Zhakɛ 2
2
Á bə̀kʼá zə á yírhə́ á cír lyì bí yé
1Da-byâ, ámyɛ̌ byɛ̀bɛ́ á zù nə́ Cinu Yezu Kristə mó ń wɔ́ zùwə́ cə́bal mɔ́, á bə̀kʼá zə á yírhə́ á cír lyì bí yé. 2Dədɛ̃̌nɛ, lò mɔ̀bɔ́ ń wɔ́ nə̀cɛ̀m-bal, ń co sánə́má cə̀byǐ ń jə̀fɔ́lɛ́ nɛ, n zù kàmə̀-zwǐ kɛ̀bɛ́ è nʼê jə́jɛ̀mɛ́ gə tú á dwã-gùlú w jàà wà. Nə̀mɔ̀ myɛ zɛ̃̀ n bà, ń zù kàmə̀-zù-ebwərse. 3Á zɛ̃̀ á nyǐ mɔ̀bɔ́ ń zù kàmə̀-zwǐ y è càn mɔ́ á na, á wɔ̀ mɔ̀: “Bə̂ jòm nyɔ̀nɔ̀, bə̀ jàà y èmyɛ́ càn,” á zɛ̃̀ á wɔ̀ nə̀mɔ̀ mɔ́ nɛ: “Zhǐ dɛ̃̌, ráá jǒm tɛ̃´ shó w wə.” 4Á gə nʼâ wɛ̀rhɛ́ èta, è də̀ lyì bí á nʼá zə á yírhə́ á círə́? Èta mɔ́, də̀ lyì bí bùrsì á nʼá kɛ́ ǹdə́ bùlə̀ námməlwâlsɛ?
5Da-byâ nántwə̂rh, cilinə: Yi cír byɛ̀bɛ́ lũ w lyì bí nʼê nyǐ ǹdə nə̀mwà ta mɔ́, mùnì bə yə̀ rə̀myɛ́ nɛ zhú mú nə̀cɛ̀nà, sə bə nə cəl tənà y rə̀ bwəl è nyí rə̀ lyì bí ni mú wẽ́. 6Sə ámyɛ̌ tʼá nyǐ nə̀mwà bɛ́ á nɛ yé. Kʼâ wɔ́ nə̀cɛ̀nà bɛ́ á nʼá nyǐ á nɛ, e jà wɔ́ bə̀myɛ́ bə̀ nʼê nwɛ̀nɛ̀ ába, bə̀ nʼê zə ába bə̀ zhə̀l bùrsì. 7Wɔ́ bə̀myɛ́ bə̀ nʼê fulsi yil lé náàcɛ̀nɛ́ y Yi pɔ ába mɔ́.
8Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: “Swéné ǹ dõ ǹdə ǹ cìcì ta.” Nyí rí rə̀myɛ́ wɔ́ Yi pyɛ̀lɛ̀ rɛ́ nyí. Á gə zwẽ de, á wɛ̀rhɛ́ cɛ̀nɛ̀. 9Sə á gə zə á yírhə́ á cír lyì bí, wɔ́ lwɛlɛ á nʼá wɛ̀rhɛ́; sə Yi nyí rí nʼê kɛ́ á bùrsì, á gə́ tʼá zwẽ de mó yilə. 10Lò gə nə́ ǹ zwẽ nyə́ né gakó, ń zɛ̃̀ ń bə̂ dó rə̀dù, wɔ́ nə̀ gakó ǹ dówə́. 11Yi wòwə̀: “Bə̀ká fwə̂l yé.” Rə kʼe wɔ̀: “Bə̀ká gu lò yé.” Ǹ gə tá ǹ fwə̀lə́, ń jʼâ gu lò, wɔ́ Yi nyə́ né gakó ǹ yə̀ zwẽ yé. 12Zɔ̌mna sʼá wɛ̀rhɛ́ ǹdə lyì byɛ̀bɛ́ Yi bʼa zə cìn-cìnú nyí rí rə kə́ bə̀ bùrsì ta. 13Zhə̀nà, Yi gə la lò mɔ̀bɔ́ ń tá ń dùr ń dwã bɛ́ nɔ̀nɔ̀ bùrsí kɔ́, rə̀ tʼâ la ńmyɛ nɔ̀nɔ̀ dǔr yé. Sə lò mɔ̀bɔ́ ǹ zhe nɔ̀nɔ̀-dǔr, bùrsì ywẽ bə mɔ́ zhe yé.
