Zhakɛ 3
3
Dɛ̃̌ ǹ cìn ǹ nyì-púpwírí rí wẽ́
1Da-byâ, á bə̀kʼá yə̀ nánzhəzhɔ̌ á nʼá yâl á yə̀ kàrmɔ̀ byilnə yé. Á yě bə̀ nə́myɛ̌ byɛ̀bɛ́ nə́ wɔ́ kàrmɔ̀ byilnə bé mó, nə́ bùrsí bʼa yə̀ zwini du lyì bí dwã bɛ́. 2Nə́ gakó nʼé dwé wẽ̀ nánzhəzhɔ̌ wẽ́. Lò mɔ̀bɔ́ ń nə́ ń zɔ̀m ń tá ń dwé gaga, sə́ nyǐ ń já ń wɔ́ wárhgáá, ń wɔ̌ ń cìn námpúm. 3Nə́ gə co càmá eshərh nyú w mùnì ga sə zwẽ nyí, nə́ rʼé ce sə̀ zhə̀l nə́ gə́ só mə̀gã̌. 4Nyǐnə bǔ-bwələ né nánfwààlɛ́ myɛ. Nə̀ nyɛ̌ nánfwààlɛ̀, zho nánfɔ̀lɔ̀ ò nʼô zə nɛ ò zhə̀lə̀. Sə ǹdə́ rə̀myɛ́ ga, wɔ́ dɔ̌ námpɔ́lɛ́ bə̀ mʼê swàl nɛ, nə jʼà vò mɔ̀bɔ́ ń nə́ ń dùr nè mó gə́ nə́ ń yâl bə̀ nə̀ zhəl mə̀gã̌. 5Mə̀jòlò w myɛ wɔ́ èta. Ò wɔ́ yala nɛ́ kə̀kàlà námpɔ́lɛ́, o jʼà wɔ̌ ò zhẽ̌ ò cìn dɛ̃̌ ǹdə́ wẽ̀ nánfwààlɛ̀.
Nyǐnə gɔ w myɛ gə́ wɔ́ nɛ́. Ò gə wɔ̌ sʼo byì ní yil myɛ, myǐn námpɔ́lɛ́ yʼa ŋwɛ̀nɛ́ w mə jí. 6Mə̀jòlò w wɔ́ ǹdə myǐn ta. Ò wɔ́ nə́ yala nɛ́ kə̀kàlà, e jà wɔ́ òmyɛ́ wẽ́ lwɛlɛ nʼê shí ní, ò lwɛlɛ rɛ́ nʼê lyɛ́ɛ nə́ yala nɛ́ gakó ne. Myǐn-jì myǐn mú nʼê shí ò wẽ́ mə̀ zhìlì nə́ yò, nə́ lul yi ní ga, kɔn mʼe yí nə́ cu. 7Numbyíní wɔ̌ è bʼa ce gɔ vwàmá ǹdə́ kúmsi ǹdə́ dɔma dwí gakó, ǹdə́ wẽ̀ tɛ̀bɛ́ gakó rə̀ ŋwɛ́nɛ́ bǔ w mú tó ǹdə è gə́ nʼê yâl nɛ́. È gaga mɔ́ nʼê ce rə̀ tó ǹdə è gə́ nʼê yâl nɛ́. 8Sə lò lò wàr mə̀jòlò w yé. Ò wɔ́ kɔ̀-bəlwɛ̀lɛ́, ò tʼâ zhì shɛ́ɛ́ gaga yé. Ò sú ǹdə́ swã̀ kɛ̀bɛ́ è cɛ̀, è nʼê gwi lò. 9Nə́ rʼé zə w nə́ mʼé cèrhé Cinu nə́ Da mɔ́; e jà wɔ́ òmyɛ́ myɛ nə́ mʼé bwəl lwɛlɛ nə́ pɛ numbyínsí Yi wɛ̀rhɛ́ rə bʼe nyɛrhɛ rə̀ cìcì mú ni. 10Nyí rí rə̀myɛ́ rə̀dù y rə̀ nʼê bwəl lwɛlɛ, e jà wɔ́ rə̀myɛ́ rə̀ nʼê bwəl cɛ̀nɛ̀ myɛ. E jà kɔn bə mə̂ sʼe yə̀ èta yé da-byâ. 11Nə̀-bùlì èdù wɔ̌ è bùl nɛ̃̌ mɔ̀bɔ́ mə̀ nyɛ̀, e jʼà bù nɛ̃̌ mɔ̀bɔ́ mə̀ nyɛ̌ cɛ̀ɛ́ myɛ? 12Da-byâ, épyìlú wɔ̌ ò bʼa ce shã̀? Nà wɔ́ sɛ̃´-cǒ ò wɔ̌ ò bʼa ce épyìlə́? Èta myɛ, nə̀-bùlì gə nʼê bùl nɛ̃̌ mɔ̀bɔ́ mə̀ nyɛ̌ párɛ́, è wàr nɛ̃̌ mɔ̀bɔ́ mə̀ nyɛ̀ è la búl yé.
