Zhakɛ 4
4
Lò mɔ̀bɔ́ ǹ só lũ w nyə̀ná nɛ́, ǹ wɔ́ Yi zù-bal
1Wɔ́ yẽ̀ búlə́ dwí gakó shí ní á cəcəl wə? È də̀ á shilə námməlwâlsɛ́ sə̀ ŋwɛ́nɛ́ á wun ní wẽ́ mó sə̀ nʼê nwɛ̀nɛ̀ ába? 2Á nʼá yâl kɔn, á gə́ tʼá nɛ rɛ mɔ́ ce, á pú á zɛ̃̀ á jǐrh lyì-gurnə. Á zhe bwɛ̃̌-dǔr, á tʼá nɛ tɛ̀bɛ́ á nʼá yâl mɔ́ yé, á nʼá mà nyə̀-pâr á mʼá bwí dwã. Wɔ́ á gə́ tʼá lwə̀l tɛ̀bɛ́ á nʼá yâl mɔ́ Yi ni mú è ce, á tʼá nɛ rɛ yé. 3Sə á gə nʼá lwə̀l Yi ni, á zɛ̃̀ á tʼá nɛ kaka, sə́ nyǐ wɔ́ á lwə̂l mó mə̀ bə mə̂ yé. Á nʼá lwə̀l kɔn dɛ̀bɛ́ rə̀ bʼa pə wu-nyɔ̃̀ á cìcì nì. 4Á tʼá zhì nà èdù yó yé. Á yə̀l bə̀ ǹ gə só lũ w nyə̀ná nɛ́, wɔ́ zùùrì ǹ nə́ ǹ jí ǹdə́ Yi nà? Lò mɔ̀bɔ́ ń nə́ ń yâl n yə̀ lũ w dɔwa, rə̀-ná-cí jǐrh Yi zù-bal. 5Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: “Yi nʼê yâl bə̀ Eshirhə y rə̀ co nə́ wẽ́ mó dúdú cìní nə́ba.” Á nʼá bùl bə̀ wɔ́ nánfò? 6Sə pɛnɛ́ y kɛ̀bɛ́ Yi nʼê pɛ nə́ba mɔ́ du kɔn gakó. Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ jàà dõ wẽ́ bə wɔ̀:
“Yi bə cìn-byilu cìnə́ só yé,
sə rə̀ nʼê cĩ́ bwəl cìn-lwəl cìnə́ yó.”
7Rə̀myɛ́ ce, shɛ̀nɛ́na Yi nyí ni, sʼá zhɛ̃̀ Shətana yá, bʼè bʼa dùr e vò kwã nɛ́ kwã nɛ́ e yẽ̌ ába. 8Bwəlsenə Yi ni, sʼá yẽ̌ bə̀ rə̀myɛ bʼa bwəlse ámyɛ nɛ. Ámyɛ̌ yə̀-bəlwàálɛ́ cìnə́ bé, sámna á jɛ̀sɛ́, sə jǐrh wárhgáá. Ámyɛ̌ myìnù cìnə́ bé, kwɛrhɛna á wun ní nə jǐrh wárhgáá. 9Cenə á wun ní zhìlì. Kúrhnə. Cenə á mɔ̀n dɛ́ jǐrh yə́-nàná, sʼá ce á wu-nyɔ̃̀ w jǐrh wu-zhìlù. 10Lwəlnə á cìn tɛ̃´ Cinu yé né, sʼá yẽ̌ bə̀ ń mà n zhẽ̌ ába dɛ̃̌.
Ǹmyɛ́ mɔ̀bɔ́ ǹ nə́ ǹ kɛ́ ǹ dõ bùrsì mú, etər ǹ nə́ ǹ nyǐ ǹ cìn ní?
11Da-byâ, á bə̀kʼá zɔ̀m dwã yil námməlwɛ̀lɛ́ yé. Lò mɔ̀bɔ́ ǹ nə́ ǹ zɔ̀m ǹ dõ yil námməlwɛ̀lɛ́, ráá ǹ nə́ ǹ kɛ́ ǹ dõ bùrsì, wɔ́ Yi nyə́ né yil námməlwɛ̀lɛ́ ǹ nə́ ǹ zɔ̀mà. Wɔ́ nə̀myɛ́ bùrsì ǹ nə́ ǹ kɛ́. E jà ǹ gə nə́ ǹ kɛ́ Yi nyə́ né bùrsì, ǹ kə́ ǹ də̀ nə̀ zwennə yé; ǹ jǐrh nə̀ bùr-kárna. 12Wɔ́ Yi dúdú rə̀ nʼê pɛ nyə́, rə jʼà nʼê kɛ́ bùrsì. E jà wɔ́ rə̀myɛ́ dúdú rə̀ wɔ̌ rə̀ nʼê vwârh lò, rə jʼà wɔ̌ rə̀ nʼê gwi myɛ. Sə wɔ́ yẽ̀ ǹmyɛ nə́ ǹ cĩ́ ǹ cìn ní ǹ mə́ ǹ nə́ ǹ kɛ́ ǹ dõ bùrsì?
Á bə̀kʼá zɔ̀m ǹdə wɔ́ ámyɛ̌ á cǐ á myə̂l lé ta yé
13Èlâsɛ̃´, ámyɛ̌ byɛ̀bɛ́ á nʼá wə̀lə̀: “Zà ráá nəkɔla, nə́ bʼâ vò cɔ w kɔ̀bɔ́; sə nə́ bʼâ wɛ̀rhɛ́ byin námpúm gàà, nə́ yè wẽ̀ nə́ zhízhílí, nə́ bʼâ nə wársɛ.” Cilinə kɔn dɛ̀bɛ́ à la ába byilu mú: 14á yə̀l á gə́ la nɛ́ yál nəkɔl dɛ̃ rɛ́ yé. Á wɔ́ ǹdə nəkɔkɔ́lɛ́ myɔ̀nɔ̀ ta. Ò tʼâ jíjírhí yé, èlâsɛ̃´-lâsɛ̃´ ǹdə́ ò tuwə. 15Á yʼâ mə̂ sʼá wɔ̀: “Kɔn gə wɔ́ Cinu pùbùlə̀, nə́ bʼâ yə̀ nɛ́, nə́ wɛ̀rhɛ́ èta ráá èta.” 16Sə ámyɛ̌ tʼá wə̀l èta yé, á zɛ̃̀ á nʼá zhẽ̌ á cìn dɛ̃̌ ǹdə́ cìn-byilu zɔ̀mà dúdú. Cìn-dɛ̃̌-zhõ̌ mó mə̀myɛ́ dwí rí wɔ́ kɔ̀-bəlwɛ̀lɛ́. 17Lò mɔ̀bɔ́ ǹ yě cɛ̀nɛ̀ rɛ́ tɛ̀bɛ́ ǹ yà ǹ mə̂ sə́ wɛ̀rhɛ́ mɔ́, ń zɛ̃̀ ǹ yə̀ rɛ̀ wɛ̀rhɛ́, rə̀myɛ́ wɔ́ yə̀-bəlɔ̀lɔ́ ǹ wɛ̀rhɛ́.
اکنون انتخاب شده:
Zhakɛ 4: lee
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2001, Wycliffe Bible Translators, Inc. All rights reserved.