Zhakɛ 5
5
Ámyɛ̌ nə̀cɛ̀nà bɛ́ mə̂ sʼá kúrh
1Èlâsɛ̃´, ámyɛ̌ nə̀cɛ̀nà bɛ́, cilinə kɔn dɛ̀bɛ́ à la ába byilu mú: kúrhnə á wɔ́wɛ́lɛ́ zwini rí rə̀ bàn ába zal mɔ́ yilə. 2Á nə̀cɛ̀ndɛ́ dɛ̀rhɛ̀; cɔ̃́ jú á gàndɛ́. 3Á sánə́má mɔ́ ǹdə́ á wársɛ́ jú rə shɛ̀l. Sə rə̀ jú mú bʼa yə̀ zhə̀n-kɔn rə byili bʼâ yə̀ cɛ̀nɛ̀ twĩ̀ yé. Mə̀ mʼa jí ába ǹdə myǐn ta. Lũ w zhɔ̌ bwəlse, á jʼâ gwẽ̌ nʼá pyà nə̀cɛ̀ndɛ̀ á cĩ́ dɛ̃̌. 4Á kwè lyì bə jə̀r á cɛsɛ́, sə á yə̀ bɛ̀ kwɛ̃̌ yé. Bə̀ nʼê kúrhə́, sə lũ gakó cǐnnə mó nyɛ̀ɛ̀ bə̀ cələ né. 5Á pyà wu-nyɔ̃̀ dwí gakó cɛ yó, á jú kùjú á sú, á nù kɔn lyɛ̃ cɛ nɛ, á jǐrh ǹdə bə̀-tânsɛ bə̀ la gu ta. 6Á kɔ́ wu-cángá cìnə́ bùrsì á gu bi, bə̀ yə̀ cẽ yé.
Pyɛ́nɛ́na á cìnə̀, bə̀ Cinu twírí y bwəlse
7Da-byâ, pyɛ́nɛ́na á cìn á mʼá dɛ̃̀ Cinu twírí yə́. Nyǐnə vwàlnà gə́ ya n wɛ̀rhɛ́ nɛ́: ń nə́ ń dɛ̃̀ tɛ̀bɛ́ ń dù cɛ y wẽ́ mó byâ náàcɛ̀nà; ń nə́ ń dɛ̃̀ dwà nã́yə́ə́ y ǹdə́ nánkwaá y ga ǹdə́ cìn-pyɔ́nɔ́. 8Ámyɛ pyɛ́nɛ́na á cìnə̀, sʼá zə wu-jɔ̀, bə̀ Cinu twírí y bwəlse.
9Da-byâ, á bə̀kʼá zə ŋwɔ́ŋwɔ̌ ǹdə́ dwã yé, mùnì ga Yi bə̀kʼa kə́ á bùrsì rə pə ába dóó yé. Nyǐnə bùr-kárna mɔ́ ŋwɛ́nɛ́ bwə̀rə̀ y nyí ni. 10Da-byâ, kwěnə Yi nyì-zwennə bé bə̀ zɔ̀m Cinu yil lé yil mó nà. Bə̀ shɛ̀nɛ́ bə pyɛ́nɛ́ bə̀ cìn bə nwɛ̀nɛ̀. 11Tɛ́rɛ́na lyì bí byɛ̀bɛ́ bə̀ shɛ̀nɛ́ nɔ̀nɔ̀ w mɔ́ yò. Nə́myɛ̌ nʼé wə̀l bə̀ nyǐ bə̀ wɔ́ wu-nyɔ̃̀ cìnə́. Bə̀ zɔ̀m Zhɔɔbɛ wu-jɔ̀ w yò á nyɛ̀ɛ̀. Á yě kɔn dɛ́ dɛ̀bɛ́ Cinu pɔ mɔ rə̀myɛ́ kwã nɛ́ mɔ́. Cinu wɔ́ wu-bɔ̀nɔ̀ ǹdə́ nɔ̀nɔ̀-dǔr cə́bal zhə̀nà.
12Da-byâ, kɔn du: á bə̀kʼá bwəl nyí ǹdə́ Yi yil lé, ráá cɛ yá, ráá kɔn dõ yé. Á gə mə̂ sʼá wɔ̀ bə̀ ɔ̃̀ɔ̃̂, sʼe yə̀ ɔ̃̀ɔ̃̂; á gə mə̂ sʼá wɔ̀ bə̀ ɔ̃́ʼɔ̃, sʼe yə̀ ɔ̃́ʼɔ̃; mùnì ga Yi bə̀kʼa kə́ á bùrsì rə pə ába dóó yé.
13Á mə̀dù gə nə́ ń nwɛ̀nɛ̀, sə n lwə̀l Yi. Ń mɔ̀ gə zhe wu-nyɔ̃̀, sə n nún n cèrhé Yi. 14Ń mɔ̀ gə tú ń bə jàn zhe, sə n byẽ̀ á gùlú w yé né cìnə́ bé bə bʼe lwə̀l Yi ń yilə, sə bə zə nwə̃̌ bə tútǔ mu Cinu yil lé yilə. 15Bə̀ gə lwə̀l Yi ǹdə́ bə̀ wun gakó, Yi-co w òmyɛ́ bʼa zwẽ nə̀bwɛ̃̀ mɔ́. Cinu mà n wárh mɔ. Ń gə wɛ̀rhɛ́ yə̀-bəlwàálɛ myɛ, ń mà n nə rə̀ sǔbri.
16Byilinə á dwə́ə́ré dwã nɛ, sʼá lwə̀l Yi dwã yilə, mùnì á nə bəsàzùlí. Wu-cángá cí gə lwə̀l Yi, ń Yi lwə̂l mó zhe jàn nánfɔ̀lɔ̀. 17Elyi yà ń wɔ́ numbyíní ǹdə nə́ gakó ta, sə ń lwə̀l Yi ǹdə́ ń wu gakó mùnì ga dwà y bə̀kʼá nyɔ̀ yé. Sə zhə̀n ga dwà y wɛ̀rhɛ́ byinə nə̀tɔ̀ ǹdə́ fwã́, ǹdə́ è nɛ̃̌ yə̀ cɛ y yó twərh yé. 18N kə́ n lwə̀l Yi, sə è nyɔ̀wà, jíjí lyĩ rə ce byâ.
19Da-byâ, ámyɛ̌ mə̀dù gə ywə̀r zhə̀n dɛ́ sɔ́má y yó n jé, sə da-byǐ mə̀dù ká n zə mɔ n bà, 20lwarna bə̀ lò ǹ ká ń zə yə̀-bəlɔ̀lɔ́ cí n kwɛ̃̀ n yẽ̌ lwɛlɛ sɔ́má y ń yà ń ŋwɛ́nɛ́ è yó mó ne, ǹ zwẽ mo cu jɔ̃̀ wà, sə ń mà n nə ń yə̀-bəlwàálɛ nánzhəzhɔ̌ sǔbri.
اکنون انتخاب شده:
Zhakɛ 5: lee
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2001, Wycliffe Bible Translators, Inc. All rights reserved.