Tùntúmə́ bé 18
18
Pwəə bwə̀l yò-ècɔ̀nɔ̀ nyí rí Kɔrɛ̃tɛ nɛ́
1Rə̀myɛ́ kwã nɛ́, Pwəə zhǐr Atɛnnɛ nɛ́ n vò Kɔrɛ̃tɛ. 2Ń gə́ yú gàà, n nə Zhwifu mə̀dù ń yíl Akəlaasɛ, ń wɔ́ Pɔ̃ tənà y lò, ńmyɛ̌ ǹdə́ ń kɛ̃ Pərishii yʼà shí Yitəlyi bə bə̀ dùlìdùlì, bə̀ Orɔm pyɔ̌ Kolote yà ń pɔ nyí bə̀ Zhwifubá gakó du Orɔm nɛ́. Pwəə lyɛ̃ n vò bə̀ sõ. 3Ńmyɛ̌ ǹdə́ bə̀myɛ́ ga tum dí yʼà wɔ́ rə̀dù: bə̀ yʼà nʼê swɛ̃̀ wẽ̀ dé tɛ̀bɛ́ bə̀ nʼê pwí kwə̀ə́rhe mó. Ń yà ń nə́ ń zwɛ̃̀ bə̀ sõ, bə̀ mʼê tó dwã bə̀ twĩ̀. 4Shìrhə́ dɛ̃ gakó, Pwəə yà ń nə́ ń zhə̀l Zhwifubá dwã-gùlú jì y wə, ń nə́ ń zhərh ǹdə́ Zhwifubá ǹdə́ Gərɛkɛbá, mùnì ga n pul bə̀ surhə.
5Shəlaasɛ ǹdə́ Timote shí Masɛdwanɛ bə lyɛ̃ bə bà. Pwəə já n yẽ̌ tumə né dwã bɛ́ gakó ne, ń nə́ ń bwə̀l Yi zɔ̀mɛ̀ rɛ́. Ń yà ń nə́ ń byili Zhwifubá ne pamparɛ̃ɛ̃ bə̀ wɔ́ Yezu ń wɔ́ Kristə mó. 6Sə Zhwifubá yʼà tʼâ cili kɔn dɛ̀bɛ́ Pwəə yà ń nə́ ń byili mú yé. Bə̀ yʼà nʼê tùrh mò. N zɛ̃̀ n sə̃̀ ń jɛ̀rh n yẽ̌ be, n wɔ̀: “Á gə dwĩ̀ á cìnə̀, wɔ́ ámyɛ̌ cìcì yò. Rə̀myɛ́ kʼê də̀ àmyɛ́ yò yé. Sə kɔn zhí èlâsɛ̃´, wɔ́ byɛ̀bɛ́ bə̀ də̀ Zhwifubá mó sõ à la nɛ́.”
7N zhǐr gàà n vò bal mə̀dù sõ. Bal mɔ́ yíl Ticuusi Zhusətuusi. Ń yà ń só Yi. Ń kɛ̀lɛ́ y yʼà ŋwɛ́nɛ́ dwã-gùlú jì y nyí ni. 8Dwã-gùlú jì y yó-cə́bal Krisipuusi ǹdə́ ń kɛ̀lɛ́ y lyì bí gakó jʼa zù Cinu. Kɔrɛ̃tɛ lyì nánzhəzhɔ̌ gə́ cili Pwəə zɔ̀mà nɛ́, bə̀myɛ jʼa zù Kristə, sə bə̀ pɔ bɛ nɛ̃̌-shɔ.
9Cəcɛ̃ èdù, Cinu lyí mu, n wɔ̀ mɔ̀: “Bə̀ká shĩ̌ ǹ nyí yé. Zɔ̌m, sə ǹ bə̀ká dùr ywẽ yé, 10bə̀ àmyɛ́ cìcì ŋwɛ́nɛ́ ǹdə́ mɔ́. Lò lò wàr ń la mɔ́ zal n wɛ̀rhɛ́ lwɛlɛ yé, bə̀ byɛ̀bɛ́ bə̀ wɔ́ àmyɛ́ lyì mú já cɔ w kɔ̀bɔ́ wa.”
