Lom 15
15
Tu otímbéke bɔsɔ́ɔ́kɔ́ o olumitinine
1Basɔ́ abá tu na maá sɔ́ ɔ́ɔ́nɛ́na o olumitinine, tu ŋá sɔ́ nyɛ́mana tu otímbéke bɔsɔ́ɔ́kɔ́ a bá tɛ́ ŋa bɔ́ ɔ́ɔ́nɛ́na ; tu tɛ aamba ɔ cáŋa menyi mbɔ́kɔ bú ŋaá basɔ́ bíléníne. 2Hú naányɛ́ aá basɔ́ ŋá nyɛmána ɔkɛlaka bɔsɔ́ɔ́kɔ́ bɛmbányɛ bɛ́ bɛsana e bí ŋeé beébe bíléníne ɔ ɔkɛla anyía bábɔ́ ɔ́ɔ́mbɔ́kɔ o olumitinine noómi. 3Yááŋa anyía, *Kilís tɛ́ ɔ́mɔ kɛ́la bɛsana e bí ŋeé wuúci bíléníne ; mbá ta híáná, yááŋa yɔɔ́ŋɔ́kɔ́nɔ́ a yááyɛ́ asana anyía : « Masálɔ́ amá baacɔ ŋaá bá bábɔ́ ɔ wɔɔ́mbɔ́náka, wáámɛ bá ŋa bɔ́ bá bábɔ́ kɛ́laka aáná. »#Maŋ 69.10 4Yiíye anyía bɛsana bikime abɛ́ bɔ́ ŋɔ yɔ́ɔ́ŋɔ́kɔ feeké a Ciɔɔ́ŋɛ́ cɛ́ Bandɔ́mɛsɛ́ ŋaá bá hú anyía bɛ́ á basɔ́ iínjíékíne injiŋé ɔ ɔkɛla anyía ne oweéhínyínyi ne okíndísínyi e bí ŋeé húle a Ambányɛ yɛ́ Ɛsɔ́ma á basɔ́ hákɛ́na mɔŋɔlɛ́ ɛ ɛtɛ́má noómi. 5Bandɔ́mɛsɛ́ a wáŋa indíné ci ne okíndísi baacɔ ne o beébe iínjíékíne makɛ́nda me oweéhíkínyínyi á kɛla anyía núénú líhéke a nyɛlɔ́kɔ́mána noómi banɔ́ na banɔ́ i iŋetí ci Yésus Kilís. 6Aáná nu ké nú nyémiki Bandɔ́mɛsɛ́, nu wuúci iínjíékíne nuúmi na ɔtɛ́má ɔ́mɔtɛ́ ne okelú ɔ́mɔtɛ́ ; wuúci wáŋa Síkíne ci uusú Otéŋí a Waáŋá Yésus Kilís.
Baacɔ a bá tɛ á bɔ́ bá Besuif ké bú nyémíki tɔ́na Bandɔ́mɛsɛ́
7Yaátɛ́ asana aná, énu búle káhána bɔmbányɛ, háyɛ *Kilís ŋaá banɔ́ káha bɔmbányɛ, ɔ ɔkɛla anyía baacɔ é búle ebú iínjie Bandɔ́mɛsɛ́ nuúmi. 8Ɛ ŋaá mɛ banɔ́ láana aá taaká ɛsɛ́ : Kilís ŋaá fááya ɔ ɔkɔɔ́ basɔ́ ɔɔ́lɔ, basɔ́ *Besuif, ɔ ɔkɛla anyía wá basɔ́ tóŋínyi anyía Bandɔ́mɛsɛ́ ŋo nyíóyísínyi bɛsana abɛ́ u ŋaá bɛ́tánákɛ́ná cíísú sɔ́kɔ́nɔ́. 