使徒 15
15
耶路撒冷大會
1有兜人對猶太來到安提阿，教訓兄弟講：「除了你等照摩西个法律接受割禮，你等就毋會得救。」 2為到這個問題，保羅㧯巴拿巴兩儕同佢等發生激烈个辯論。所以，大家決定派保羅㧯巴拿巴，同當地教會幾個人上耶路撒冷去，請教使徒㧯長老這件事。
3教會就送佢等出發。在路上，佢等經過腓尼基㧯撒馬利亞，逐所在報告外邦人歸主个事情。聽到這個消息，所有个信徒全部盡歡喜。 4佢等到耶路撒冷个時，得到教會、使徒㧯長老个接待。佢等就向大家報告上帝通過佢等所做一切个事。 5總係有兜法利賽派个信徒企起來講：「外邦人一定愛接受割禮，也一定愛遵守摩西个法律。」
6所以，使徒㧯長老就開會討論這個問題。 7辯論盡久以後，彼得企起來講：「各位兄弟，你等知，上帝早就對你等當中揀選𠊎，喊𠊎將這福音个道理傳給外邦人，俾佢等聽到來相信。 8鑒察人心个上帝將聖靈賜給外邦人，像賜給𠊎等共樣，用恁樣來證明佢也接納外邦人。 9上帝並無分別𠊎等㧯佢等；因為佢等信，佢就潔淨佢等个心。 10既然係恁樣，這下你等做麼介試探上帝，將𠊎等个祖先㧯𠊎等自家㧡毋贏个擔仔，放在外邦信徒个肩頭頂呢？ 11這係毋著个！𠊎等相信，𠊎等得救係通過主耶穌个恩典，同佢等共樣。」
12大家就恬恬，聽巴拿巴㧯保羅報告上帝通過佢等在外邦人當中所行一切个神蹟奇事。 13佢等講煞，雅各也講：「各位兄弟，請聽𠊎講！ 14頭下西門說明上帝樣般關心外邦人，對佢等當中揀選人來歸佢自家。 15先知所講个話，意思也係共樣。像聖經所記載：
16主講：
事後𠊎愛倒轉來，
重建大衛橫掉个王朝；
𠊎愛重建該被人破壞个，
𠊎愛俾它重新企起來。
17恁樣，其他所有个人類，
𠊎揀選歸𠊎个外邦人，
全部就會尋求𠊎。
18這係在上古就顯明這兜事情个主所講个。」
19 雅各繼續講：「照𠊎个看法，𠊎等無應該為難該兜歸向上帝个外邦人。 20𠊎等做得寫信仔，吩咐佢等：毋好食拜過偶像無淨浰个食物，毋好行淫亂个事，毋好食揢死个頭牲，毋好食血。 21因為自古以來，每一個安息日，在逐個會堂有人讀摩西个法律，在逐個城肚也有人宣揚佢个教訓。」
寫給外邦人个信仔
22所以，眾使徒㧯長老，並全教會就決定推派代表，派佢等同保羅㧯巴拿巴共下去安提阿。佢等選偏名巴撒巴个猶大㧯西拉。佢兩儕係眾兄弟平常所尊重个人。 23佢等帶去个信仔係恁樣寫个：
「使徒㧯做長老个眾兄弟，對住在安提阿、敘利亞㧯基利家所有个外邦信徒請安！ 24𠊎等聽講有兜人對𠊎等這位出去；佢等所講个話害你等毋知樣般正好。其實，𠊎等並無喊佢等去講該兜話。 25所以𠊎等共下參詳，大家同意選派代表去你等該位。佢等愛同𠊎等所親愛个朋友巴拿巴㧯保羅共下去； 26這兩儕識為到事奉𠊎等个主耶穌基督冒生命个危險。 27所以𠊎等選派猶大㧯西拉去；佢等會當面㧯你等說明這兜事情。 28因為聖靈㧯𠊎等攏總同意，除了一兜必要个例規以外，毋愛將其他个重擔加給你等。 29你等毋好食拜過偶像个食物；毋好食血抑係揢死个頭牲；也毋好行淫亂个事。這幾件，你等莫犯就好。願你等平安！」
30該兜代表奉命出發，去到安提阿，在該位聚集全體信徒，將信仔交給佢等。 31佢等讀信仔个時，因為所鼓勵个話就非常歡喜。 32猶大㧯西拉也係先知；佢等對信徒講盡多鼓勵个話，來堅固佢等个信心。 33在該位住一站時間以後，信徒就歡送佢兩儕，祝福佢等平平安安轉去差派佢等个眾人該位去。#15:33 有兜古卷加 34 節「總係，西拉決定留在該位。」
35總係保羅㧯巴拿巴繼續留在安提阿；佢等同其他好多人共下教訓人，並傳主个道。
保羅㧯巴拿巴分開
36一站時間以後，保羅對巴拿巴講：「𠊎等倒轉頭擺傳主道理个逐村莊去，看信徒个情形。」 37巴拿巴想愛帶約翰‧馬可共下去， 38總係保羅毋贊成；因為上擺佢毋肯留下來同佢等共下工作，在旁非利亞離開佢等。 39佢兩儕為這件事激烈爭論，最後分開。巴拿巴帶等約翰‧馬可坐船去塞浦路斯， 40總係保羅揀選西拉；信徒將佢等交在主个恩典中，佢等就出發。 41佢行遍敘利亞㧯基利家，堅固各教會兄弟姊妹个信心。
اکنون انتخاب شده:
使徒 15: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012
