BBƐ 26
26
Bóol ŋá bɛ́kála eé buúse bɔ́ Akílíba
1Mbá Akílíba#26.1 Fanáka nyihembule nyí 25.13. ŋá laána Bóol ɔsɛ : « Ɔ wáaŋa na makɛ́nda ma ɔbɛ́káláka aámbáya. »
Aáná Bóol ŋaá nándɔ́na ɔɔbɔ́, u ŋe túmé ɔbɛ́kála ɔsɛ : 2« Otéŋí *Akílíba ! Ɛ́ɛ, i ŋeé mi bíléne hɛ́nánɔ eeci ayɛ́ ɛ́ maá mɛ tálɛ́mɛ́na oówe eé buúse, anyía yámɛ bɛ́káláka a bɛsana bikime ebí *Besuif á bɔ́ŋa bá mɛ sɔ́mɔ́kɛ́nánɔ́ eé biíbi. 3Yááŋa anyía o ŋoó menyi abɛ́kɛ́lɛ́na cé Besuif ekime bɔmbányɛ bɔmbányɛ, e menyukune tɔ́na bɛsana e bí ŋe héléne isuŋí aabɔ́ ɛ ɛkatɛ́katɛ́. Yaátɛ́ asana ɛ ŋá mɛ ɔ bɛ́cɔ́kɔ́lɛ́na anyía óo mi eéhínyínyi, ɔ́ɔ lɔ́kɔ́máka uumi ɔtáŋa.
4Besuif bekime ŋe bú ményi anyána i ŋeé mi líhéké o otúme aámɛ a bunɔ́sɛ́ ɔ ɔkɔɔ́háma hɛ́nánɔ eeci ɛ ɛkatɛ́katɛ́ cɛ na buamɛ ne eé Yelúsalɛm áyá. 5Bé ŋe bú mi menyí feeké ; beébe bá bɔ́ŋa bá ɔhákɛ́na ɛmbasɔ́ eémi o olíhe, mbɔ́kɔ bé ŋé bú lénéke. I ŋeé mi líhéke ɛ ɛkatɛ́katɛ́ cɛ ɔlɔŋɔ ú *Bafalisiɛ́ŋ ; ɔlɔŋɔ oócí awɔ́ u ŋa látɛ́na *bikotí bí onyemikinyi Bandɔ́mɛsɛ́ hɛ́ a nyɛbaná hɛ́ a nyɛbaná ɔ ɔhɔla ɛlɔŋɔ cí etémbí. 6Mbá ya mɛ́ŋa aaha tálɛ́mɛ́na hɛ́nánɔ eeci a nyɛkála a asana na nyɛtáta anyɛ́ ɛ ŋa mɛ́ táta na mɔŋɔlɛ́ mekime ɛndána acɛ́ Bandɔ́mɛsɛ́ ŋaá bɛ́tánɛ́ná cíísú sɔ́kɔ́nɔ́. 7Ɛndána eécí, túásɔ́ tɔnyɛ́nɔ́ tukime túɔ́hátá ne túfendí ŋaá tátá ɔlɛca na mɔŋɔlɛ́ ; ɛ́ɛhɛ́ tú ŋe nyemi Bandɔ́mɛsɛ́ ne nebutúé na nabuɔ́sɛ́, tú tɛ tɔmbɔ. Otéŋí Akílíba, a asana na ɛndána eécí Besuif ŋa bɔ́ mɛ sɔ́mɛ́ná. 8A asana a yaátɛ́ nu ŋe nú súŋunyi, banɔ́ a bɔ́mɔtɛ́ a basɔ́ Besuif, anyía Bandɔ́mɛsɛ́ áŋa wu oheenyiki baacɔ o owé e ?