9Mbá Kilís ŋaá fááya tɔ́na anyía baacɔ bá mɔnɔŋɔ me etémbí tɔ́na ébú iínjíé ambányɛ yɛ́ ɔtɛ́má yɛ́ Bandɔ́mɛsɛ́ nuúmi, háyɛ yááŋa yɔɔ́ŋɔ́kɔ́nɔ́ anyía : « Yaátɛ́ asana i ké mi o wiínjíékíne bitéŋíti ɛ ɛkatɛ́katɛ́ cɛ mɔnɔŋɔ mekime, yoómísíki nyíɔ́wɔ nyiínyi na maŋana. »#Maŋ 18.50 10Ciɔɔ́ŋɛ́ ŋa kɔ́ɔna tɔ́na cɛ́sɛ : « Banɔ́, mɔnɔŋɔ me etémbí, ánɔ latána ne Besuif o onyemiki Bandɔ́mɛsɛ́ ne obíléne weéŋí. »#Tet 32.43 11Ta anyía : « Banɔ́, mɔnɔŋɔ me etémbí mekime, énu íínjíékíne Bandɔ́mɛsɛ́ nuúmi ; énu wuúci súbékíne aabá. »#Maŋ 117.1 12*Ɛsayí kɔɔnaka tɔ́na ɔsɛ : « Buɔnɔ́ káá háma a bɔnyɛ Yésée ; buúbu eébú bú kéé téŋgínyi mɔnɔŋɔ me etémbí, mɔnɔŋɔ eémé ma hákɛ́na mɔŋɔlɛ́ nááyá. »#15.12 Ɛsa 11.1, 10 13Bandɔ́mɛsɛ́, indíné cɛ máásɔ́ mɔŋɔlɛ́, á banɔ́ súkúnékíne na anamánamá cé obíléne ekime ne mbuumu anyía nu ŋa nɔ́ háya mɔŋɔlɛ́ nááyá. Aáná cíínú ɛtɛ́má ké búle á bá inyíóyókónú hú mbiɔ́kɛ na mɔŋɔlɛ́ a makɛ́nda me *Efúúménénú yí Elilé.
Buólí bú Bóol
14Báámɛ benyíinyí bé olumitinine, aámɛ a aháŋáʼo, i ŋe mí menyi ɔɔ́mɛ ɔ ɔtɛ́má anyía nu ŋa nɔ́ hɛka ɔtɛ́má buéŋí ɔ ɔhɔla ; banɔ́ tɔ́na ne omenyi onyíóyónó a bɛɛtɔ́ hú mbiɔ́kɛ. Nua nɔ́ŋa eebe abá nuanɔ́ nyɛmana nu olébékéne banɔ́ na banɔ́. 15Ta híáná, ɛ ŋa mɛ́ banɔ́ ɔɔ́ŋɔ́kɛ́na a bɛhaála a bɛ́mɔtɛ́ bɛ́ núámɛ nufule eenu, yaŋɔ́ tɛ́ka ne nyiike ɔ ɔtɛ́má anyía yámɛ banɔ́ bítésíki bɛsana abɛ́ nú ŋa nɔ́ aákɔ́nákɛ́ná a yaála yí nuubo ayɛ́ Bandɔ́mɛsɛ́ ŋa mɛ́ kɛláka. 16U ŋeé mi télímínyí munyiɔnɔ mu Yésus *Kilís ɛ ɛkatɛ́katɛ́ cɛ baacɔ a bá tɛ ábɔ́ bá *Besuif o o beébe hulinyi yááyɛ́ Ambányɛ yɛ́ Ɛsɔ́ma ɔ ɔkɛla anyía bábɔ́ bɛ́cáŋáka háyɛ *abɛ́sámbá e yí ŋeé wuúci bíléníne. Yiíye eéyé *Efúúménénú yí Elilé ŋé fúúmínyi. 17Ɛ́ɛhɛ́ a asana ayɛ́ ya mɛ́ŋa e nyimónjóló ne Yésus Kilís, ya mɛ́ŋa wu obíbéétíki e buólí abɔ́ ɛ ŋa mɛ́ nyiɔnɔ Bandɔ́mɛsɛ́. 