BBƐ 25
25
Bóol ma báta ohulisi yááyɛ́ asana ná Sɛsáal
1E elime cɛ mɔɔ́sɛ́ matátɔ́ amá Fɛsitus ŋgaá hámá e ekéti yí iisí ayɛ́ u ŋaa nyɛ́mana wu otéŋgínyi, u ŋa hátɔ́na a Sɛsalɛ́ɛ, yó súéte eé Yelúsalɛm.#25.1 Yelúsalɛm áŋa hoóhi kilomɛ́ta etíne atáánɔ na Sɛsalɛ́ɛ. 2Hɔ́á, ne betéŋínyi *beluli nyiínjie na *baáŋá bé *Besuif ŋa bɔ́ fáákɔ́na nááyá ɔ ɔkɔsɔ́mɛ́na Bóol. Bá ŋa bɔ́ bɛ́cɔ́kɔ́lɔ́kɛ́na Fɛsitus 3anyía wé lumítíne anyía bá ka hálámánána Bóol eé Yelúsalɛm ; aá taaká, bé ŋe bú wuúci táŋákɛ́na hɛbɛŋa, bá áambaka o fule wuúci ɔ́ɔ́nɔ o ohónyí. 4Mbá Fɛsitus ŋeé beébe bɛ́kámá na anyía Bóol áŋa ɔháyánɔ́ eé ciíbe cɛ ɛcaná a Sɛsalɛ́ɛ, na anyía hikúlúkúlú wuúci bɛ́muátá ŋaá cɔba ɔ ɔhálɔ́mɔ́na hɔ́á. 5Yó sólinyi ɔsɛ : « Báánɔ́ betéŋínyi á bɔ́ŋa bá ɔcɔba ɔlɔŋɔ na yaŋɔ́ anyía bébú túméke ɔɔcɔ oócí tɔkɔma hɔ́á, mbɔ́kɔ wáŋa ɔkɛlánɔ́ bɔɔbɛ́ a búmɔtɛ́. »
6Fɛsitus ŋeé límékíne hoóhi mɔɔ́sɛ́ manamanyɛ́ ta anyía mɔɔ́hátá náábɔ́, u ŋá hálɔ́mɔ́na a Sɛsalɛ́ɛ. Ɔ ɔyá ɔyá u ŋeé límíne a andaŋía yɛ́ nyɛkála, mbá ɔsɛ bé wuúci héléníne Bóol. 7Ahɛ́ Bóol ŋgaá hámá, Besuif e bé ŋe bú húlé eé Yelúsalɛm ŋe bú wuúci bɛ́bɔ́ŋɔ́lɛ́ná, bé ŋé túme o wuúci túme bɛandándá bɛ́ tɔkɔma biéŋí abɛ́ bɔ́ tɛ ɔ́mɔ bɔ́ bá ne ohónyí wú otóŋínyi anyía bɛ́áŋa taaká. 8Mbá Bóol ŋaá bá waá bɛ́hɔ́kɔ́nɔ́nɔ ɔsɛ : « Ɛ tɛ ɔ́mɔ nɔ́kɔ okotí ta ɔ́mɔtɛ́ e *bikotí bí Besuif, te e bikotí bí *Ciíbe cɛ Bandɔ́mɛsɛ́, te e bikotí bí butéŋí bú *Lóom. » 9Fɛsitus ŋaá bá wa yáambaka anyía Besuif e wuúci bílénékíne, ɛ́ɛhɛ́ u ŋa bátá Bóol ɔsɛ : « Aáná ɛ́cɛ anyía o ŋoó lumitine osúéte eé Yelúsalɛm anyía bó yóo kélísíki eémi eé buúse a bɛsana eébí e ? » 10Mbá Bóol ɔsɛ : « Ɛ ŋa mɛ́ hɛ́nyɛ́na ɔkɔɔna ɛsɛ́ ne bikotí bí butéŋí bú Lóom bá nyɛ́mana bé o mi kélísíki. Mbɔ́kɔ yaŋɔ́ ɔnɔkɔ́nɔ́ okotí yí Besuif a yɛ́mɔtɛ́, keyé kuɔŋɔ́ bɛ́muátá o ŋoó menyi bɔmbányɛ bɔmbányɛ. 