9Aámɛ a aháŋá yɛ́ bɛ́muátá, i ŋe mí keti anyía ɛ ŋa mɛ́ nyɛmána wu onuusiki Yésus, ɔɔcɔ u *Násalɛt, i ihényí ikime. 10Buólí eébú ɛ ŋa mɛ́ nyiɔ́kɔ eé Yelúsalɛm, yaŋɔ́ bɛ́muátá ooci, míɔ hákɛ́na belumitinine Yésus beéŋí eé ciíbe cɛ ɛcaná a makɛ́nda emé betéŋínyi *beluli nyiínjie ŋe bú mi iínjíé. Ekúlú ekime ayɛ́ bá ŋaá bá bábɔ́ sɔ́mbɔ́tɔ́na anyía bá ɔ́ɔ́nɔ́kɔ belumitinine *Kilís, ɛ ŋaá mɛ bá yémi lumitine aáná. 11Bikúlú a bɛ́mɔtɛ́ ɛ ŋaá mɛ bá yamɛ́ kɛlaka anyía bé iínjíékíne a bɔ́mɔtɛ́ muuyé a *bɛndaŋía bɛ́ ɔbɛ́cɔ́kɔ́lɛ́na, i beébe eékíkínyi anyía bé fénékíne Yésus. Ɛ ŋaá mɛ bá na nyɛŋána nyiéŋí náábɔ́ a nyɛnamá anyɛ́ ɛ ŋa mɛ́ cɔbá o okoó beébe nuusi a bálɛ́ka cɛ́ haaca. »
Nyɛháya mɔŋɔlɛ́ nyí Bóol né Yésus
12« Yaátɛ́ asana ɛ ŋa mɛ́ cɔbá búmɔtɛ́ buɔ́sɛ́ aá Tamás ɛ́cɛ betéŋínyi *beluli nyiínjie mé bú mi iínjie makɛ́nda ma ɔcɔba hɔ́á. Ɛ ŋa mɛ́ bá ne tufule tɔ́ makɛ́nda etú bé ŋe bú mi iínjíékíne. 13Otéŋí *Akílíba, yɔ́mɛ ɔ laana : Ɛ ŋaá mɛ bá yamɛ́ cɔ́cɔbaka hɔ́á. E túefi, ɛ ŋa mɛ́ lɛcá yaandándá yí eese yí é húlúkúne ɔ Ɔmuaná ; yɛ́ nɔ́maka ɔ ɔhɔla eese yɛ́ ɔɔ́cɔ́, yɛ́ ŋaá basɔ́ bɔ́ŋɔ́lɛ́na, na yaŋɔ́ na bíámɛ bikendinyi. 14Aáná tu ŋa sɔ́ kuákɔ́na basɔ́ bekime ɔ ɔmɛsɛ́, míɔ lɔ́kɔ́ma okelú a wúmɔtɛ́ á mɛ bataka ne *nuebélé ɔ́sɛ : “Sóol, Sóol ! Anyíatɛ́ o ŋo mí tekese e ? O ŋoó bíyébi etémbí ne etémbí ekúlú ayɛ́ ɔ ŋɔɔ́ waamba ɔyákána háyɛ káwɔ a cɛ́ tɛ ŋa lɔ́kɔ́ma ɔkála ú busue bɔ́ múáyɛ́ mutétényi.” 15Mbá ɛsɛ́ : “Kuɔŋɔ́ ɛ́cɛ aányɛ́ e, Otéŋí ?” U ŋá bɛ́káma ɔsɛ : “Yaŋɔ́, Yésus, ewú o ŋoó tékése, 16mbá ta híáná, hatɔ́na ɛndánáka ; asana ayɛ́ ɛ́ ma mɛ́ kɛla anyía ɔ́ɔ mɛ lɛca#26.16 Cɛ́mɔtɛ́ Ciɔɔ́ŋɛ́ cɛ́ buáyá áŋa na « bɛsana abɛ́ ɔ́ mɔɔ́ lɛcaka… » áŋa anyía ɔ ŋɔ́ɔ nyɛmána wu ɔbámɔ́kɔ́na muamɛ munyiɔnɔ. Ɔ kɔ́ɔ́ bá uumi ɔmbasɔ́mbásɔ anyía óo bíkétíkínyi baacɔ anyána ɔ́ mɔ mɛ́ lɛca hɛ́nánɔ ; o kóó beébe bíkétíkínyi tɔ́na bɛsana ebí i ké mí o tóŋgínyi. 