11Pwəə mɛ̃ Kɔrɛ̃tɛ nɛ́ n wɛ̀rhɛ́ byin ǹdə́ fwã́, ń mə́ ń byili Yi zɔ̀mɛ̀ rɛ́ lyì bí ni.
12Rə̀myɛ́ kwã nɛ́, bal mə̀dù ń yíl Galyɔ̃ jǐrh Akəyi tənà y yó-cə́bal. Zhwifubá zɛ̃̀ bə̀ nʼê jí zùùrì ǹdə́ Pwəə. Bə wɛ̀rhɛ́ nyí rə̀dù bə zə mɔ bə mʼe vò bùrsí gùlú w yé né, 13bə wɔ̀: “Bal mɔ́ mɔ̀bɔ́ nə́ ń cìrh lyì bí ń ce né, mùnì ga bə̀ bə̀kʼa kʼe cèrhé Yi ǹdə nə́ nyə́ né gə́ nʼê byili ní yé.”
14Pwəə zɛ̃̀ ń la lyár. Galyɔ̃ já n wɔ̀ bɛ: “Ámyɛ̌ Zhwifubá, cilinə. È gə yʼà wɔ́ èmà-byǔr tumə ń twĩ̀, ráá yò kɔ̀bɔ́ ò jɛ̀ ń wɛ̀rhɛ́, à yʼà bʼa cili á zɔ̀mà nɛ́ ǹdə kɔn gə́ mə̂ nɛ́. 15Sə è gə́ wɔ́ ámyɛ zɔ̀mà ǹdʼá yilə, ǹdʼá nyə́ né shò-kwã nɛ́ á nʼá mà nyə̀-pâr nɛ́ mɔ́, rə̀myɛ́ ŋwɛ́nɛ́ ámyɛ̌ jɔ̃̀ wà. Àmyɛ́ wàr gàà à la nɛ́ zú yé.”
16N jì bì bùrsí jì y wẽ́ n ce pwẽ̀ nè. 17Bə yə́yɛ́lɛ́ bə zə dwã-gùlú jì y yó-cə́bal Sɔsətɛnnɛ bùrsí jì y nyí ni cìcì bə mà. Sə Galyɔ̃ yə̀ rə̀ gá yé.
Pwəə shí ń sɔ́má y n ká n vò Ancɔɔsɛ, Siri tənà y wa
18Rə̀myɛ́ kwã nɛ́, Pwəə mɛ̃ Kɔrɛ̃tɛ nɛ́ gwẽ̌ n dɛnɛ, fòró n zɛ̃̀ n zhǐr n yẽ̌ Kɔrɛ̃tɛ Kristə-lyì bí ni, ńmyɛ̌ ǹdə́ Pərishii ǹdə́ Akəlaasɛ, bə vò Səncere. Ń yà ń bwəl kɔn nyí Yi ni. Rə̀myɛ́ ce, bə̀ gə́ yú gàà, n fɔ̃̀ ń yó wə́. Bə zɛ̃̀ bə zù bǔ-bwəl bə̀ la mwə̃́ y byɔrhɔ bə lyɛ̃ bə vò Siri.
19Bə̀ gə́ byɛrhɛ mwə̃́ y bə zhɛ̀, bə só Efɛɛzɛ nɛ́. N wɔ̀ Pərishii ǹdə́ Akəlaasɛ nɛ bə̀ bə̀ mɛ̃ gàà. N zɛ̃̀ n lyɛ̃ n vò Zhwifubá dwã-gùlú jì y wẽ́ n zhərh ǹdə́ bɛ. 20Sə bə̀ yʼà nʼê lwə̀l mò bə̀ ń mɛ̃ bə̀ sõ dwã màngɛlɛ́. 21N cẽ, n wɔ̀ bɛ: “Kɔn gə wɔ́ Yi pùbùlə̀, à mʼa kʼa bà.”
