2 Timote 1
1
Pwəə nə́ ń ce Timote
1-2À byì-sónó Timote, wɔ́ àmyɛ́ Pwəə à nʼâ kɛ̃ sɛ́bɛ́ rɛ́ tɛ̀bɛ́ à la mɔ́ pɔ. À wɔ́ Yezu Kristə tùntúm ǹdə́ Yi pùbùlə̀. Yi twĩ̀ nì bʼà bwə̂l nyǔ mú rə̀ bwəl mə̀ nyí mú a byili. Nyǔ mú mə̀myɛ́ mɔ́ wɔ́ Yezu Kristə dɛnnɛ nə́ rʼé tó né nə́ nɛ mɔ. Nə́ Da Yi ǹdə́ nə́ Cinu Yezu Kristə bʼa cĩ́ bwəl ǹ yó, sə bə dùr ǹ nɔ̀nɔ̀, bə pɔ̃́ yə̀-zùlə́!
Pwəə nə́ ń ce Yi nə̀bán Timote yilə
3À nʼâ lyǐrh ǹ yò à Yi-co wẽ́ cəcɛ̃ ǹdə́ nə̀nyɔ́nɔ́ ga. À nʼâ ce Yi nə̀báná. Wɔ́ rə̀myɛ́ tum à nʼâ twĩ̀ ǹdə́ wu kɔ̀bɔ́ ò wɔ́ wárhgáá, ǹdə à nàmbala bɛ́ ta. 4À gə lyǐrh ǹ yə́-nàná nɛ́ yò, à só sʼa kʼa nə mɔ́, mùnì ga a wu yə̀ nyɛ̀n námpúm. 5À yě ǹ Yi-ni-zhú mú yò w à wẽ́ zhə̀n zhə̀nà. Ǹ Yi-ni-zhú mú mə̀myɛ́ wɔ́ ǹ ná náncɛ Loyiisi ǹdə́ ǹ ná Eniisi nyân mɔ́ dwí rí. À yě bə̀ rə̀myɛ́ wɔ́ zhə̀nà.
6Wɔ́ rə̀myɛ́ è ce, à nʼâ lyǐrh mó bə̀ ǹ zə pɛnɛ́ y Yi pɔ mɔ́ à gə́ cĩ́ à jɛ̀sɛ́ ǹ yó yi ní mú kẽkẽ. 7Zhə̀nà, Eshirhə y Yi pɔ nə́ba mɔ́ tʼâ ce lò dùr ywẽ yé. È nʼê pɛ jàn, ǹdə́ sónó, ǹdə́ cìn-pyɔ́nɔ́. 8Rə̀myɛ́ ce, ǹ bə̀ká dùr cìzhìl ǹdə́ zhə̀n cṹ Cinu mú shò-kwã nɛ́ yé. Ǹ bə̀ká dùr cìzhìl ǹdə́ àmyɛ́ mɔ̀bɔ́ à ŋwɛ́nɛ́ byə̀nə́-jù w nə́ Cinu mú yil mó myɛ yé. Ǹmyɛ́ wírí ń shɛ̀nɛ́ ń tó àmyɛ́ nɛ ń nwɛ̀nɛ̀ yò-ècɔ̀nɔ̀ nyí rí yil ǹdə́ Yi jàn. 9Wɔ́ Yi rə̀ vwârh nə́ba, rə byẽ̀ nə́ba bə̀ nə́ yál rə̀ lyì, sə è də̀ nə́ tùntwə̃̀ə̃̀ yil yé. Wɔ́ rə̀myɛ́ cìcì pùbùlə̀ ǹdə́ rə̀ yò-ècɔ̀nɔ̀ w yilə. Rə̀ wɛ̀rhɛ́ yò-ècɔ̀nɔ̀ w òmyɛ́ Yezu Kristə jàn yilə, ǹdə́ lũ w gwẽ̌ yə̀ kùr ji yé. 10Sə èlâsɛ̃´, yò-ècɔ̀nɔ̀ w òmyɛ́ tó nə́ Zwennə Yezu Kristə twírí y dɛnnɛ o du pamparɛ̃ɛ̃. Wɔ́ ńmyɛ̌ ń zhìlì cu mú jàn dɛ́, n tó yò-ècɔ̀nɔ̀ nyí rí dɛnnɛ n byili nə́ba nyǔ mú mə̀ tʼâ la zhɔ̌ mɔ́.
11Yi cír ne bʼà yál rə̀ tùntúm, a bwə̀l rə̀ yò-ècɔ̀nɔ̀ nyí rí, sʼa cèrhè rè lyì bí ni. 12Wɔ́ rə̀myɛ́ è ce à nʼâ nwɛ̀nɛ̀ èlâsɛ̃´, sə à tʼâ dùr cìzhìl yé. Rə̀myɛ́ gakó wẽ́, à yě mɔ̀bɔ́ à zhe ń zhə̀n dɛ́ mɔ́ párá, sə à yě pamparɛ̃ɛ̃ bə̀ ń zhe jàn ń bà n yìlì kɔn dɛ̀bɛ́ ń pɔ nɛ mɔ́, kɔn mʼe yí dɛ̃ rɛ́ nánkwɛɛ́ rɛ́. 13Zɔ̀mà nɛ́ nyɛ̀bɛ́ à byili mú mú wɔ́ zhə̀nà. Cĩ́ ni ǹ wẽ́, sə́ wɛ̀rhɛ́ ǹdə nə̀ gə́ nʼê byili ní ǹdə́ Yi-ni-zhú, ǹdə́ sónó w kɔ̀bɔ́ Yezu Kristə pɔ nə́ba mɔ́. 14Zə nyə́ né nyɛ̀bɛ́ à pɔ mɔ́ mɔ́, ǹdə́ Eshirhə náàcɛ̀nɛ́ y è ŋwɛ́nɛ́ nə́ wẽ́ mó jàn, bə̀ nə̀ zhe kùr dɛ̃´dɛ̃´.
15Ǹ cìcì mú yě bə̀ Azhi tənà y lyì bí gakó dùr bə yẽ̌ ne, sə Shəzhəə ǹdə́ Erəmɔzhɛ̃ɛ̃ myɛ dùr bə yẽ̌ ne. 16Sə à nʼâ lwə̀l Cinu bə̀ ń dǔr Onəzhəfɔɔrɛ ǹdə́ ń kɛ̀lɛ́ y lyì bí nɔ̀nɔ̀, bə̀ ń zɔ à wu ni twər nánzhəzhɔ̌; ń yə̀ cìzhìl dùr bʼà ŋwɛ́nɛ́ byə̀nə́-jù w yil yé. 17Ń gə́ tú n yí Orɔm yi ní, ń tó jààsɛ́ gakó wẽ́ n pyà nɛ̀, n bə̀ n mə n nə nɛ. 18À nʼâ lwə̀l Yi bə̀ rə̀ dǔr ń nɔ̀nɔ̀ bùrsí dɛ̃ rɛ́ yù w Cinu Yezu Kristə jàn yilə. Ǹ yě kɔn dɛ̀bɛ́ dwí gakó ń wɛ̀rhɛ́ à yil Efɛɛzɛ nɛ́ mɔ́ náàcɛ̀nɛ́.
اکنون انتخاب شده:
2 Timote 1: lee
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2001, Wycliffe Bible Translators, Inc. All rights reserved.