Tùntúmə́ bé 22
22
1“À dabá, à zhə̀m-má ǹdə́ à nyáná, cilinə kɔn dɛ́ dɛ̀bɛ́ à la ába byilu mú à cìn-vwârh yilə...”
2Bə̀ gə́ pwírí Pwəə wɔ́ bə̀ dwí rí zɔ̀mà nɛ́ ń nə́ ń zɔ̀mà, bə jʼa kwɛrhɛ bə̀ zhǐ shɛ́shɛ́. Pwəə súlí n wɔ̀: 3“À wɔ́ Zhwifu. Bə̀ lùl nè Tarsɛ nɛ́, Shilishi tənà y wa, sə wɔ́ Zhərəzalɛm nɛ́ nyɔ̀nɔ̀ bə̀ kɔ̀n nɛ̀ nɛ́. Wɔ́ Gamaləyəə ń byili ni nə́ dabá lùl-e-pwírí y nyə́ né pamparɛ̃ɛ̃. À yʼà nʼâ ce yə̀wâl nɛ́ dɛ̃´dɛ̃´ ǹdə́ Yi tum dí ǹdə ámyɛ gakó gə́ nʼá wɛ̀rhɛ́ nɛ́ zà mɔ́. 4À yʼà nʼâ nwɛ̀nɛ̀ lyì bí byɛ̀bɛ́ bə̀ nʼê tó Yezu Kristə sɔ́má y mɔ́. À yʼà nʼâ ce bə̀ zal bə̀ bala ǹdə́ bə̀ kana ga bə lyẽ bə ce byə̀nə́-jù wə. À yʼà nʼâ ce bə̀ gwi jàlà myɛ. 5Yi jì y vwĩ̀-zwə́lnə bé yé né cìnə́ bé gakó náncɛ y ǹdə́ Zhwifubá náncɛsɛ́ gakó yě bə̀ wɔ́ zhə̀n à nʼâ zɔ̀mà. Bə̀ yʼà pɔ nɛ sábá à mʼâ la vò a pə nə́ da-byâ Zhwifubá byɛ̀bɛ́ bə̀ ŋwɛ́nɛ́ Damaasɛ nɛ́ mɔ́ nɛ, mùnì ga a ŋwɛ̀nɛ́ a zə lyì bí byɛ̀bɛ́ bə̀ zù Yezu mú a kʼa mʼa bə̀ Zhərəzalɛm bə pə bɛ còrhò-tum.
6“À gə́ kwè sɔ́má y a bʼà nʼâ bwəlse, twər rə̀dù sá, nə̀nyɔ́nɔ́ cəcəl wə, pwẽ̀ nánfɔ̀lɔ̀ rə̀ nʼê jə́jɛ̀mɛ́ shí dɛ̃̌ rə yə̂r rə kə́kɛ́lɛ́ nɛ. 7A tu tɛ̃´ a jʼa nyɛ̀ɛ̀ cəl rə̀ nʼê wə̀l nè: ‘Swəə, Swəə, byè yil ǹ nə́ ǹ nwɛ̀nɛ̀ nɛ̀?’ 8A zɛ̃̀ a bwə̀rh a wɔ̀: ‘Ǹmyɛ́ wɔ́ mɔ̌ lò yó-cə́bal?’ Cəl lé wɔ̀: ‘Àmyɛ́ wɔ́ Nazarɛtɛ lyì bal Yezu, mɔ̀bɔ́ ǹ nə́ ǹ nwɛ̀nɛ̀ mɔ́.’ 9Byɛ̀bɛ́ bə̀ yʼà tó ne mó nə pwẽ̀ dé, sə bə̀ yə̀ mɔ̀bɔ́ ń yà ń nə́ ń zɔ̀m ǹdə́ nɛ mɔ́ cəl lé nyɛ̀ɛ̀ yé. 10A zɛ̃̀ a wɔ̀: ‘Cinu, wɔ́ bə̀kɔ́n à mə̂ sʼa wɛ̀rhɛ́?’ N wɔ̀ nɛ̀: ‘Zɛ̃̀ ń vò Damaasɛ. Ǹ gə yú gàà, bə̀ mʼa byili mú kɔn dɛ̀bɛ́ Yi nʼê yâl bə̀ ǹ wɛ̀rhɛ́.’ 11Pwẽ̀ dé gə́ yʼà nʼê jə́jɛ̀mɛ́ dɛ̃´dɛ̃´ mɔ́ ce, rə lyə̂r à yírhə́ né, nə̀ yʼà kʼê bɛ̃´ nɛ yé, sə à tó-dwã bɛ́ zɔ à jɛ̃̀ nɛ̀ bə mʼe vò Damaasɛ.
