Kɔlɔɔsɛ 4
4
1Ámyɛ̌ yó-cìnə́ bé, zəna á tùntùnnə̀ bé ǹdə́ wu-cángá, sʼá bə̀kʼá cír jàlà á só, á zɛ̃̀ á bə jàlà só yé. Á yě bʼâmyɛ zhe Yó-cə́bal mə̀dù ń ŋwɛ́nɛ́ Arəzana wa.
Pwəə nə́ ń cící Kɔlɔɔsɛ Kristə-lyì bí
2Cenə jàn nɛ́ ǹdə́ Yi-co twéé gakó; zəna á yírhə́, sʼá ce Yi nə̀bán twéé twéé. 3Lwə̂lnə Yi nə́myɛ yilə, bə̀ rə̀ pə nə́ba sɔ́má nə́ bwə̀l rə̀ zɔ̀mɛ̀ rɛ́, sə nə́ bwə̀l kɔn dɛ̀bɛ́ rə̀ shèè Kristə shò-kwã nɛ́ mɔ́ nə́ byili, bə̀ wɔ́ zɔ̀mɛ̀ rɛ́ rə̀myɛ́ bwə̂l mó yil bə̀ co ne byə̀nə́-jù wə̀. 4Lwə̂lnə Yi mùnì ga a ŋwɛ̀nɛ́ a byili rə̀ zɔ̀mɛ̀ rɛ́ pamparɛ̃ɛ̃ ǹdə à gə́ mə̂ sʼa byili ri ní.
5Zəna á cìn ǹdə́ surhə nyɛ̀bɛ́ nə̀ càn ǹdə́ lyì bí byɛ̀bɛ́ bə̀ də̀ Kristə-lyì mú, sʼá wɛ̀rhɛ́ á gə́ wɔ̌ nɛ́ á zə á cìn náàcɛ̀nɛ́ twéé gakó. 6Cenə á zɔ̀mà nɛ́ yə̀ zɔ̀mà nyɛ̀bɛ́ nə̀ càn twéé twéé, nə̀ zhe shil, sʼá lwar náàcɛ̀nɛ́ á gə́ bʼâ lyár lò mɔ̀bɔ́ gakó ń la ába zɔ̀mɛ̀ bwə̂rh mó né.
Pwəə nə́ ń ce Kɔlɔɔsɛ lyì bí ń mə́ ń gwi ń sɛ́bɛ́ rɛ́ yó
7Nə́ da-byǐ nántwə̂ Tishiki mà n byili ába kɔn gə́ wɔ́ nɛ́ à sõ. Ń nə́ ń tó ne ń twĩ̀ Cinu tum dí ǹdə kɔn gə́ mə̂ nɛ́. 8Wɔ́ rə̀myɛ́ è ce à nʼâ twĩ̀ mù á sõ, mùnì ga n byili ába kɔn gə́ wɔ́ nɛ́ nə́ sõ, sə n pə ába cícú n súlí. 9À nʼâ twĩ̀ ńmyɛ̌ ǹdə́ Oneshim. Ńmyɛ wɔ́ nə́ da-byǐ nántwə̂. Wɔ́ ámyɛ̌ lò ǹdə́ mɔ. Bə̀myɛ́ bə̀lyè y ga mʼa byili ába kɔn gə́ wɔ́ nɛ́ nyɔ̀nɔ̀ mɔ́ gakó.
10Arəsətarkɛ nə́ ń ce ába. Ń tó ne ń ŋwɛ́nɛ́ byə̀nə́-jù wə̀. Barnabaasɛ nəkɔ́-byǐ Markɛ myɛ nə́ ń ce ába. Nə́ yʼâ zɔ̀m ń yò ǹdʼába. Ń gə tú á sõ, sʼá zwẽ ń zhəəlé cɛ̀nɛ̀. 11Yezu mú mɔ̀bɔ́ bə̀ nʼê byẽ̀ bə̀ Zhusətuusi mú myɛ nə́ ń ce ába. Zhwifubá byɛ̀bɛ́ bə̀ jǐrh Kristə-lyì mú wẽ́, wɔ́ bə̀myɛ́ bə̀tɔ̀ y bə̀ nʼê tó ne bə̀ twĩ̀ Yi pyɛ̀lɛ̀ rɛ́ yilə, sə bə̀ pɔ nɛ wu-jɔ̀.
12Epafəraasɛ nə́ ń ce ába. Ńmyɛ wɔ́ ámyɛ̌ lò. Ń wɔ́ Yezu Kristə tùntùnnə̀. Ń nə́ ń lwə̀l Yi á yil dɛ̃´dɛ̃´ twéé gakó, mùnì ga á yə̀ rə̀ lyì nántwə̂rh, sʼá zhì kẽkẽ á wɛ̀rhɛ́ Yi pùbùlə̀ kɔn gakó wẽ́. 13Ń nə́ ń twĩ̀ dɛ̃´dɛ̃´ ámyɛ̌ ǹdə́ Laɔdɛɛsɛ Kristə-lyì bí ǹdə́ Yərəpoli nyə̀ná bɛ́ ga yilə. Àmyɛ́ cìcì mú wɔ̌ à wə̀l rə̀myɛ́. 14Nə́ dɔwa Lwiki ń wɔ́ lyìtwə́r mó ǹdə́ Dɛmaasɛ myɛ nʼê ce ába.
15Wálna Laɔdɛɛsɛ Kristə-lyì bí ǹdə́ Nəmfa ǹdə́ gùlú w lyì bí bə̀ nʼê jòm dwã yó ń sõ kɛ̀lɛ́ w mɔ́ nɛ bə̀ nyǐ nə́ rʼé ce be. 16Á gə kàrmə̀ sɛ́bɛ́ rɛ́ tɛ̀bɛ́ á zhɛ̀, sʼá pə rɛ Laɔdɛɛsɛ gùlú w lyì bí myɛ nɛ bə kàrmə̀. Sə à sɛ́bɛ́ rɛ́ tɛ̀bɛ́ bə̀ la pə rə shí Laɔdɛɛsɛ rə bə̀ á sõ mó, sə ámyɛ kàrmə̀ rɛ̀. 17Wálna Arəcipi ni bə̀ ń zə tum dí tɛ̀bɛ́ Cinu pɔ mɔ mɔ́ cɛ̀nɛ̀, sə n twĩ̌ di náàcɛ̀nɛ́ n báásɛ.
18Wɔ́ àmyɛ́ Pwəə à nʼâ zɔ̀m zɔ̀mà nɛ́ nyɛ̀bɛ́ à mʼâ ce ába. Wɔ́ àmyɛ́ cìcì jɛ̃̀ è kɛ̃ nɛ. Lyǐrhnə bə̀ nyǐ wɔ́ byə̀nə́-jù w à ŋwɛ́nɛ́.
Yi bʼa cĩ́ bwəl á yó!
اکنون انتخاب شده:
Kɔlɔɔsɛ 4: lee
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2001, Wycliffe Bible Translators, Inc. All rights reserved.