18Yááŋa anyíaʼo, ɛ tɛ ámɛ bá wu ɔbɛ́kándɔ́na ɔtáŋɛ́ta asana yí etémbí, ɛ́ tɛ ŋáa bá hú eeye ayɛ́ ɛ ŋaá mɛ táŋa eé nyiínyi nyí Yésus Kilís, ɔ ɔkɛla anyía baacɔ a bá tɛ ábɔ́ bá Besuif ábɔ́ lɔ́kɔ́mákɛ́na Bandɔ́mɛsɛ́. Aáná Kilís ŋa hɔ́lɛna ne eémi e mehúnyi ne eémi e mekilíkínyí ɔ ɔkɛla aáná, 19yó tóŋgínyi tɔ́na ne bikéki bí tubílícínyínyí ne bikémése bɛ́ bɛsana a makɛ́nda me Efúúménénú yí Elilé ; biíbi bí ŋe yiínjie makɛ́nda me ohulikinyi bɔmbányɛ bɔmbányɛ baacɔ Ambányɛ yɛ́ Ɛsɔ́ma yí Yésus Kilís, o otúme a bálɛ́ka ci *Yelúsalɛm ɔ ɔkɔɔ́háma i iisí ci Iliilí.#15.19 Ekéti yí iisí yí butéŋí bú Lóom ; cɛ ŋaá bá haála ehé Yukusuláfi áŋa aámbáya. 20Mbá bú ŋeé mi bílénékine buéŋí okohúlikinyi baacɔ Ambányɛ yɛ́ Ɛsɔ́ma hú a bɛhaála abɛ́ baacɔ tɛ ŋá bɔ́ lɔ́kɔ́ma bá cámbaka buúse bukime Kilís. Ɛ ŋa mɛ́ kɛla aáná anyía i ti hííte nuúmi nɔ́ ɛkata e buólí bɔ́ ɔɔcɔ u etémbí ; 21aáná ɛ ŋa mɛ́ kɛláka háyɛ nyɛkɔɔna nyɛ́ Ciɔɔ́ŋɛ́ anyía : « Baacɔ e bó ti ómo bú beébe hulinyi yááyɛ́ asana ké bú wuúci lɛcaka, híáná bɔsɔ́ɔ́kɔ́ a bɔ́ tɛ ɔ́mɔ́ bɔ́ lɔ́kɔ́ma bé wuúci cambaka ká bɔ́ lɔ́kɔ́máka bɔmbányɛ yááyɛ́ asana. »#Ɛsa 52.15
Osúéte e Lóom ŋa hámɛ́na Bóol ɔ ɔtɛ́má
22Yaátɛ́ asana ɔfaaya náánɔ́ ŋaá mɛ hámɔ́kɔ́nɛ́na buéŋí ɔ ɔtɛ́má bikúlú biéŋí, mbá ohónyí tɛ́ ŋa lɛ́cana. 23Mbá aámbáya, ɛ́ ma mɛ́ mana ɔnyiɔ búámɛ buólí e bikéti bí iisí eebi. Aá taaká, tuɔŋɔ a yáaŋa tuéŋí atɔ́ ɔfaaya náánɔ́ ŋaá mɛ hámɛ́na ɔ ɔtɛ́má. 24E ekúlú ayɛ́ ɛ ká mɛ́ cɔba aá Banyá, ya mɛ́ŋa na mɔŋɔlɛ́ anyía i ké fúle émi líhíte náánɔ́ ɔ ɔkɛla anyía núánɔ́ mɛ ɔɔ́lɛ́ta ɔ ɔcɔba ne buúse ne úúmi ɔkanda oócí.#15.24 A nyɛbɛ́kɛ́lɛ́na nyɛ́ yaátɛ́ ekúlú, nyiɔ́lɔ enyí Bóol ŋaá batá ŋa lɛca nyilébe nyí ne ohónyí, na ɔkanda, na bɛnyɛ́ma bɛ́ ɔnyíáka o ohónyí, yɛ́mɔtɛ́ ekúlú na baacɔ bé okoó wuúci síke. 25Mbá aámbáya eeci míɔ cáŋa ɔcɔba eé Yelúsalɛm a bɔsɔ́ma a bɔ́ ŋa lɛ́ca belumitinine bá hɔ́á. 26Yááŋa anyía belumitinine *Kilís bá tuɔ́bɔ tɔ́ na Masɛtuán na Akayí ŋa bɔ́ lɔ́kɔ́mákána ɔ ɔbánda nyiɔ́lɔ nyɛ́ ɔwɔɔ́lɔ basɔ́kásɔ́ka bé belumitinine bé Yelúsalɛm. 