11Mbɔ́kɔ ya mɛ́ŋa a nyɛnana, míɔ kɛla asana ayɛ́ yámɛ nyɛmana wu owééne eé yiíyi, ɛ tɛ ŋá mɛ́ sáŋɔ́na owé. Mbá mbɔ́kɔ ta hɛkɔma ta hɛ́mɔtɛ́ tɛ á bá taaká a tɔkɔma tukime etú bé ŋe bú mi túme, ta ɔɔcɔ tɛ a bá wu o mi fiimbie náábɔ́. Hú Sɛsáal bímuócí wá nyɛ́mana wu ɔbaka asana eeye ! »#25.11 Yeéti ekime yí butéŋí bú Lóom ŋaá bá na makɛ́nda me ohulisi nyɛsɔ́mbɔ́tɔ́na nyɛ́ nyɛkála nyɛ́ yááyɛ́ asana ne otéŋí a waáŋá u Lóom. 12Fɛsitus ŋaá lɔ́kɔ́máná na bááyɛ́ be-wuúci-lébe, mbá ɔsɛ : « Ɔ́kɔ, tɛ́ka kuɔŋɔ́ bɛ́muátá ɔ́ mɔɔ́ kɔɔna anyía Sɛsáal wá nyɛmana wu ɔ kuɔŋɔ́ kélísíki e ? Oo, ɔ ŋɔ́ɔ nyɛmána wu ɔkɔkáláka eéyé eé buúse. »
Bóol eé buúse bɔ́ na Akílíba ne Beleníse
13E elime cɛ ɔmbana ú mɔɔ́sɛ́, ne otéŋí u *Besuif Akílíba#25.13 Elóot Akílíba u ɔláta, ɔɔ́nɔ́ u Elóot Akílíba u buúse (fanáka BBƐ 12) ; u ŋaá bá weé téŋgínyi i iisí a cɛ́mɔtɛ́ a aháŋá yɛ́ namuaná cɛ́ Balɛstíne. Onyíinyí e woónjú Beleníse ŋaá bá onyíinyí e woónjú a wɔmɔtɛ́ u Túlúsile (24.24). ne onyíinyí e woónjú Beleníse ŋga bɔ́ hámá a Sɛsalɛ́ɛ, anyía bé ke bú téŋíti Fɛsitus. 14Háyɛ bá ŋa bɔ́ nyɛ́mána bé ohuliki mɔɔ́sɛ́ meéŋí a Sɛsalɛ́ɛ, Fɛsitus ŋé beébe bíkétíkínyi asana yí Bóol, ɔsɛ : « Ɔɔcɔ a wɔmɔtɛ́ áŋa aaha ewú Félis ŋeé síké eé ciíbe cɛ ɛcaná. 15Ahɛ́ ɛ ŋa mɛ́ cɔba eé Yelúsalɛm, ne betéŋínyi *beluli nyiínjie na *baáŋá bé Besuif ŋe bú wuúci túméké tɔkɔma, bɔ́ mɛ́ bata anyía yámɛ sɔ́mbɔ́tɔ́na anyía wáŋa a nyɛnana noómi. 16Mío beébe bɛ́káma anyía Boloomɛ́ŋ naŋa bá tɛ abɔ́ cáŋa owiínjie ɔɔcɔ nyɛnana wuúci tɛ́ka na ɔtálɛ́mɛ́na a nyɛkála ne be-wuúci-sɔ́mɛ́na, yɔ́ bɛ́sɔ́mɔ́kɔ tɔkɔma. 17Aáná bá ŋa bɔ́ fááya aaha ɔlɔŋɔ na yaŋɔ́. I ti ómó húli ekúlú acaha ; ɔ ɔyá ɔyá mío limine e nyikélísi bɛsana, mío wiínjie makɛ́nda me ohéléne ɔɔcɔ oócí. 18Be-wuúci-nuusi ŋa bɔ́ fááya, mbá beébe te o wuúci túme hɛkɔma ta hɛ́mɔtɛ́ a tɔkɔma atɔ́ ɛ ŋa mɛ́ bá yémi ketiki. 