17I ké mí o kétúnyíki ɛ ɛkatɛ́katɛ́ ci *Besuif. Míɔ kuɔŋɔ́ kétúnyíki tɔ́na ɛ ɛkatɛ́katɛ́ cɛ baacɔ a bá tɛ ábɔ́ bá Besuif ; náábɔ́ ɛ ŋa mɛ́ ɔ tɔ́ma. 18Ɛ ŋa mɛ́ ɔ tɔ́ma hɔ́á o okoó beébe húúnéke eése, wó beébe hémúkúnyi i ibíne noómi anyía bébú oófókíne e eese noómi ; wó beébe aáŋíáka e butéŋí bɔ́ Sátan, mbá e beébe hákɛ́na e *Butéŋí bɔ́ Bandɔ́mɛsɛ́. Mbɔ́kɔ bá ŋa bɔ́ hákɛ́na mɔŋɔlɛ́ náámɛ, Bandɔ́mɛsɛ́ kéé beébe nyɛanakɛnɛna máábɔ́ maabɛ́, yó beébe limisikinyi ɛ ɛkatɛ́katɛ́ cɛ bááyɛ́ baacɔ abá u ŋɔ lɔ́tɔ́kɔ.” »
Bóol ŋɔɔ́ nyiɔ́kɛ́na Yésus
19« Asana ɔ́mɔtɛ́, Otéŋí *Akílíba, ɛ tɛ ɔ́mɔ́ kɛ́lɛna ɛndɔ́kɔ́ e *eseye yɛ́ asana ayɛ́ ɛ ŋa mɛ́ lɛcáka, yí é húlúkúne ɔ Ɔmuaná. 20Mbá ɛ ŋa mɛ́ cáŋacáŋa ohulikinyi *Besuif bá Tamás Ambányɛ yɛ́ Ɛsɔ́ma, mío yiíyi hulikinyi tɔ́na baacɔ bé Yelúsalɛm, míɔ cɔba ne buúse o okoó yiíyi hulinyi baacɔ bekime ne bé iisí ci Besuif na bá mɔnɔŋɔ me etémbí áyá. I beébe laakɛna ɛsɛ́ bá bɛ́kákálákɛ́na máábɔ́ maabɛ́, mbá bá sɔ́mba ɔkɔlɔ́ eé meéme ; bá hákɛ́na mɔŋɔlɛ́ ná Bandɔ́mɛsɛ́, mbá bá kɛ́laka bɛsana e bí ŋo tóŋínyi anyía bá ma bɔ́ bɛ́kákálákɛ́na taaká máábɔ́ maabɛ́. 21Aá yaátɛ́ asana Besuif ŋa bɔ́ mɛ́ hatɛ́na eé *Ciíbe cɛ Bandɔ́mɛsɛ́ ; bá ŋa sɛ́ bábɔ́ mɛ ɔ́ɔ́nɔ́. 22Nyitétényi anyɛ́ Bandɔ́mɛsɛ́ ŋeé mi tétényi, nyiínyi nyí ŋeé mi líhísi ɔ ɔkɔɔ́háma aámbáya. Ya mɛ́ŋa úúyé ɔmbasɔ́mbásɔ a baacɔ bekime, o otúme a banásɛ́ ɔ ɔkɔɔ́háma a *baáŋá. Ɛ tɛ ŋá mɛ tála bɔkɔ a bɔ́mɔtɛ́ a bɛsana ebí ne *behémúnyi bɛsana bá Bandɔ́mɛsɛ́ ne *Moyís ŋe bú húlíki anyía bɛ́ káá bɛ́kɛ́láka. 23Bɛ́áŋa anyía *Mesíi ŋá nyɛmána wu owé, yɔ́ bámɔ́kɔ́na ɔɔcɔ u buúsebuúse ɔ ɔhaanyua e biwéewé, yó númisiki eese a baacɔ bekime na bá búásɔ́ bunɔŋɔ na bá mɔnɔŋɔ me etémbí áyá, bú tóŋgínyi anyía Bandɔ́mɛsɛ́ kéé beébe nohiki. »
