Proverbios 16
16
1Ti chojni la tjenka̱yáxin ti nkehe sichꞌe,
kjánchó jehó Díos tsondáchro ti nkehe chaxín tso̱hen.
2Kaín chojni la ndáchro kixin ndoá ti nkehe ichꞌe sin,
kjánchó jehó Itꞌéni Díos mé nchekito̱exín ti nkehe tjenka̱yáxin sin.
3Chrokui̱to̱ehé Itꞌéni Díos ti ixra̱ tjénka̱yáxian sichꞌe,
landá xi̱kaha chaxín tsoxiteyá tíha.
4Kaín ti nkehe kjuíchꞌéna Itꞌéni Díos la chónta ijnko ixra̱;
la kja̱xin kjuíchꞌéna chꞌan ti nkexro jínahña kixin tsjasóte ti ña̱o tsjixixín.
5Itꞌéni Díos la tóxrìe̱nhña ti chojni nchejié a̱sén,
la ti chojni xi̱kaha ichꞌe la tsjasóte sin.
6Ti tjue̱héni chojni la ko jína nchexiteyáni, la tíha mé tsꞌóxika ti ijie̱ kjuasini.
Ti tsjikosáyeheni Itꞌéni Díos la tsíto̱heni kaín ti nkehe jínahña tjenka̱yáxini.
7Ti tóxríhi̱n Itꞌéni Díos ti nkehe ichꞌeni,
la kjónté ti nkexro nínkaon, la kjuaxróxin tsꞌejókoni sin.
8Ícha jína nóa la ko jína itjen,
ke ti chróchonta itsjé nkehe kixin kjui̱chꞌiyehé chojni.
9Ti chojni la tjenka̱yáxin nke nti̱a tsákja,
kjánchó jehó Itꞌéni Díos tsondáchro nketí sátsji sin.
10Ti rey la nixja ti nkehe tjinkaon Díos,
la ndoá nchekito̱exín chꞌan iji̱é chojni.
11Ti báscula tjìinxín ndoá mé tjinkaon Itꞌéni Díos;
kixin kaín ti nkehe ndoá xrachro̱ayá tóxríhi̱n chꞌan.
12Ijnko rey la tóxrìe̱nhña ti chojni ichꞌe ti nkehe nduáhya,
kixin ti itjen chꞌan tꞌe̱to̱an chꞌan la ticháxi̱n jína tsꞌejó chojni.
13Ti rey la tjue̱he ti nkexro nixja nkehe ndoá,
la tjinkaon chꞌan ti nkexro nixja nkehe chaxín.
14Ti kjuanínkaon kuènté ijnko rey la tsꞌenxín chojni;
kjánchó ti chojni chónta kjuaxrexinkaon la tsjacha sinchentá ti kjuanínkaon kuènté chꞌan.
15Ti tso̱chéhe̱ ti rey la kjuaxróxin tsꞌejó chojni;
la ti tjinki̱tsa chꞌan chojni mé éxi ichrin xrakoa xi̱kaha.
16A̱ntsí jína chróchonta ti kjuaxrexinkaon jína ke ti oro.
A̱ntsí náxrjón chrókiénxian jína ke chróchonta ti plata.
17Ti chojni ndoá tjenka̱yáxin la títo̱he sin ti nti̱a jínahña;
a̱ndá ti nkexro xri ti nti̱a ndoí la tjue̱he a̱sén.
18Ti chojni nchejié a̱sén la tsꞌitjáña sin.
Ti sin nchehnke la imá tso̱suéhe̱ sin.
19Ícha jína chrókjuinchentsíntsíni a̱séni la chrókꞌuitoni ti sin nóa;
ke ti chróxrito̱heni ti nkehe tjete tsákja ti sin rico a.
20Ti nkexro tienxín ti itan jína la kjuaxróxin tsꞌejó;
la imá náxrjón chéhe̱ tsꞌejó ti nkexro tinkáchónki Itꞌéni Díos.
21Ti nkexro chónta kjuaxrexinkaon jína la tsondáchro chojni kixin tíha mé ijnko nkexro imá nohe;
la ti nkexro náxrjón nixja la a̱ntsí tso̱nohe jína.
22Ti chojni tjenka̱yáxin jína la mé éxi ti ìnta̱ tjajon kjuachón;
A̱ndá ti chojni lo̱nti̱ la xitjahya tsoxrenduéhe sin.
23Ti chónta a̱sén chojni ti kjuaxrexinkaon jína la chji̱ñéhña nixja sin;
landá ti nkehe jína nixja sin la tsitekaon chojni.
24Ti itan jína la mé éxi itsje̱n kotsje̱nta náxrjón ixé,
la tíha nchechèxín a̱sén chojni la ko éxi ijnko xro̱a̱n tsito̱exín chojni jína.
25 #
Pr. 14:12. *Siín nti̱a la tjenka̱yáxin chojni kixin chaxín ndoá,
kjánchó ti ó tsjixixín la tsꞌenxín chojni tíha.
26Ti nkexro chóntahya nkehe sinie la a̱ntsí ichꞌe ixra̱
kixin tsochónta nkehe.
27Ti chojni jínahña la jehó tsjeyá kjuanínkaon;
la ti nkehe nixja sin la éxi xrohi tꞌitjáñaxín chojni.
28Ti nkexro jínahña la itje kjuanínkaon;
la ti chojni xrichꞌia la nchekjajo̱n ti chojni jína chóxin.
29Ti chojni jínahña la chꞌiyehe ti nkexro tꞌiton,
la xi̱kaha tjachròe sin sátsjiko sin ti nti̱a jínahña.
30Ti nkexro chrꞌáto̱hen ikon kícho la tjenka̱yáxin ti nkehe jínahña;
la ko ti nkexro nchekꞌinki tjuarꞌuá la ó tsíkjasin sin ijie̱.
31Ti chojni ó tsíkótjóá ikja la mé éxi ijnko corona náxrjón chónta sin
kixin kóchóxin sin la ko kꞌuáji sin ti nti̱a jína.
32Ícha jína ti chojni tjokahya tónínkaon ke ti chojni imá tse̱he̱.
Ícha jína ijnko chojni jehó chrókꞌue̱tue̱hen a̱sén ke ti chrókꞌue̱tue̱hen sin ijnko chjasin.
33Ti chojni la tónohe sin nkehe tso̱hen,
kjánchó jehó Itꞌéni Díos mé tsondáchro ti nkehe chaxín tso̱hen.
اکنون انتخاب شده:
Proverbios 16: poeNTplus
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2016, Wycliffe Bible Translators, Inc. All rights reserved.