19Bá ŋa bɔ́ bá hú ne tusuŋísúŋí a tɔ́ ŋa lɛca úúbú olumitinine, tú lɛ́caka tɔ́na Yésus, ɔɔcɔ a wɔmɔtɛ́ ewú u ŋeé wé, mbá Bóol wuúci, waá hɛ́nyákɛ́na ɔkɔɔna anyía ɔɔcɔ oócí áŋa wɔɔ́sɔ. 20Aá yaŋɔ́, ɛ ŋaá mɛ bá i ti emí menyí anyána yámɛ́ kɛla a asana eéyé. Ɛ́ɛhɛ́ ɛ ŋa mɛ́ batá Bóol mbɔ́kɔ wáŋa wu olénéke ɔcɔba eé Yelúsalɛm, anyía bé keé wuúci kélísíki hɔ́á a asana eéyé. 21Mbá Bóol ŋe húlísí yááyɛ́ asana eé buúse ; u ŋé lénéke anyía otéŋí u Lóom wuúci bɛ́muátá é kélísíki yááyɛ́ asana. Ɛ́ɛhɛ́ i ŋeé mi iínjíé makɛ́nda me o wuúci tétényíki eé ciíbe cɛ ɛcaná ɔ ɔkɔɔ́háma ekúlú eyí i ké mí wuúci tɔ́ma ná Sɛsáal. »
22Mbá *Akílíba ɔsɛ ná Fɛsitus : « Ɛ ŋa mɛ́ aamba ɔlɔ́kɔ́ma ɔtáŋa ú ɔɔcɔ oócí, yaŋɔ́ bɛ́muátá. » Fɛsitus ɔsɛ : « Nyɛána aná ! Nɔɔyá, ɔ kɔ́ɔ́ lɔ́kɔ́máka úúyé ɔtáŋa. » 23Ɔ ɔyá ɔyá, na Akílíba ne Beleníse ŋa ka bɔ́ hámá na bɔɔcɔ bukime, bɔbɔŋɔ́kɔ́nɔ́nɔ́ na baacɔ beéŋí. Bé ŋgo óófine a andaŋía yɛ́ nyɛkála bɛsana ɔlɔŋɔ ne betéŋínyi bicénji na baáŋá bá Sɛsalɛ́ɛ. Fɛsitus ŋe yiínjíé makɛ́nda me okohéléne Bóol. Bé ŋe wuúci héléné. 24Mbá Fɛsitus ɔsɛ : « Otéŋí Akílíba, na banɔ́ bekime abá nua nɔ́ŋa aaha ɔlɔŋɔ na basɔ́, nu ŋa nɔ́ lɛ́ca ɔɔcɔ ooci a wáŋa tálɛ́mɛ́na eénú eé buúse. Besuif bekime ŋa bɔ́ fáákɔ́na náámɛ, bó koó wuúci sɔ́mɔ́kɛ́na o otúme eé Yelúsalɛm ɔ ɔkɔɔ́háma aaha a Sɛsalɛ́ɛ. Bá bɔ́mɔkɔ báyɛ u tɛ ɔ́mɔɔ́ nyɛ́mana tɔ́na wu ɔ háná líhéke. 25Mbá aá yaŋɔ́, ɛ́ ŋa mɛ́ lɛca anyía wuúci ta ɔkɛla bɔɔbɛ́ abɔ́ wá nyɛ́mana wu owééne eé buúbu. Ta híáná, ayɛ́ wuúci bɛ́muátá u ŋe húlísí yááyɛ́ asana né otéŋí u Lóom, mío súŋe anyía i ké mí wuúci tɔ́ma nááyá. 26Ɛ tɛ ámɛ kɛla ne iŋgime cɛ asana a cɛ́ ŋa lɛ́ca ɔɔcɔ ooci, anyía yámɛ ɔ́ɔ́ŋɔ́kɛ́na otéŋí nufule. Aá yaátɛ́ asana í me mí wuúci télímínyi eénú eé buúse, hɔlákáhɔ́láka oówe eé buúse, kuɔŋɔ́ Otéŋí Akílíba, anyía ɛkákɛ́la óo wuúci bícónyíki, aáná ya mɛ́ŋa wu ɔbɔ́ŋɔ bɛsana bí o wuúci ɔ́ɔ́ŋɔ́kɛ́na. 27Bú tɛ ŋáá lɔ́kɔ́mána buúse bukime, mbɔ́kɔ ɛ ŋá mɛ tɔ́ma ɔɔcɔ u ciíbe cɛ ɛcaná ɛ tɛ cálɔ́na e nufule tɔkɔma a túáŋa tú wuúci hatɛ́ákɛ́nánɔ́. »
اکنون انتخاب شده:
BBƐ 25: lem
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2008, Wycliffe Bible Translators, Inc. All rights reserved.