Pwəə zɛ̃̀ n zhǐr Efɛɛzɛ nɛ́ n kə́ n zù bǔ-bwəl 22n byɛrhɛ n vò Səzarɛ. N zhì gàà n vò Zhərəzalɛm, n ce Kristə-lyì bí, n zɛ̃̀ n ká n vò Ancɔɔsɛ, 23n dɛnɛ námpɔ́lɛ́. N kə́ n zhǐr n tó Galəshi ǹdə́ Fərizhi tənèsé wə, mùnì ga n cící Kristə kwã-lyì bí gàà mɔ́ gakó, n súlí bə̀ wu-jɔ̀.
Apɔlɔɔsɛ zhə̀l Efɛɛzɛ n lyɛ̃ n vò Kɔrɛ̃tɛ
24Zhwifu mə̀dù yà ń tú Efɛɛzɛ ń yíl Apɔlɔɔsɛ. Ń yà ń wɔ́ Alɛsãdəri lyì byǐ. Ń yà ń zhe surhə; ń yě Yi zɔ̀mɛ̀ rɛ́ sɛ́bɛ́ rɛ́ zɔ̀mà nɛ́ náàcɛ̀nɛ́.
25Bə̀ yʼà byili mu Cinu sɔ́má yá. Sə è gə wɔ́ nɛ̃̌-shɔ mɔ́ shò-kwã nɛ́, wɔ́ Zhã nɛ̃̌-shɔ mɔ́ dúdú yò ń yà ń yě. Ǹdə́ rə̀myɛ́ ga, ń yà ń nə́ ń bwə̀l Yezu yò-ècɔ̀nɔ̀ nyí rí ǹdə́ ń wu gakó, ń nə́ ń byili rə̀ kùr ré náàcɛ̀nɛ́. 26N vò Zhwifubá dwã-gùlú jì y wẽ́, n ji kùr ń nə́ ń zɔ̀m ǹdə́ wu-jɔ̀. Sə Pərishii ǹdə́ Akəlaasɛ gə́ nyɛ̀ɛ̀ ń zɔ̀mà nɛ́, bə zə mɔ bə vò bə̀ sõ, bə kwɛrhɛ bə byili mu Yi sɔ́má y yé-shò pamparɛ̃ɛ̃.
27Rə̀myɛ́ kwã nɛ́, n zɛ̃̀ ń nə́ ń yâl n vò Akəyi tənà y wa. Efɛɛzɛ Kristə-lyì bí wɔ̀ bə̀ kɔn càn. Bə zɛ̃̀ bə kɛ̃ sɛ́bɛ́ bə pɔ̃, bə̀ ń gə yú sə n pə tənà y èmyɛ́ Kristə kwã-lyì bí ni, mùnì ga bə zwẽ ń zhəəle cɛ̀nɛ̀. Ń gə́ yú gàà, Yi sɛ̃ mɔ n ŋwɛ̀nɛ́ n sɛ̃ Kristə-lyì bí byɛ̀bɛ́ bə̀ ŋwɛ́nɛ́ gàà mɔ́ nɛ dɛ̃´dɛ̃´. 28Ńmyɛ̌ ǹdə́ Zhwifubá gə la zɔ̌m gakó, ń ya n zɔ̀m n ji bi tɛ̃´ lyì bí gakó yírh wə. Sə ń yà ń nə́ ń tó Yi zɔ̀mɛ̀ rɛ́ sɛ́bɛ́ rɛ́ zɔ̀mà nɛ́ dɛnnɛ ń byili bi bə̀ wɔ́ Yezu ń wɔ́ Kristə mó.
اکنون انتخاب شده:
Tùntúmə́ bé 18: lee
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2001, Wycliffe Bible Translators, Inc. All rights reserved.
