1 Zhã 4
4
Kɔn dɛ̀bɛ́ è mʼa ce ń lwar Yi Eshirhə y ǹdə́ Kristə zù-bal mɔ́ éshìrhə́ y pár dwã wa
1À dɔwabá nántwə̂rh, lyì bí byɛ̀bɛ́ bə̀ nʼê myìnì bə̀ dwã bɛ́ bə̀ bə̀myɛ́ wɔ́ Yi nyì-zwennə mó sú lũ w wẽ́. Rə̀myɛ́ ce, á bə̀kʼá zwẽ lyì bí byɛ̀bɛ́ gakó bə̀ nʼê wə̀l bə̀ Yi Eshirhə y ŋwɛ́nɛ́ bə̀myɛ́ wẽ́ mó zɔ̀mà nɛ́ yé. Zhìlìnə̀ á yala nɛ́ á pyà bə̀ yé-shò náàcɛ̀nɛ́, á nyǐ ǹdə́ è gə wɔ́ Yi Eshirhə y è ŋwɛ́nɛ́ bə̀ wẽ́ zhə̀nà. 2Nyǐnə á gə́ bʼâ tó né á lwar lò mɔ̀bɔ́ Yi Eshirhə y ŋwɛ́nɛ́ ń wẽ́ mó párá: lò mɔ̀bɔ́ gakó ǹ nə́ ǹ wə̀l bə̀ Yezu Kristə jǐrh numbyíní n bə̀ lũ w wẽ́ zhə̀nà, Yi Eshirhə y ŋwɛ́nɛ́ ǹ wẽ́. 3Sə lò mɔ̀bɔ́ gakó ǹ tá ǹ yâl ń zwẽ yò w òmyɛ́ Yezu Kristə shò-kwã nɛ́ mɔ́ nyí, Yi Eshirhə y tɛ̀nɛ́ ǹ wẽ́ yé. Wɔ́ Kristə zù-bal mɔ́ éshìrhə́ y è ŋwɛ́nɛ́ ǹ wẽ́. Á nyɛ̀ɛ̀ bə̀ nyǐ Kristə zù-bal mɔ́ mà n bà, sə èlâsɛ̃´, ń tú ń ŋwɛ́nɛ́ lũ w wẽ́.
4À byâ, ámyɛ̌ wɔ́ Yi lyì. Á jú bɛlɛ lyì bí byɛ̀bɛ́ bə̀ nʼê myìnì bə̀ dwã bɛ́ bə̀ bə̀myɛ́ wɔ́ Yi nyì-zwennə mó yó, bə̀ Eshirhə y kɛ̀bɛ́ è ŋwɛ́nɛ́ á wẽ́ mó jàn dɛ́ du kɛ̀bɛ́ è ŋwɛ́nɛ́ bə̀myɛ́ wẽ́ mó. 5Bə̀ gə́ wɔ́ lũ w lyì mú ce, bə̀ nʼê zɔ̀m ǹdə lũ w lyì bí ta. Rə̀myɛ́ ce, lũ w lyì bí nʼê cili bə̀ zɔ̀mà nɛ́. 6Sə nə́myɛ̌ wɔ́ Yi lyì. Lò mɔ̀bɔ́ ń yě Yi párá, ń nə́ ń cili nə́ zɔ̀mà nɛ́, sə lò mɔ̀bɔ́ ń yə̀l Yi párá, ń tá ń cili nə́ zɔ̀mà nɛ́ yé. Wɔ́ èta nə́ bʼâ tó né nə́ lwar zhə̀n Eshirhə y ǹdə́ yǔr éshìrhə́ y pár dwã wa.
Yi wɔ́ sónó
7À dɔwabá nántwə̂rh, swénénə nə́ swéné dwã, bə̀ sónó w wɔ́ Yi sõ ò nʼô shí ní. Lò mɔ̀bɔ́ gakó ǹ só ǹ dõ, ǹ wɔ́ Yi byǐ, ń jà ǹ yě Yi párá. 8Lò mɔ̀bɔ́ ǹ bə ǹ dõ só, ǹ yə̀l Yi pár yé, bə̀ Yi wɔ́ sónó. 9Nyǐnə Yi gə́ byili nə́ba rə̀ sónó w né: rə̀ ce rə̀ byì-dùwə̀ y bə̀ lũ w wə, mùnì nə́ tó ńmyɛ̌ dɛnnɛ nə́ nə nyǔ. 10Sə sónó w òmyɛ́ də̀ nə́myɛ̌ nə́ swéné Yi yé. Wɔ́ Yi rə̀ swéné nə́ba, rə ce rə̀ Byǐ mú bà, n pə ń cìn n yə̀ vwĩ̀ kɔn, mùnì Yi pə nə́ba nə́ dwə́ə́ré sǔbri ń vwĩ̀ rí jàn yilə.
