Salmos 41
41
Ndakuatu in tee kuꞌu nuu ia Dios
Yaa ni tee David
1Na taꞌu na ndetu ñayiu ndiꞌni ja jaꞌa ñayiu kundaꞌu,
chi kiuu koo tnundoꞌo siki mai, te skaku niꞌnu ña Jitoꞌo.
2Chi koto kuni ña maa Jitoꞌo, te kuñaꞌa ya ja kotekui.
Te koo vii koo vaꞌi nuu ñuꞌu ni jiñaꞌa ia Dios ja koi,
te ma kuandetu ya ja kanakaui nuu ndaꞌa ñayiu ka kaꞌan uꞌu ña jin.
3Te kuñaꞌa maa Jitoꞌo jandakui nuu katui nuu jitoi ja kuꞌi,
te ndasaꞌa ña ya jin nuu katui nuu jitoi, te nduvaꞌi.
4Te jiñaꞌa san: “Kundaꞌu ini ña ni jin san, vi Jitoꞌo, te ndasaꞌa ña ni,
chi nuu maa ni, ni saꞌa san yika kuechi”.
5Chi ñayiu ka kaꞌan uꞌu ña jin san ka kaꞌan kueꞌe siki san, te ka kachi:
“¿Na kiuu kuu ja kuu tee yaꞌa, te vi naa inio jin de?”, ka kachi.
6Te nuu ja vajikuei ja mavikikoto ñai, te ninoꞌo ni tnoꞌo tnoꞌo ka kaꞌin,
te ka xtutui tnoꞌo tikaꞌndu, te kuaꞌankuei ka ndakani nuu ñayiu.
7Te ka kututu ñayiu yun ja ka skexiko ña jin san, te ka kaꞌan kueꞌi siki san,
te ka ndakani ini ja kuechi maa san kuu ja tnaꞌa san tnundoꞌo, te ka kachi:
8“Kueꞌe ja kuꞌu de, chi tinuu uꞌu kuu,
te ni jinkau de nuu jito de, te ma kuu ka ja ndakoo de”.
9Te vi ndee tee ka ndeka tnaꞌa guaguaꞌa jin san ja ni okukanu ini san de,
vi ni ka ojaa in ni san jin de xtaa, ni ndakoo de siki san.
10Su kundaꞌu ini ña maa ni jin san, vi Jitoꞌo,
te ndoneꞌe ña ni jin san, nagua ja na ndakuñaꞌa san yuꞌu taꞌui.
11Te jin yaꞌa, te kuni san ja junkuaan ini ña ni jin san,
ja ma vi kokuu teyii ñayiu ka kaꞌan uꞌu ña jin san,
ja ja ni ka kundei nuu san.
12Su ja maa san, chi yindaꞌa guaꞌa ña ni, te tu na jakueꞌe saꞌa san,
te saꞌa ña ni ja siun ni koo san nuu oo ndiaꞌa maa ni.
13Kaꞌnu kuu ia Dios ñayiu Israel, ja oo ya nikuii nikani.
Saa na kokuu vi saa na kokuu.
اکنون انتخاب شده:
Salmos 41: xtnNTplus
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2016, Wycliffe Bible Translators, Inc. All rights reserved.