Kɔn dɛ̀bɛ́ Zhã nɔ mɔ́ 6
6
Pyì-bwɛ̀lɛ́ y vùr sɛ́bɛ́ rɛ́ pyə́lsɛ́ shə̀ldù
1Rə̀myɛ́ yó, à nɔ Pyì-bwɛ̀lɛ́ y è vùr sɛ́bɛ́ rɛ́ pyə́lɛ́ y nã́yə́ə́ yə́. Rə̀myɛ́ yi ní, a zɛ̃̀ a nyɛ̀ɛ̀ wẽ̀ dé rə̀na y òdù cəl, ò nʼô bya ǹdə dwà ta, o búbwéé o wɔ̀: “Bà!” 2À la nyǔ, a pwírí eshə-pwã̀, mɔ̀bɔ́ ń jě y mó zhe twã ń jɔ̃̀ wà. Ń jú bɛlɛ, sə bə̀ pɔ mɔ bɛlɛ jú yə́-pú, n zhǐr ń la vò n jí bɛlɛ kə́dò.
3Pyì-bwɛ̀lɛ́ y gə́ vùr pyə́lsɛ́ sə̀lyè nyâ yá, a nyɛ̀ɛ̀ wẽ̀ dé rə̀lyè nyɔ̃̌ w cəl ò bya o wɔ̀: “Bà!” 4Eshã dõ du, è nyɛ̌ nánshɛ̃̀. Bə pə mɔ̀bɔ́ ń yà ń jě y mó búlə́ shù, n nə sɔ́má ń la búlə́ ju cɛ yó, mùnì ga n ce lyì bí gu dwã.
5Pyì-bwɛ̀lɛ́ y gə́ vùr pyə́lsɛ́ sə̀tɔ̀ nyâ yá, a nyɛ̀ɛ̀ wẽ̀ dé rə̀tɔ̀ nyɔ̃̌ w cəl ò bya o wɔ̀: “Bà!” À kʼâ la nyǔ, a pwírí eshə-byĩ́. Mɔ̀bɔ́ ń yà ń jě y mó yà ń zhe ku kɔ̀bɔ́ bə̀ mʼê myɛrhɛ kɔn dùmì ń jɔ̃̀ wà. 6A nyɛ̀ɛ̀ dweme ǹdə lò cəl ta rə̀ shí wẽ̀ dé rə̀na y cəcəl w rə bya rə wɔ̀: “Búrú mún nə̀zhĩ̌ yírh wɔ́ dɛ̃ rə̀dù tum wársɛ. Mún nánfò myɛ nə̀zhĩ̌ yírhə́ nə̀tɔ̀ wɔ́ dɛ̃ rə̀dù tum wársɛ. Sə nwə̃̌ y ǹdə́ sɛ̃´ mɔ́ twə́r tɛ̀nɛ́ gàà yé.”
7Pyì-bwɛ̀lɛ́ y gə́ vùr pyə́lsɛ́ sə̀na nyâ yá, a nyɛ̀ɛ̀ wẽ̀ dé rə̀na nyɔ̃̌ w cəl ò bya o wɔ̀: “Bà!” 8À kʼâ la nyǔ, a pwírí eshə-pùlí. Mɔ̀bɔ́ ń yà ń jě y mó yíl Bəcu. Sə cílú yʼà tó mo. Bə pə bɛ ŋwɔ̀nɔ́ lũ w yó. Lũ w gə yʼà wɔ̌ ò la dwã w bɔ̌n kùkùlə̀ nə̀na, wɔ́ kùkùl lé rə̀dù y bə̀ yʼà la ŋwɔ̀nɔ́ bə zə búlə́ shù ǹdə́ nɔrh ǹdə́ címsi, e súlí gɔ-wẽ̀, bə gu rə̀ lyì bí.