Surhə né nyɛ̀bɛ́ nə̀ nʼê shí dɛ̃̌ Yi sõ mó wɔ́ cìn-lwəl nyə̀ná
13Da-byâ, lò gə ŋwɛ́nɛ́ á wẽ́ ń nə́ ń bùl bə̀ ń lɔ́ n jà ń zhe surhə, sə n zə cìn-lwəl ǹdə́ tùm-ècɛ̀nà n mə n byili ń lárma mɔ́ ǹdə́ ń surhə né. 14Sə bwɛ̃̌-dǔr gə ŋwɛ́nɛ́ á wun ní wẽ́, á wun ní gə nyɛ̌ bárhɛ́, lò gakó gə nə́ ń pyà ń cìnə̀, sʼá bə̀kʼá zhẽ̌ á cìn dɛ̃̌ yé, sʼá bə̀kʼá zɔ̀m kɔn dɛ̀bɛ́ rə̀ də̀ zhə̀n á bʼá mà nyə̀-pâr ǹdə́ zhə̀n dɛ́ yé. 15Surhə né nə̀myɛ́ mɔ́ də̀ dɛ̃̌ Yi sõ nə̀ shí ní yé. Nə̀ wɔ́ lũ w numbyínə́ bé surhə. Wɔ́ Shətana sõ nə̀ nʼê shí ní. 16Bwɛ̃̌-dǔr gə ŋwɛ́nɛ́ mə̀gã̌, lò kə́ ń tá ń nyǐ ń dõ sõ yé, wɔ́ yààyàà tùntwə̃̀ə̃̀ dúdú ǹdə́ lwɛlɛ dwí gakó rə̀ ŋwɛ́nɛ́ gàà.
17Sə lò mɔ̀bɔ́ ń zhe surhə nyɛ̀bɛ́ nə̀ shí dɛ̃̌ Yi sõ mó: nã́yéé ré, ń wɔ́ wárhgáá; rə̀myɛ́ kwã nɛ́, ń nə́ ń pyà yə̀-zùlə́; ń zhe wu-bɔ̀nɔ̀; ń bə yó-kùlù zhe yé; ń zhe nɔ̀nɔ̀-dǔr; ń nə́ ń pyà cɛ̀nɛ̀ twéé gakó; ń tá ń lwe lyì dwã nɛ yé; ń tá ń myìnì ń dwã bɛ́ yé. 18Byɛ̀bɛ́ bə̀ nʼê pyà yə̀-zùlə́ mó ce yə̀-zùlə́ ŋwɛ́nɛ́ lyì bí cəcəl wə, sə wɔ́ cángá tùntwə̃̀ə̃̀ né bə̀ nʼê wɛ̀rhɛ́ mɔ́ nə̀ wɔ́ yə̀-zùlə́ né bə̀ nʼê pyà mɔ́ byâ.
اکنون انتخاب شده:
Zhakɛ 3: lee
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2001, Wycliffe Bible Translators, Inc. All rights reserved.