11À dɔwabá nántwə̂rh, Yi gə́ só nə́ba èta mɔ́ ce, nə́myɛ mə̂ sə nə́ swéné dwã. 12Lò lò gwẽ̌ yə̀ Yi nɛ ǹdə́ ń yírhə́ yé. Sə nə́ gə só dwã, rə̀ ŋwɛ́nɛ́ ǹdə́ nə́ba, rə̀ sónó w myɛ ŋwɛ́nɛ́ nə́ wẽ́ námpúm.
13Nə́ gə́ tó mə̀gã̌ nə́ yě bə̀ nə́ ŋwɛ́nɛ́ ǹdə́ Yi, sə Yi myɛ ŋwɛ́nɛ́ ǹdə́ nə́ba mɔ́ wɔ́, rə̀ gə́ ce rə̀ Eshirhə y ŋwɛ́nɛ́ ǹdə́ nə́ba mɔ́. 14Nə́ Da Yi ce ń Byǐ mú bə̀ lũ w vwârh yilə. Nə́ nɔ rə̀myɛ́ ǹdə́ nə́ yírhə́, nə́ zɛ̃̀ nə́ rʼé byili ri zhə̀nà. 15Lò mɔ̀bɔ́ ǹ nə́ ǹ wə̀l bə̀ Yezu wɔ́ Yi Byǐ, Yi ŋwɛ́nɛ́ ǹdə́ mɔ́, sə ǹmyɛ ŋwɛ́nɛ́ ǹdə́ Yi. 16Nə́myɛ̌ yě sónó w kɔ̀bɔ́ Yi bʼe swéné nə́ba mɔ́ gə́ wɔ́ nɛ́, sə nə́ rʼé zwẽ ò nyí.
Yi wɔ́ sónó. Lò mɔ̀bɔ́ ǹ ŋwɛ́nɛ́ sónó wẽ́, ǹ ŋwɛ́nɛ́ ǹdə́ Yi, sə Yi ŋwɛ́nɛ́ ǹdə́ ǹmyɛ. 17Sónó gə ŋwɛ́nɛ́ nə́ wẽ́ námpúm, nə́ tʼá la ywẽ dǔr bùrsí dɛ̃ rɛ́ yù w yé, bə̀ nə́ tùntwə̃̀ə̃̀ né lũ w kɔ̀bɔ́ wẽ́ mó nyɛ̌ ǹdə Yezu Kristə nyə̀ná nɛ́ ta. 18Sónó gə ŋwɛ́nɛ́ mə̀gã̌ zhə̀n zhə̀nà, ywẽ tɛ̀nɛ́ gàà yé, bə̀ sónó w páá mɔ́ nʼô vùr ywẽ. Lò mɔ̀bɔ́ ń nə́ ń dùr ywẽ bə sónó w páá mɔ́ zhe yé, bə̀ wɔ́ còrhò-tum rə̀ nʼê zə ywẽ rə̀ twí.
19Nə́myɛ̌ só dwã, bə̀ Yi jɛ̀nɛ̀ rə swéné nə́ba. 20Lò gə wò bə̀ ǹ só Yi, ń jà ǹ bə ǹ da-byǐ só, wɔ́ kɔma, bə̀ ǹ wàr ǹ bʼâ swéné Yi rí ǹ yírhə́ bə nɛ mɔ́, ń jà ǹ bə ǹ da-byǐ mú ǹ yírhə́ nə mɔ́ só yé. 21Kristə cìcì pɔ nə́ba nyí n wɔ̀: “Lò mɔ̀bɔ́ ǹ só Yi, ǹ mə̂ sə́ swéné ǹ da-byǐ myɛ.”
اکنون انتخاب شده:
1 Zhã 4: lee
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2001, Wycliffe Bible Translators, Inc. All rights reserved.