9Pyì-bwɛ̀lɛ́ y gə́ vùr pyə́lsɛ́ sə̀nu nyâ yá, a nə byɛ̀bɛ́ bə̀ yʼà ce bə gu bə̀ gə́ bwəl Yi zɔ̀mɛ̀ rɛ́, bə jʼa yə̀ Yezu zhə̀n-cínnə yil mó, vwĩ̀-jìlú w kùr wə̀. 10Bə̀ yʼà nʼê bya ǹdə́ bə̀ jàn gakó bə̀ zhe: “Nə́ yó-cə́bal, cɛ̀nɛ̀ ǹdə́ zhə̀n cə́bal, ǹ nə́ ǹ dɛ̃̀ kɔn la mʼe yí dǒ ń bə́ bùr lũ w lyì bí bùrsí, sə́ tu ǹ lyim ni bə̀ gə́ ló nə́ jal mɔ́ tɛ̃´ mó yilə?”
11Bə pə lò gakó kàmə̀-zù-pwã̀, bə zɛ̃̀ bə wɔ̀ bɛ̀ bə̀ bə̀ zhìlì bə̀ yala nɛ námpɔ́lɛ́ gwẽ̌, bə̀ lyì dwã gwẽ̌ ŋwɛ́nɛ́ bə̀ da-byâ bɛ́ byɛ̀bɛ́ bə̀myɛ nʼê twĩ̀ Kristə tum dí mú wẽ́, bə̀ la gu ǹdə bə̀ gə́ gu bə̀myɛ nɛ́. Sə bə̀ gakó gwẽ̌ tɛ̀nɛ́ yé.
12À kʼa nə Pyì-bwɛ̀lɛ́ y kə́dò. E vùr pyə́lsɛ́ shə̀ldù nyâ yá. Sə rə̀myɛ́ yi ní, cɛ y jʼa zhízhǐ dɛ̃´dɛ̃´. Nə̀nyɔ́nɔ́ w jǐrh námbyṹ fúrí, cànà y jǐrh nánshɔ̃̀ ǹdə jal ta. 13Cã̀mə́sɔ̌sɛ́ nʼê kwẽ sə̀ lwé tɛ̃´ cɛ y yó ǹdə zho nánfɔ̀lɔ̀ gə́ yʼa zɛ̃̀ ò nʼô lwé épyǐl-gwə́r tɛ̃´ nɛ́. 14Dɛ̃̌ yi rí wɛ̀rhɛ́ námpɔ́lɛ́ námpɔ́lɛ́ ǹdə bə̀ gə́ yʼa pyípyílí sá-vɔ nɛ́ rə jé. Pyààrɛ́ ǹdə́ cɛmɛ nɛ́ nə̀ ŋwɛ́nɛ́ nə̀-fɔ̀lɔ̀ cəcəl w mó gakó zhǐr rə̀ jààsɛ́ wa. 15Lũ w pyâ bɛ́ ǹdə́ lyì-fwààlɛ́, ǹdə́ shə̀dɛ́ɛ́sɛ yó-cìnə́, ǹdə́ nə̀cɛ̀nà, ǹdə́ jàn cìnə́, ǹdə́ yómə́, e súlí lyì byɛ̀bɛ́ bə̀ cǐ bə̀ cìn mú gakó dùr bə shèè myə̀lə́ wẽ́ ǹdə́ nə́kuuli bwə̀lə́ w pyâr wa. 16Sə bə̀ yʼà nʼê wə̀l pyààrɛ́ ǹdə́ nə́kuulí ni, bə̀ rə̀ wǔr rə pú bi tɛ̃´ rə shèè bè, mùnì mɔ̀bɔ́ ń jě pyɛ̀lɛ̀ də̀gwã́ y yó mó bə̀ká n nə bɛ yé, sə bə lú Pyì-bwɛ̀lɛ́ y lyim dí yé né, 17bə̀ Yi ǹdə́ Pyì-bwɛ̀lɛ́ y lyi-shùùrí dɛ̃ rɛ́ nánfɔ̀lɔ̀ w wɔ́ zà. Wɔ́ mɔ̌ lò ń mà n ŋwɛ̀nɛ́ n zhì?
اکنون انتخاب شده:
Kɔn dɛ̀bɛ́ Zhã nɔ mɔ́ 6: lee
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2001, Wycliffe Bible Translators, Inc. All rights reserved.