Bóol ŋa yáamba ɔkɛla anyía Akílíba é lumitinine
24Ekúlú eyí Bóol ŋaá bá waá bɛ́káláka aáná, Fɛsitus ŋá táŋɛ́ta okelú ɔ ɔmuaná ɔsɛ : « Bóol, ɔ wáaŋa yaála, yaandándá yí omenyi ú bɛsana mé yóo hélúmúnyi yaála. » 25Mbá Bóol ɔsɛ :
« Eéʼeé, Kɔ́mɛ́na ! Ɛ tɛ amɛ́ bá yaála. Yááŋa anyía bɛsana eebi abɛ́ ɛ́ ŋaá mɛ táŋa ŋa lɔ́kɔ́mána bɔmbányɛ, bɛ́áŋa taaká. 26Otéŋí *Akílíba bɛ́muátá ŋeé ményi bɔmbányɛ bɛsana eebi. Buátɛ́ bɔkɔ ya mɛ́ŋa wu o wuúci laakɛna na mɔŋɔlɛ́ ɔ ɔtɛ́má anyía u tɛ ŋáá nána ta asana ɔ́mɔtɛ́ ; yááŋa anyía bɛ́ tɛ ɔ́mɔɔ́ bɛ́kɛ́la indiitie haála a hɔ́mɔtɛ́. 27Otéŋí Akílíba, yaŋɔ́ ɛsɛ́ o ŋoó lumitinine bɛsana ebí *behémúnyi bɛsana bá Bandɔ́mɛsɛ́ ŋe bú húlíkínyi baacɔ e ? Ɛ́ɛ, i ŋe mí menyi anyía o ŋoó biíbi lumitinine. » 28Mbá Akílíba ŋaá laána Bóol ɔsɛ : « O ŋoó bíkéti asɛ ɔ ŋɔɔ́ cɔba ɔ ɔkɛla anyía yámɛ bɛ́cáŋa kilísíten e hikúlúkúlú e ? »#26.28 Cɛ́mɔtɛ́ Ciɔɔ́ŋɛ́ cɛ́ buáyá áŋa na « …wɔ cɔba ɔ ɔkɛla yémi lumitine ɔbɛ́cáŋa kilísíten ». 29Mbá Bóol ɔsɛ : « Ta bú tɛ ŋáa bɛ́kɛ́la aámbáya, te nyíényí bú káá bɛ́kɛ́láka, ɛ ŋaá mɛ bɛ́cɔ́kɔ́lɛ́na Bandɔ́mɛsɛ́ anyía wá kɛlá anyía na kuɔŋɔ́ na ba-mɛ-lɔ́kɔ́ma hɛ́nánɔ, nuánɔ́ bámɔ́kɔ́na belumitinine háyɛ yaŋɔ́, asana ɔ́mɔtɛ́ nu tɛ lɛcá muuyé amɔ́ ɛ ŋa mɛ́ lɛca. »
30Aáná ne otéŋí, na kɔ́mɛ́na, ne Beleníse, na baacɔ bekime a bá ŋa bɔ́ bá aáhá ne beébe ŋa bɔ́ hátɔ́kɔ́na ɛndánáka, 31bá ŋá cɔbá a hɛtɔkɛ, bá kɔ́ɔ́naka beébe ne beébe báyɛ : « Ɔɔcɔ ooci tɛ ɔ́mɔɔ́ kɛla bɔkɔ a bɔɔbɛ́ a búmɔtɛ́ abɔ́ wá nyɛ́mana wu owééne eé buúbu, ta anyía bú o wuúci háya eé ciíbe cɛ ɛcaná. »
32Akílíba ná Fɛsitus ɔsɛ : « Mbɔ́kɔ ɔɔcɔ ooci ti e húlísi yááyɛ́ asana ná Sɛsáal, keyé bé me wuúci nyɛana. »
اکنون انتخاب شده:
BBƐ 26: lem
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2008, Wycliffe Bible Translators, Inc. All rights reserved.