27Beébe bɛ́muátá bá ŋa bɔ́ lɔ́kɔ́mákána ɔkɛla aáná ; mbá aá taaká bá ŋá bɔ́ nyɛmana bá ɔkɛlaka aáná, anyía baacɔ a bá tɛ ábɔ́ bá *Besuif ŋa bɔ́ aáfákána bɛsaya bí Elilé bɛ́ Bandɔ́mɛsɛ́ ɔlɔŋɔ ne Besuif. Híáná baacɔ eébé ábɔ́ nyɛ́mana tɔ́na bá ɔwɔɔ́lɔ́kɔ Besuif na bɛnyɛ́ma e bí ŋeé beébe bɛ́ámbɛ́na. 28Ekúlú eyí i ké mí nyíóyísínyi bɔsɔ́ma eébú, mío cumeke nyiɔ́lɔ eényí a basɔ́kásɔ́ka eébé, ɛ ká mɛ́ cɔba a Banyá, mbá ɛ ká cáŋa fúle émi líhíte náánɔ́. 29I ŋe mí menyi anyía ekúlú ayɛ́ ɛ ká kaá mɛ háma náánɔ́, tu ká sɔ́ bámɔ́kɔ́na bonyíóyókónú na bɛsaya e bí ŋeé húle né Kilís hú mbiɔ́kɛ.
30Banɔ́, báámɛ benyíinyí, na a asana ayɛ́ tu ŋa sɔ́ háya mɔŋɔlɛ́ né uusú Otéŋí a Waáŋá Yésus Kilís na a asana eyí tu ŋe sú lénéne a makɛ́nda me *Efúúménénú yí Elilé, ɛ ŋa mɛ́ banɔ́ báta anyíaʼo : Énu bíínjíé na ɔtɛ́má okime ɔ ɔbɛ́cɔ́kɔ́lɛ́na Bandɔ́mɛsɛ́ aámɛ a asana. 31Ánɔ bɛ́cɔ́kɔ́lɔ́kɛ́na Bandɔ́mɛsɛ́ anyía wé mi kétúnyíki a aabá cé be-ti-lumítíníne bé Yuté#15.31 Ɛ́cɛ anyía Besuif ne bé Yelúsalɛm ne bé Yuté a bá ŋa bɔ́ bá bébú núúsiki Bóol. anyía bá tɛ mɛ kɛla bɔkɔ a bɔɔbɛ́. Énu wuúci bɛ́cɔ́kɔ́lɔ́kɛ́na tɔ́na anyía nyiɔ́lɔ anyɛ́ ɛ ká mɛ́ cɔbanɛna belumitinine bé Yelúsalɛm é beébe bílénékine.#15.31 Nyɛkɔ́ŋɔ́na a nyɛ́mɔtɛ́ : « bébú nyiínyi káha bɔmbányɛ ». 32Aáná ɛ ká kaá mɛ háma náánɔ́ háyɛ nyitíne nyí bilúŋe, mbɔ́kɔ Bandɔ́mɛsɛ́ ŋé lúmítíne, mío hélúméke mbuumu aanɔ́ ɛ ɛkatɛ́katɛ́. 33Bandɔ́mɛsɛ́ a wáŋa hicéme hí mbuumu á bámɔ́kɔ́na na banɔ́ bekime. *Híáná yááŋa.
اکنون انتخاب شده:
Lom 15: lem
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2008, Wycliffe Bible Translators, Inc. All rights reserved.