：「將該兩儕放出去！」
36看守个㧯保羅講：「官長派人來，愛放你㧯西拉，你等這下做得出去，安心離開。」
37總係，保羅對警官講：「𠊎等係羅馬个公民，並無定罪，佢等就當眾鞭打𠊎等，又將𠊎等關在監獄肚；這下佢等想愛將𠊎等偷偷送走嗎？這係做毋得个！喊羅馬官長自家來帶𠊎等出去！」
38警官將這兜話報告官長。佢等一聽講保羅㧯西拉係羅馬个公民，就盡驚， 39來到監獄，㧯佢等會失禮，帶佢等出來，請佢等離開該城市。 40保羅㧯西拉離開監獄，就去呂底亞个屋下，在該位見到眾兄弟姊妹，並勸勉佢等，然後就離開。
اکنون انتخاب شده:
使徒 16: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012