12“Bal mə̀dù yà ń ŋwɛ́nɛ́ gàà ń yíl Ananyaasɛ. Ń yà ń nə́ tó Yi ni ǹdə́ ń wu gakó, ń nə́ ń zwẽ rə̀ nyə́ né náàcɛ̀nɛ́, sə Zhwifubá byɛ̀bɛ́ bə̀ yʼà ŋwɛ́nɛ́ gàà mɔ́ gakó yʼà nʼê zɔ̀m ń yil náàcɛ̀nɛ́. 13N zɛ̃̀ n bə̀ à sõ n wɔ̀: ‘Da-byǐ Swəə, ǹ yírhə́ né mʼa kʼa púr!’ À yírhə́ né jʼa púr rə̀myɛ́ yi ní cìcì, a nə mɔ pamparɛ̃ɛ̃. 14N zɛ̃̀ n wɔ̀ nɛ̀: ‘Nə́ nàmbala bɛ́ Yi rí cír mó shãã ga, mùnì ga ń lwar rə̀ pùbùlə̀ né, sə́ nə wu-cángá cə́bal Yezu ǹdə́ ǹ yírhə́, sə́ nyɛ̀ɛ̀ ń cìcì nyì-zɔ̀mɛ̀, 15bə̀ ǹ bʼâ yə̀ ń zhə̀n-cínnə lyì bí gakó yé né, sə ǹ bʼâ bwə̀l kɔn dɛ̀bɛ́ ǹ yírhə́ nɔwa, ǹ zhã̌ jʼa nyɛ̀ɛ̀ mɔ́ ń byili. 16Èlâsɛ̃´, bə̀kɔ́n ǹ kə́ ǹ jě ǹ nə́ ǹ dɛ̃̀? Zɛ̃̀ dɛ̃̌ ń zù Cinu, ń zwẽ nɛ̃̌-shɔ, mùnì ga ń nə ǹ yə̀-bəlwàálɛ́ sǔbri.’
17“Rə̀myɛ́ kwã nɛ́, a kʼa kwɛ̃̀ a vò Zhərəzalɛm. Dɛ̃ rə̀dù, à yʼà ŋwɛ́nɛ́ Yi jì y kɔ̀nɔ́ w wa, à nʼâ ce Yi. Kɔn jʼa wɛ̀rhɛ́ nɛ ǹdə dàrhà ta. 18A nə Cinu, n wɔ̀ nɛ̀: ‘Zɛ̃̀ ń du Zhərəzalɛm làlà, bə̀ ò lyì bí tʼâ la shɔ̀nɔ́ bə zwẽ kɔn dɛ́ dɛ̀bɛ́ ǹ la byilu à shò-kwã nɛ́ mɔ́ yé.’ 19A zɛ̃̀ a wɔ̀: ‘Cinu, bə̀ cìcì mú yě bʼà yʼà nʼâ zhə̀l bə̀ dwã-gùúlí jìsí wẽ́, a ce bə zə lyì bí byɛ̀bɛ́ gakó bə̀ zù ǹmyɛ́ mɔ́, bə ce bé byə̀nə́-jù w bə mà. 20Bə̀ gə́ gu ǹ zhə̀n-cínnə Ecẽẽ yi ní, àmyɛ́ cìcì yʼà ŋwɛ́nɛ́ gàà, sə à nyí yʼà ŋwɛ́nɛ́ byɛ̀bɛ́ bə̀ gu mu mú kwã. Wɔ́ àmyɛ́ à yʼà nʼâ yìlì bə̀ kàmə̀-zwǐsí ni.’ 21Cinu zɛ̃̀ n wɔ̀ nɛ̀: ‘Zhəl! À nʼâ twĩ̀ mú yé né yé né, byɛ̀bɛ́ bə̀ də̀ Zhwifubá mó sono.’ ”
Shə̀dɛ́ɛ́sɛ́ yó-cə́bal mɔ́ lwar bə̀ Pwəə wɔ́ Orɔm lò
22Lyì-zhâ bɛ́ cili cili Pwəə zɔ̀mà nɛ́ kɔn mʼe yí ń gə́ wò bə̀ Cinu twĩ̀ mù byɛ̀bɛ́ bə̀ də̀ Zhwifubá sõ mó, bə zɛ̃̀ bə̀ nʼê bya bə̀ zhe: “Ce bə gu bal mɔ́ mɔ̀bɔ́ n jé lũ w kɔ̀bɔ́ wẽ́! Ń bə mə̂ sə n yə̀ nɛ́ kə́dò yé.”
