1 John 3
3
Nil God.ang Waaꞌan Ngampang Puk Nungantamana
1Inan ngeeyāna! Nil piip God.an kan-kanam nil kaangk wunan ngampara, puth nil kaangk waaꞌow ngampanga puk nungantama, an puth ngamp kan-kanama puk nungantama ngul iiy-iiyanampa. Puth pam wanch yotangan-a, keꞌam thiichin nunang, God.ana, keꞌ-paal thanana kan-kanama keꞌam thiichantan ngampanganiya puk nungantam inangan ngampa God.antama. 2Eeꞌ kan-kanama, ngurp ngatharam-ang, ngamp inangan kan-ngul puk nungantam God.antama, in puth engkanang keꞌam yippak wunan ngampara, ngamp want-wanttak ngul-ngulan iiyāmpa. Ngamp inan ep meeꞌmiy nil Christ wampow ngulan-a, ngamp inangan keꞌ nil anman ngul iiy-iiyāmpa, ngeenam putha, ngampan puth ngul thathāmp nilan want-wanttakan iiy-iiyowa. 3Than weeꞌ-weeꞌanangan wik inangan kan-kanam ngaantam-ngeeyayn-a, than ngangk min-minangam anman iiy-iiyantana, keꞌ Jesus Christ yimanangan iiy-iiyantana.
4Than weeꞌ-weeꞌanangan way yump-yumpiythanwey-a, thanan-a, thaampantan nunang, God.ana; thaniy puth-a, wik God.antaman-a, pip-pipantana. 5Ngamp puth meeꞌmiy nil Jesus.an aak iikanakan uk, nil yipam way ngamparam anpalan-a, pachathow ngampanga. Niliy puth-a, way thonam keꞌ anman yumpanam yaꞌa. 6Than weeꞌ-weeꞌanangana Jesus Christ.an kan-kanaman ngangkangan piꞌ-piꞌayn nunang-a, an than way keꞌ yump-yumpantan yaꞌa, puth than pam wanch al-alangan wayan yump-yumpantan-a, thanan keꞌam ngaantam-ngeeyantan nunanga, keꞌam thiichantan nunang, keꞌ-ngoongkam anman iiy-iiyantana.
7Ayyang, ngurp ngatharam niiyalang, than wiy al-alangana keꞌ meeꞌ-wichayn niiyang wayakana! Than weeꞌ-weeꞌanangan min anman yump-yumpayn-a, yaa, an puth than min anman iiy-iiyantana, ngangk pach anman wun-wunow thanta, keꞌ Jesus.ana ngangk pach iiy-iiyana, than yimanangan iiy-iiyayna. 8Nil puth weeꞌangan wayan yump-yumpiy-a, an nil oony way piꞌan ngangkangana piꞌ-piꞌan nunang, nil puth oony piꞌan Satan.an-a, nathpalman keenkanam anpalman way anman yump-yumpana. Nil puth nhengk God.antaman aak iikanakan uk, yipam wayathow work nungantaman oony way piꞌan alantamana.
9Nil weeꞌan puk God.antaman iiy-iiyiw-a, an nil wayan-a, keꞌ-ngul yump-yumpowa, nil puth God.angana Ngangk nungantaman kan theeꞌ nungant aꞌ Ngeen-Wiy Min nungantaman pam alantangan kan ngooncha. Nil wayan keꞌ yump-yumpiy, an yaꞌa, an puth piip God.ana piip nungantamana, aꞌ nil maꞌ thayanang piꞌ-piꞌan nunanga way keꞌ yumpowa. 10Puk God.antamana an than-thana; puk oony way piꞌan Satan alantamana an than-thana. Than puth weeꞌ-weeꞌanangana kaangk way anman yump-yumpayn-a, puth Christians wiyantan kaangk keꞌ wunayn-a, an puth kan meenathan ngampara than puk God.antaman keꞌ iiyantan, an yaꞌa.
Niiy Kaangk Wunān Niiyantakama
11Niiy puth wik keenkanaman nathpalman ngeeyan, wik inaniya; ngamp ngamparakaman-a, kaangk wunāmpa, ngangk chaapar ngampar karpam ngula! 12Ngamp keꞌ Cain yimanangan keꞌ weenimpa, nilana oony way piꞌan ngangkangan piꞌ-piꞌ nunanga puth nilana pont-kunchan mulathan. An puth nil ngeenam mulath nunang e? Puth nil nathpalman way yump-yump, nil pont-kunch Abel.an ep minam anman iiy-iiya, anpalman mulath nunanga.