Ǹ gə zhí Yi ni, sə́ twĩ̀ Yi-ni-zhú tùntwə̃̀ə̃̀
14Da-byâ, lò gə wò bə̀ ǹ zhí Yi ni, ń jà ǹ tá ǹ wɛ̀rhɛ́ kɔn dɛ̀bɛ́ rə̀ nʼê byili bə̀ ǹ zhí Yi ni mú, Yi-ni-zhú mú mə̀myɛ́ dwí rí wɔ̌ mə̀ bʼa vwârh mɔ́? 15Dədɛ̃̌nɛ, á da-byǐ ráá á nəkɔ́ mə̀dù gə bə gɔ̀nɔ̀ zhe ń la mə n círhí ń cìnə̀, ń bə kaka zhe ń la ń nyú w co, 16á mə̀dù zɛ̃̀ n wɔ̀ mɔ̀: “Zhəl ǹdə́ yə̀-zùlə́, ń pyà kàmə̀-zwǐ ń zù, ń bə́ cə̀r wàr rɛ́ yé ne, sə́ pyà kùjú ń jí,” n jà ń yə̀ mɔ kɔn dɛ́ dɛ̀bɛ́ ń zhe rə̀ tum mú pɛ, rə̀myɛ́ wɔ̌ rə̀ bʼa sɛ̃ mɔ? 17Wɔ́ èta ǹdə́ Yi-ni-zhú mú myɛ. Ǹ tùntwə̃̀ə̃̀ né gə tʼâ byili bə̀ ǹ zhí Yi ni, sə́ lwar bə̀ ǹ Yi-ni-zhú mú wɔ́ nánfò.
18Lò gə wòwə̀: “Lyì jàlà zhí Yi ni; jàlà wɔ́ tùntwə̃̀ə̃̀ náàcɛ̀nà bə̀ nʼê twĩ̀,” à bʼa wɔ̀ rə̀-ná-cí ni: “Ǹ bʼâ wɛ̀rhɛ́ etər ń wɔ̀ bə̀ ǹ zhí Yi ni, ǹdə́ ǹ gə tá ǹ twĩ̀ tùntwə̃̀ə̃̀ nyɛ̀bɛ́ nə̀ mə̂ dwã ǹdə́ Yi-ni-zhú mú? Àmyɛ́ wɔ́ à tùntwə̃̀ə̃̀ né dɛnnɛ à bʼa tó né a byili mú bʼà zhí Yi ni.” 19Ǹ nə́ ǹ zwẽ nyí bə̀ Yi wɔ́ rə̀dù sá? Kɔn càn. Nə̀cílsí námməlwâlsɛ́ myɛ cìcì nʼê zwẽ nyí rí rə̀myɛ́, sə ywẽ zhe se, sə̀ nʼê kəkə. 20Bə-surhə-zhe cí, ǹ yə̀l bə̀ ǹ gə zhí Yi ni, ń jà ǹ tá ǹ wɛ̀rhɛ́ kɔn dɛ̀bɛ́ rə̀ nʼê byili bə̀ ǹ zhí Yi ni, ǹ Yi-ni-zhú mú bə kùr zhe nà? 21Nə́ nàmbal Abəraham wɔ́ etər Yi tó né rə nyǐ mu ǹdə ń bə dóó zhe ta? Wɔ́ ń tùntwə̃̀ə̃̀ né dɛnnɛ rə̀ tó né, ń gə́ yà ń zɔ ń byǐ Yəzakɛ n cĩ́ vwĩ̀-jìlú w yó ń la mə n zwə́l vwĩ̀ rí n pə Yi ni mú yilə. 22Ǹ bə nɛ? Ń Yi-ni-zhú mú ǹdə́ ń tùntwə̃̀ə̃̀ né ga yʼà nʼê tó dwã. Ń tùntwə̃̀ə̃̀ né zɛ̃̀ nə ce ń Yi-ni-zhú mú jǐrh námpúm. 23Èta, kɔn dɛ́ dɛ̀bɛ́ bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ mó pyìrh. Bə̀ kɛ̃ bə wɔ̀: “Abəraham zhí Yi ni. Rə̀myɛ́ ce, Yi nyǐ mu ǹdə ń bə dóó zhe ta.” Rə byẽ̀ mò bə̀ rə̀ dɔwa. 24Á na? Numbyíní wɔ́ è tùntwə̃̀ə̃̀ né nə̀ nʼê ce è kʼê bə dóó zhe Yi yírh wə. Sə è də̀ è gə́ zhí ri mú dúdú yé.
25Wɔ́ èta kɔn yàl nɛ́ ǹdə́ kə-nə̀fòló Arayaabɛ myɛ. Ń yà ń zwẽ Esərayɛl lyì bí tùntúmə́ ń sõ kɛ̀lɛ́ wa, n sɛ̃ bɛ bə kʼa kwè sɔ́má dõ bə vò jè. Rə̀myɛ́ ce Yi nyǐ mu ǹdə ń bə dóó zhe ta. 26Shíshìrhə́ né gə tɛ̀nɛ́, yala nɛ́ cùwə̀. Èta myɛ, Yi-ni-zhú tùntwə̃̀ə̃̀ né gə tɛ̀nɛ́, Yi-ni-zhú mú bə kùr zhe yé.
اکنون انتخاب شده:
Zhakɛ 2: lee
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2001, Wycliffe Bible Translators, Inc. All rights reserved.