23Bə zɛ̃̀ bə̀ nʼê búbwéé, bə̀ nʼê vùr bə̀ kàmə̀-zǔrh bə̀ dul dɛ̃̌, bə̀ nʼê tɛ̃´ shó bə̀ lɛ dɛ̃̌. 24Shə̀dɛ́ɛ́sɛ́ yó-cə́bal mɔ́ zɛ̃̀ n pə nyí bə̀ bə̀ zə Pwəə bə zù shə̀dɛ́ɛ́sɛ́ jàà y wa, sə bə̀ mà mɔ̀ ǹdə́ dànə̀shàárɛ, mùnì ga n byili kɔn dɛ́ dɛ̀bɛ́ rə̀ ce lyì-zhâ bɛ́ nʼê búbwéé bə̀ mʼê pyà ń lwɛlɛ èta mɔ́.
25Bə̀ gə́ lyẽ mo ǹdə́ nyínsí bə̀ la mâ, n wɔ̀ shə̀dɛ́ɛ́sɛ zɔ̌m yó-cə́bal mɔ́ ń yà ń zhǐ gàà mɔ́ nɛ: “Á wɔ̌ á mà Orɔm lò ǹdʼá yə̀ ń bùrsì bùr?”
26Shə̀dɛ́ɛ́sɛ zɔ̌m yó-cə́bal mɔ́ gə́ nyɛ̀ɛ̀ rə̀myɛ́, n zhǐr n vò n wɔ̀ sə̀ gakó yó-cə́bal mɔ́ nɛ: “Nyǐ ǹ yà ǹ la yò pyâ. Bal mɔ́ wɔ́ Orɔm lò.”
27Sə̀ yó-cə́bal mɔ́ zɛ̃̀ n yí n wɔ̀ Pwəə ne: “Ǹ gə wɔ́ Orɔm lò zhə̀n ga, sə́ wɔ̀ nɛ̀.”
Pwəə wɔ̀ mɔ̀: “À wɔ́ Orɔm lò.”
28Yó-cə́bal mɔ́ zɛ̃̀ n wɔ̀ mɔ̀: “Àmyɛ́ yil wɔ́ wársɛ nánzhəzhɔ̌ à kwɛ̃̌ a bʼa jǐrh Orɔm lò.”
Pwəə wɔ̀ mɔ̀: “Àmyɛ́ da wɔ́ Orɔm lò.”
29Rə̀myɛ́ yó, byɛ̀bɛ́ bə̀ yʼà la mɔ mâ mɔ́ jʼa làà dwã nɛ bə yẽ̌ mo. Yó-cə́bal mɔ́ gə́ tú n lwar bə̀ Pwəə wɔ́ Orɔm lò, ń wu zɛ̃̀, ń gə́ ce bə zə mɔ bə lyẽ ǹdə́ nyáná mɔ́ yilə.
Bə̀ zə Pwəə bə vò Zhwifubá bùrsí gùlú w lyì bí yé né
30Shə̀dɛ́ɛ́sɛ́ gakó yó-cə́bal mɔ́ yà ń nə́ ń yâl n lwar kɔn dɛ́ dɛ̀bɛ́ è ce Zhwifubá nʼê ce cà Pwəə nyí ni mú kùr pamparɛ̃ɛ̃. Rə̀myɛ́ ce, è zɛ̃̀ nəkɔkɔ́lɛ́ yá, n ce bə byẽ̀ Yi jì y vwĩ̀-zwə́lnə bé yé né cìnə́ bé ǹdə́ Zhwifubá bùrsí gùlú w lyì bí bə bə̀ dwã yó. N zɛ̃̀ n ce bə lwə̂r nyáná nɛ́ nyɛ̀bɛ́ bə̀ yʼà mʼe lyẽ Pwəə mó, n ce bə zə mɔ bə bə̀ bùrsí gùlú w lyì bí yé né.
اکنون انتخاب شده:
Tùntúmə́ bé 22: lee
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2001, Wycliffe Bible Translators, Inc. All rights reserved.
