Kɔn dɛ̀bɛ́ Zhã nɔ mɔ́ 7
7
Lyì bí byɛ̀bɛ́ bə̀ cĩ́ Yi myɔrhɔ w bə̀ cílə́ né ne mó
1Rə̀myɛ́ kwã nɛ́, à nɔ màlɛ́kabá bə̀na bə̀ zhǐ lũ w vɔ̀mɛ̀ nɛ́ nə̀na y wẽ́. Bə̀ yʼà zhe lũ w zhəəré rə̀na yá, mùnì rə̀ bə̀kʼa fúfǔ cɛ y ráá nə̀-fɔ̀lɔ̀ w ráá cǒ òdù ga myɛ yé. 2A nə màlɛ́ka dõ yi-pwírhí səta, è yʼà nʼê zɛ̃̀ è la dɛ̃̌. Ku w kɔ̀bɔ́ bə̀ la mʼe cĩ́ Yi nã́nyì y myɔrhɔ w rə̀ lyì bí cílə́ né ne mó ŋwɛ́nɛ́ è jɔ̃̀ wà. E bya ǹdə́ jàn e ce màlɛ́kabá bə̀na y bə̀ yʼà nɔ sɔ́má bə̀ la cɛ y ǹdə́ nə̀-fɔ̀lɔ̀ w lwɛlɛ wɔ̀rhɔ́ mɔ́ nɛ e wɔ̀: 3“Zhǐnə shɛ́ɛ́, á bə̀kʼá wɛ̀rhɛ́ lwɛlɛ cɛ y ǹdə́ nə̀-fɔ̀lɔ̀ w ǹdə́ cèmé né ne, ǹdə́ nə́ gwẽ̌ yə̀ nə́ Yi rí myɔrhɔ w rə̀ tùntùnnə̀ bé cílə́ né ne cĩ́ yé.”
4Sə bə̀ byili ni lyì bí byɛ̀bɛ́ myɔrhɔ w cĩ́ bə̀ cílə́ né ne mó yó. Bə̀ yʼà wɔ́ nunə mɔ̀ɔ̀rhɛ̀ zɔ̌m ǹdə́ shə́-èna ǹdə́ rə̀na (144.000). È yʼà wɔ́ Esərayɛl kwálsɛ́ gakó lyì.
5Zhidə kwálá y wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè (12.000),
Arəbɛn kwálá y wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè,
Gaadɛ kwálá y wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè,
6Asɛɛrɛ kwálá y wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè,
Nəfətəlyi kwálá y wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè,
Manasɛ kwálá y wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè,
7Shəmənyɔ̃ kwálá y wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè,
Levyi kwálá y wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè,
Yəsakaarɛ kwálá y wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè,
8Zabyəlɔnɛ kwálá y wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè,
Zhozefu kwálá y wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè,
Bɛ̃zhamɛ kwálá y myɛ wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè.
Wɔ́ bə̀myɛ́ gakó cílə́ né ne bə̀ cĩ́ Yi myɔrhɔ w nɛ́.
Tənə̀rh dwí gakó lyì zhǐ Yi pyɛ̀lɛ̀ də̀gwã́ y yé né
9Rə̀myɛ́ kwã nɛ́, à kʼâ la nyǔ, a pwírí lyì nánjə̀jóló, lò wàr bɛ ń la gál n nə bə̀ yó yé. È yʼà wɔ́ lũ w tənèsé gakó lyì, dwə́ kùrə̀ gakó lyì, dwə́ zɔ̀mà dúdúmə́ dúdúmə́ lyì. Bə̀myɛ́ gakó yʼà zù kàmə̀-zù-pwə̀rh, bə zɛ̃̀ bə̀ zhe kwã̌ vɔr bə̀ jɛ̀rh w bə̀ mʼê zhǐ pyɛ̀lɛ̀ də̀gwã́ y ǹdə́ Pyì-bwɛ̀lɛ́ y yé né, 10bə̀ nʼê bya bə̀ zhe: “Wɔ́ nə́ Yi rí rə̀ jě pyɛ̀lɛ̀ də̀gwã́ y yó mó ǹdə́ Pyì-bwɛ̀lɛ́ y bə̀ vwârh nə́ba.” 11Màlɛ́kabá gakó yʼà zhǐ bə kə́kɛ́lɛ́ pyɛ̀lɛ̀ də̀gwã́ y ǹdə́ náncɛsɛ́ ǹdə́ wò-nyùùrí rə̀na yá. Bə̀ gakó tu bə̀ nə̀dwə́nə́ yó, bə wùlì tɛ̃´ bə cèrhé Yi, 12bə̀ nʼê wə̀lə̀:
“Zhə̀nà, nə́ Yi rí mə̂ ǹdə́ còrhó ǹdə́ zùwə́,
ǹdə́ surhə ǹdə́ nə̀bán-co ǹdə́ ŋwɔ̀nɔ́ ǹdə́ jàn,
byinə nə̀ bə zhɔ̌ zhe yilə! Amɛ̀n!”
13Náncɛsɛ́ èdù zɛ̃̀ e bwə̀rh nè e wɔ̀: “Lyì bí byɛ̀bɛ́ bə̀ zù kàmə̀-zù-pwèsé èta mɔ́ wɔ́ byɛ̌ lyì? Yẽ̀ bə̀ shí ní?”
14A wɔ̀: “Yó-cə́bal, wɔ́ ǹmyɛ́ ǹ yě wɛ̀!”
Náncɛ y wɔ̀ nɛ̀: “Lyì bí bə̀myɛ́ èta mɔ́ tó nɔ̀nɔ̀ nánfɔ̀lɔ̀ wẽ́ bə lyɛ̃, bə̀ shàrh bə̀ gàndɛ́ Pyì-bwɛ̀lɛ́ y jal mɔ́ wẽ́ rə pwèlè. 15Wɔ́ rə̀myɛ́ è ce bə̀ zhǐ Yi pyɛ̀lɛ̀ də̀gwã́ y yé né, bə̀ nʼê cèrhé re cəcɛ̃ ǹdə́ nə̀nyɔ́nɔ́ ga rə̀ jì y wẽ́. Sə mɔ̀bɔ́ ń jě pyɛ̀lɛ̀ də̀gwã́ y yó mó mà n yìlì bì. 16Nɔrh ǹdə́ nə̀nyɛ̀lsɛ̀ ǹdə́ nə̀nyɔ́nɔ́ ǹdə́ cə-lumu kʼê tʼâ la bɛ zal yé, 17bə̀ Pyì-bwɛ̀lɛ́ y è zhǐ cəcəl w pyɛ̀lɛ̀ də̀gwã́ y yé né mó bʼa yə̀ bə̀ nə̀nɔ̀n e kál bɛ e bʼe vò nɛ̃̌ mɔ̀bɔ́ mə̀ nʼê pɛ nyǔ nə̀-bùlsì jàà wà. Yi bʼa pɔ́pɔ̌ bə̀ yə́-nàná nɛ́ gakó.”
اکنون انتخاب شده:
Kɔn dɛ̀bɛ́ Zhã nɔ mɔ́ 7: lee
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2001, Wycliffe Bible Translators, Inc. All rights reserved.