Proverbios 5
5
Titekakuenhña ti chojnichjin nduáhya ixri
1Xje̱eni, tihín ti kjuaxrexinkaon jína.
Chrokjuakꞌe chrókuihín ti nkehe jína tsondáxrja̱n.
2Kixin tso̱noha chji̱ñéhña tsonixja;
la tso̱noha jína ti nkehe tsondáchrua.
3Ti chojnichjin nduáhya ixri
la ti nkehe nixja sin la éxi itsje̱n kotsje̱nta xi̱kaha,
la ko éxi aceite ti nkehe ndáchro tjan,
4kjánchó ti ó tsjixixín la éxi ijnko nkehe imá itsjá
o̱ éxi ijnko espada imá taté.
5La ti nkexro chréhe̱ nti̱e tjan la tuénxín itsꞌen sin,
kixin ti chréhe̱ sin ti sátsji tjan la tsjiji sin ti tóye̱ tsoxravá chojni.
6Jehe tjan la tahya tjan kuentá ti nti̱a tjajon kjuachón,
ti nti̱a ixri tjan la nduáhya, kjánchó noehña tjan.
7Méxra̱, xje̱eni, chrókuihín ti nkehe ndáxrja̱n
la ko chrókui̱toéhya ti nkehe tjákohá.
8Chrokui̱to̱hé ti chojnichjin nduáhya ixri
la ni chrókóchjinehña ti ndo̱e tjan.
9Kixin chróchje̱éhya ókjé nkexro ti kjuasàya chonta
la ko ti nánó chrókjuakꞌe, chrókuakitsjahya ti chojni jie̱he.
10La jehya ókjé chojni chrókuákja ti chichaon kuèntá
la ko chrókókje̱he chrókjonie ti nkehe chrókꞌuaxrjexín ti ixra̱ kjui̱chꞌe.
11Landá ti xi̱kaha chrókóhen, ndá chrꞌéxi̱n tso̱tsja̱nka
kixin ti cuerpo kuèntá la ó tsinkákjeje̱.
12La tsondáchrua: “¿Nkexrín kixin kuiteka̱konhña ti ó kjuenduéhe sin ti janhan?
La, ¿nkekuènté kjuanoá ti nkehe níxja sin?
13La kjui̱ntaxiteyáhya ti nkehe kjuako ti nkexro chrónkaxín
la ko kóxrína̱hña kui̱ha̱n ti nkehe ndáchro sin.
14La ndá ó ikui ti nkehe náxrjónhña
la chjina chrókꞌuitjáña kaín nkehe,
ndá imá tósuàna kixin kaín chojni kónohe.”
15Chroxraxinkaoan jehó ti ichjián
la éxi ti chrókꞌia ìnta̱ tꞌaxrjexín jehó ti pozo chonta ndo̱a.
16Chrokꞌui̱to̱ehya kixin chrókꞌuitjí ti ìnta̱ kuèntá ndója;
chrókjui̱nchexenhña ti ìnta̱ sáchrokjui nti̱a.
17Kixin ti ìnta̱ la jahuá kuèntá
la jehya kixin chrókóxika̱ye̱hé chrókuákja ókjé chojni.
18Itꞌéni Díos chrókjuincheñao ti pozo tꞌaxrjexín ti ìnta̱ kuèntá;
méxra̱ kjuaxróxin chrókjuakꞌeko̱a ti nkexro kóta̱ha ti na̱xa̱ kꞌuéndasoá.
19Jehe tjan la náxrjón éxi ijnko koxi̱jna̱hnte̱,
la chrókócháha kixin tjua̱ha tjan
la nkochríxín chrótjue̱hé kichuara.
20Xje̱eni, ¿nkekuènté chrókꞌuájiko̱a íjnko chojnichjin chóntahya kjuasáye?
La ko, ¿nkekuènté chrókjoá ijnko chojnichjin jehya kuèntá?
21Itꞌéni Díos la ó nohe kaín nkehe tjejóchꞌeni.
Jehe chꞌan mé tjetsjehe chꞌan ti nti̱a ixrini.
22Ti nkexro nduáhya ixri la tsjasótexín ti nkehe nduáhya ichꞌe.
Ti ijie̱ kjuasin sin la xrokjuahya tsꞌatjánta ti jehe sin
kixin éxi tjejóchruéxin sin.
23Itsꞌen sin kixin kjuachahya sin kꞌue̱tue̱hen a̱sén sin,
kixin ti kjualo̱nti̱ kjuíchꞌe sin mé tsꞌitjáñaxín sin.
اکنون انتخاب شده:
Proverbios 5: poeNTplus
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2016, Wycliffe Bible Translators, Inc. All rights reserved.