Proverbios 4
4
Chrokui̱toéhya ti nti̱a jína
1Xje̱eni, chrókuihín ti nkehe tjako ti itꞌá.
Chrokjuakꞌe chrókuihín
la chrókꞌuitjá ti kjuaxrexinkaon jína.
2Kaín nkehe tjàkua janhan la jína;
méxra̱ chrókꞌuitjáñahña ti nkehe a.
3Kja̱xin janhan kꞌuéchájan la ko kꞌuekjakꞌéki̱a̱n tꞌaná
la ko janhan ti nkoko̱axón ixjan kꞌuéchónta ti na̱ná imá kótjue̱he.
4Landá tꞌaná mé kꞌuékjako, kꞌuéndáchro:
“Chrokꞌuitja ti nkehe nixja̱ha
la chrókjui̱nchexiteyá ti nkehe kuétua̱han la jína tsjakꞌe.
5Méxra̱ chrókꞌuitjá chrókónoha jína;
chrókꞌuitjáñahña la ko chrókuíto̱ehya ti nkehe kuétua̱han.
6Chrókóxríhan ti nkehe nixja̱ha;
chrókuíto̱ehya tíha
kixin tíha mé tsjinki̱tsa la ko tsꞌayakohen ti jaha.
7Ti kjuaxrexinkaon jína la a̱ntsí tjetoan;
méxra̱ tjéyá ti kjuaxrexinkaon.
Kjónté chrókjui̱nchekjia kaín nkehe tjete chonta
la tjéyá kixin chrókiénxian jína.
8Chrokjuíkosáyehé ti kjuaxrexinkaon
la tíha tsjinki̱tsa kixin tsondáchro chojni kixin jína jaha,
chrótjue̱hé la tíha tsjajon kjuasàya.
9Éxi chróchónta ijnko nkehe náxrjón chrókjuakꞌenkáya ikjá
éxi ijnko corona náxrjón.”
10Xje̱eni, tihín ti nkehe tétua̱han
la tíha tsjinki̱tsa kixin nchónhña nánó tsjakꞌe.
11Janhan mé kjuákohá ti nti̱a chónta kjuaxrexinkaon jína,
la ko janhan kjuínki̱tsa kꞌuájia ti nti̱a ndoá.
12A̱ndá ti ó tsꞌájia la kohya nkehe tsꞌinkákohe̱n,
la kjónté xritinká la kohya nkehe tsóténki̱xian.
13Nchexiteyá ti nkehe kuétua̱han la ti̱toéhya.
Chrokꞌuitjáñahña tíha kixin tsotjahá kjuachaxin náxrjón tsjakꞌe.
14La sáchrokjuihya nti̱e ti sin tjenka̱yáxinhña jína
la chrókuankíhya ti nkehe jínahña tjenka̱yáxin sin.
15Chrokui̱to̱hé nti̱e ti sin nduáhya ixri;
chrókꞌuaxrjekjanxian ntiha,
sáchrokjuia nti̱a ndoí.
16Ti sin tjenka̱yáxinhña jína la jehó tjinkaon sin sichꞌe sin ti nkehe jínahña
la xitjahya tꞌajua sin ti na̱xa̱ kjuachahya sin kjuachròe sin ijnko chojni.
17Ti nkehe jínahña la ko ti kjuatjoté
la mé éxi ijnko nkehe náxrjón
chrókjonie sin la ko chrókꞌui sin.
18A̱ndá nti̱e ti sin jína la tꞌinkaséña éxi ti na̱ndá tji̱to̱n ña̱o;
la tsinkákójié ti tꞌinkaséña hasta tsꞌinkaséña nkuíxín.
19A̱ndá nti̱e ti sin tjenka̱yáxin ti nkehe jínahña la sítie
la tꞌikonhña sin nkehe tótenki̱xin sin.
20Xje̱eni, tihín ti nkehe ndáxrja̱n;
tjakꞌe tihín jína.
21Méxra̱, chrókui̱toéhya ti nkehe ndáxrja̱n;
nkochríxín chróxraxinkaoan.
22Kixin tíha mé tsjajon kjuachón tsꞌáyéhe̱ ti nkexro tsꞌitja.
Tíha mé éxi ijnko xro̱a̱n tsito̱exín jína kuenté ti cuerpo kuèntá.
23Chrokóxakohan kixin a̱ntsí jína chrókjuénka̱yáxian
kixin tíha tjejóchónxin chojni.
24Chróndáchrohya ti nkehe náxrjónhña
la ko chrókui̱to̱hé ti kjuachꞌia.
25Chrotsjehé jína ti ixria,
la ko chrótsjehé jína ti nti̱a sátsjia.
26 #
He. 12:13. *Tsjehé jína nketí tsaké ti to̱tá,
ndá nkochríxín nti̱a jína tsꞌájia.
27Sáchrokjuihya ti nti̱a chjina la o̱ ti nti̱a ikjon;
chrókꞌuájihya ti nti̱a jínahña.
اکنون انتخاب شده:
Proverbios 4: poeNTplus
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2016, Wycliffe Bible Translators, Inc. All rights reserved.