Proverbios 15
15
1Ti tsjate̱hé nkojína la tso̱ntá ti kjuanínkaon;
a̱ndá ti jie̱he tsjate̱hé la a̱ntsí tsꞌánkí ti kjuanínkaon.
2Ti nkehe nixja ti nkexro nohe la tjajon kjuaxrexinkaon jína;
a̱ndá ti nkehe nixja ti sin lo̱nti̱ la jehó nduáhya.
3Itꞌéni Díos la nkuíxín tjetsjehe chꞌan;
tꞌikon chꞌan nkehe ichꞌe ti sin jínahña la ko ti sin jína.
4Ti nixja chojni itan tjajon kjuaxróxin
mé éxi ti inta yoa tjajon kjuachón;
a̱ndá ti nkexro jie̱he nixja la nchekꞌává chojni.
5Ti chojni lo̱nti̱ la tjinkakonhña ti nkehe tjako itꞌé sin;
a̱ndá ti nkexro tjinkaon tíha la tja̱ko̱xi̱n kixin tjenka̱yáxin jína.
6Ndo̱e ti nkexro jína la siín nchónhña nkehe tjete;
a̱ndá ti nkehe tjacha ti chojni jínahña la jehó kjuanínkaon.
7Ti sin nohe mé xrichronka sin kjuaxrexinkaon jína;
a̱ndá ti sin lo̱nti̱ la ni tjenka̱yáxinhña sin tsochronka sin tíha.
8Itꞌéni Díos mé tóxrìe̱nhña ti iko tꞌóñá ti sin jínahña la chjéhe sin chꞌan;
a̱ndá tóxríhi̱n chꞌan ti ó ti sin ndoá tjejó nixje̱he̱ sin chꞌan.
9Itꞌéni Díos la tóxrìe̱nhña nti̱e ti sin jínahña;
a̱ndá tjue̱he chꞌan ti sin chréhe̱ ti nkehe jína.
10Ti nkexro tsíto̱he ti nti̱a jína la a̱ntsí tsjasóte kixin tsoxrenduéhe jína;
a̱ndá ti nkexro tjinkakonhña tsoxrenduéhe la itsꞌen.
11Ti tjetsjehe Itꞌéni Díos ti tòye̱ siín ti sin tsíkꞌen la ko ti itsꞌen chojni,
la nkexrín chrókónoehña chꞌan nkehe tjenka̱yáxin a̱sén chojni.
12Ti chojni titekakonhña tóxrìe̱nhña kixin ijnko nkexro tsjenduéhe ti jehe sin,
la ko tóxrìe̱nhña sin tsꞌiton sin ti sin chónta kjuaxrexinkaon jína.
13Ti ijnko a̱sén chojni chéhe̱ la tꞌikoni ti nkayakon sin;
a̱ndá ti nóaxi̱n tjejó sin la tꞌikoni kixin tꞌává sin.
14Ti nkexro tienxín la xritjeyá kixin a̱ntsí tso̱nohe;
a̱ndá ti chojni lo̱nti̱ la jehó ti nkehe kjualo̱nti̱ nixja sin.
15Kaín ña̱o náxrjónhña tjejó a̱sén ti sin tꞌává;
a̱ndá ti sin chéhe̱ a̱sén la kaín ña̱o la náxrjón tjejó sin.
16Ícha jína chróchóntahyani itsjé nkehe la chrókjuikosáyeheni Itꞌéni Díos,
ke chróchóntani itsjé nkehe tjete landá kjuaxróxinhña chrókꞌuejóni.
17Ícha jína chrókjonieni nio ko xíjnta ó ti siín kjuaxróxin;
ke chrókjonieni into ndá kohya kjuaxróxin.
18Ti chojni tjoka tónínkaon la xra̱hya tjasin kjuanínkaon;
a̱ndá ti nkexro tjokahya tónínkaon la nkochríxín kjuaxróxin tjejó.
19Ti nti̱e ti chojni séhe la éxi ichꞌi̱ siín;
a̱ndá nti̱e ti chojni jína la náxrjón.
20Ti ixjan nohe jína la nchechéhe̱ ti itꞌé;
a̱ndá ti ixjan lo̱nti̱ mé tjikosayéhya ti ìñé.
21Ti nkexro lo̱nti̱ la tóxríhi̱n ti nkehe kjualo̱nti̱ tjenka̱yáxin;
a̱ndá ti nkexro chónta kjuaxrexinkaon jína la jehó tjenduéhe a̱sén.
22Ti kohya nkexro tsjajon kjuaxrexinkaon jína la xitjahya jína tso̱hen ixra̱;
a̱ndá ti siín itsjé chojni tjajon kjuaxrexinkaon jína la jína tso̱hen ti ixra̱.
23Náxrjón chéhe̱ ti nkexro jína tsjate̱he ijnko nkehe;
la a̱ntsí náxrjón ti chrókjuate̱he sin jína ti ó chaxín tichánxi̱n.
24Ti sin nohe la ijnko nti̱a tsjajon kjuachón sátji̱ sin,
la tsíto̱he sin ti nti̱a chrókꞌuitjáñaxín sin.
25Itꞌéni Díos la sinchekꞌitjáña chꞌan ndo̱e ti sin nchehnke;
a̱ndá tsꞌayakohen chꞌan no̱nte̱e ti sin ikꞌán.
26Itꞌéni Díos la tóxrìe̱nhña ti nkehe tjenka̱yáxin ti sin jínahña;
a̱ndá tóxríhi̱n chꞌan ti nkehe jína nixja chojni.
27Ti nkexro tjinkaon tsjacha itsjé chichaon la ti sin ndo̱e ti nkexro a la kjuaxróxinhña tsꞌejó sin;
a̱ndá ti nkexro tjinkakonhña tsjacha ti chichaon nduáhya tji̱xi̱n la nkochríxín kjuaxróxin tsꞌejó sin.
28A̱sén ti chojni ndoá tjejó la tjenka̱yáxin ti nkehe jína tsonixja;
a̱ndá irꞌua ti chojni jínahña la chji̱ñé nixja sin ti nkehe jínahña.
29Itꞌéni Díos la chrókóchjinehña chꞌan ti sin tjasin ijie̱;
a̱ndá tjetihin chꞌan ti nkehe tjanchia ti sin ndoá tjejó.
30Ti ijnko nkexro chéhe̱ la sinchechéhe̱ a̱sén íso chojni;
la ko ti tsihin chojni ijnko nkehe jína la a̱ntsí náxrjón tsꞌejó sin.
31Ti nkexro tihin ti kjuaxrexinkaon jína tjajon kjuachón
la tsꞌejóko sin ti nkexro a̱ntsí nohe.
32Ti nkexro tjinkakonhña tsoxrenduéhe la mé sincheníhi a̱sén;
a̱ndá ti nkexro tsihin ti kjuaxrexinkaon jína la tienxín jína.
33Ti nkexro tsjikosáyehe Itꞌéni Díos la Itꞌéni Díos tsjajon ti kjuaxrexinkaon jína,
la ko ti nkexro tjinkaon tsꞌáyéhe̱ ti kjuasàya la tichánxi̱n sinchejiéhya a̱sén sin.
اکنون انتخاب شده:
Proverbios 15: poeNTplus
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2016, Wycliffe Bible Translators, Inc. All rights reserved.