13Ngurp ngatharam-ang, than pam wanch way al-alangan nath ngangk way-wayangamana kal-kaliythan niiyang-a, niiy ngangk keꞌ ikāna. 14Puth ngampaniy-a, Christians wiyantan ngangk minangam iiy-iiyanamp thanta, ngamp nanpalan meeꞌmiy ngampan woyan anman wak-wakāmpa ngangk aak umpuyaman wunanakan God.antangana; woyan thon anan-a, mul wunanakan-a, anan too ngul wantampa. Nil weeꞌ-nathan Christians wiyantan kaangk keꞌ wuniw-a, an nil God.antangana keꞌ wuniy, yaꞌa, aak wayakan iiyow angman wunowa. 15Than weeꞌ-weeꞌanangana Christians wiy anangana ngangk-wayangaman kalayn thanang-a, an than pam way-wayaman iiy-iiyantana, keꞌ pam yot-piikan yimanangana, an puth niiy kan thiichana pam nilan monkanan piikow-a, an nil keꞌ wunow God.antangana, yaꞌa!
16Nil Jesus Christ.angana theetath nungamang uthamow ngamparana, inan puth meenath ngampar nil kaangk paththam wunan ngampara; ngampiya yimanangan kaangk wunāmp ngamparakama, nathweya theetathāmp ngamparakam mulakana. 17Nil pam maꞌmangkiy nath iiy-iiyiywey-a, wukal yot piꞌ-piꞌiywey-a, aꞌ Christian thonan thathiy nunang, may keꞌanangan wun-wunana. Nil pam maꞌmangkiy alangana keꞌ maꞌ-aathiy nunanganwey-a, an nil nungamangana keꞌ waaꞌow keꞌ nil kaangk God.antana, yaꞌa! 18Ngurp ngatharam-ang, ngampiya thaaꞌam thonakam keꞌ thawāmp ngamparakama, “Ngay kaangk nungkara,” ngamp kan-kanam ngangk pal pekkuw anpalmana kaangk wunāmp ngamparakama, minam iiy-iiyāmp ngamparakama.
Ngamp Ngangk Thayanam Iiyāmp God.antana
19Ngamp nath kan-kanam paththam kaangk wunimp ngamparakaman-a, an ngamp kan-kanama meeꞌmiy ngul wunimp ngamparakama ngamp puk God.antaman, aꞌ ngamp ngangk thayanam ngul iiyāmp God.antana, winynyang keꞌ-ngul moꞌāmp nungantam. 20Ngamp nath ngangk akangamwey iiyimpa puth ngaantam-ngeeyimp wayan yump-yumpampa. Puth ngampaniy-a, ngaantam-ngeeyimpa nil God.an piꞌan paththama, keꞌ ngamp yimanangan yaꞌa, nila yota meeꞌmiya ngampan yumpanamp-a, way thak min thakan-a, an engkanang wunan meeꞌ God.antangana. 21Ngurp ngatharam niiyalang, ngamp nath ngangk minangam iiy-iiyimp-a, puth way keꞌim yumpimp-a, yaa, ngamp ngangk thayanam iiyāmp God.antan, winynyang keꞌ moꞌāmp nungantama. 22Ngamp puth wik nunangan ngeeyanampa, puth min yumpanampa meeꞌ nungantangan -- keꞌ-paal ngamp puth ngeenak nathan thawimp nungantan-a, ngampana ngul uwāmp nungantama. 23Nil wik thayan inangan want ngampara; ngamp nhengk God.antaman ngaantam-ngeey-ngeeyāmp nunanga Jesus Christ.ana! Aꞌ ngamp ngamparakamaniy-a, kaangk wunāmpa! Nil puth Christ.an wik thayan anangan thaw ngampara. 24Ngamp weeꞌ-weeꞌanangan wik nunangan ngeeyāmp-a, puth ana ep ngamp God.antang wunāmp, nil God.an puth-a, ngangk ngamparang angman wun-wunana. Ngamp kan-kanama meeꞌmiy ngul nil God.an angman wun-wunan ngangk ngamparanga, puth Ngeen-Wiy Min nungantaman kuch ngampara, ngangk ngamparangan wun-wunowa.
اکنون انتخاب شده:
1 John 3: wimNT
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 1984, Wycliffe Bible Translators, Inc. All rights reserved.