Daa 29
29
Yakɔbu kaa Labã bɛ
1Yakɔbu ɛ̀a dà zɛ́u, à gɛ̀ gukpɛdeɔ busuu. 2Kɛ́ à kà we, à lɔ̀ɔ è sɛ̃u, sã kpàsa lɛɛ aaɔ̃ kalɛa a saɛ, asa lɔ̀ɔpi í ɔ̃ wì kpamá. Gbɛ̀ gbɛ̃̀nɛ ta lɔ̀ɔpilɛ. 3Tó kpàsa pɔɔ kã̀aa we pii, ɔ̃ wì gbɛpi go lɔ̀ɔpilɛ wà ikpamá, ɔ̃ wì ɛa gbɛpi taɛ a gbɛu. 4Ɔ̃ Yakɔbu sãdãnaɔ là à mɛ̀: Gbɛ̃́ɔ, a bɔ má ni? Aa wèwà aa mɛ̀: Wa bɔ Halanaɛ. 5Ɔ̃ à ń lá à mɛ̀: Á Nakɔɔ tɔũna Labã dɔ̃a? Aa wèwà aa mɛ̀: Wá aà dɔ̃. 6Ɔ̃ à ń lá à mɛ̀: A aafiaó? Aa mɛ̀: A aafia. Aà nɛ Lasɛli gwa, àlɛ mɔ ń sãɔ kee. 7Ɔ̃ Yakɔbu mɛ̀: Fãanɛ lɛ́ kɛ, sãɔ tagɔɔ i ka yãao. À ikpamá, í gɛ́ ń dãdãi. 8Ɔ̃ aa mɛ̀: Wá fɔ̃o. Mɛ́ i kɛ sã kpàsaɔ kã̀aa pii baasio, wìli gbɛ go lɔ̀ɔlɛ wà ikpa pɔɔwao.
9Lá àlɛ yã'onɛ́ màa, Lasɛli mɔ̀ ń a mae sãɔ, asa sãdãnan aà ũ. 10Kɛ́ Yakɔbu a desɛ̃ Labã nɛnɔɛ Lasɛli è ń aà mae sãɔ, à sɔ̃̀ lɔ̀ɔi à gbɛ gò lɔ̀ɔlɛ, ɔ̃ à ikpà a desɛ̃ sãɔwa. 11Ɔ̃ à lɛpɛ̀ Lasɛliwa, à pɔna ɔɔlɔ̀. 12Ɔ̃ a òɛ̀ aà mae daɛn a ũ, Lɛbɛka nɛn aà ũ. Ɔ̃ Lasɛli baalɛ̀ gɛ̀ a ò a maeɛ. 13Kɛ́ Labã a dãe nɛ Yakɔbu baomà, à baalɛ̀ gɛ̀ daiaalɛ. Kɛ́ à kà, ɔ̃ à kùsiwà, à lɛpɛ̀wà, à tàaanɔ a bɛ. Ɔ̃ Yakɔbu yã pɔ kɛ̀ɔ òɛ̀ pii. 14Ɔ̃ Labã òɛ̀: Ma aun n ũ sĩana.
Yakɔbu Lea ń Lasɛlio sɛa
Yakɔbu kɛ̀ Labã bɛ mɔ do, 15ɔ̃ Labã òɛ̀: Kɛ́ ń dɛ ma daɛ ũ yãi ɔ̃ ńyɔ̃ zĩkɛmɛɛ pãa? Lá má fĩabonɛ omɛɛ. 16Labã sɔ̃ a nɛnɔɛɔ vĩ gbɛ̃ɔn pla. Yɔ̃ tɔ́n Lea, Bãa sɔ̃ Lasɛli. 17Lea wɛ́ gbãao, Lasɛli sɔ̃ nɔanaɛ, mɛ́ aà kakaa maa. 18Yakɔbu ye Lasɛlizi, ɔ̃ a ò Labãɛ: Má zĩkɛnɛ wɛ̃̀ sopla n nɛ bãade Lasɛli yãi. 19Labã mɛ̀: Ma aà kpaama sì dɛ mà kpa gbɛ̃pãlewala. Ǹyɔ̃ ku ma bɛ.
20Ɔ̃ Yakɔbu zĩkɛ̀ɛ̀ wɛ̃̀ sopla Lasɛli yãi, kási à kɛ̀ɛ̀ lan gɔɔplawaɛ, kɛ́ a yeaazi yãi. 21Ɔ̃ a ò Labãɛ: Lá ma zĩgɔɔ pà, ma nɔ kpaa mà sɛ́. 22Ɔ̃ Labã wekĩideɔ kã̀aa pii, à nɔsɛblɛ kɛ̀nɛ́. 23Kɛ́ oosi kɛ̀, ɔ̃ à a nɛ Lea sɛ̀ a kpàwà, ɔ̃ Yakɔbu wùlɛaanɔ. 24Labã a zɔnɔɛ Zilipa kpà Leawa aàɔ zĩkɛɛ̀. 25Kɛ́ gu dɔ̀, Yakɔbu è Leaɛ, ɔ̃ a ò Labãɛ: Bɔ́ yã ń kɛ̀mɛɛ màai? Lasɛli yãi ɔ̃ ma zĩkɛ̀inɛo lò? Bɔyãi n ma kpanguakɛ̀i? 26Labã òɛ̀: Wá la wìli Bãa kpa gɔ̃wa Yɔ̃ ãao. 27Ãsɔ̃a do kɛ ń gbɛ̃́ beeo gĩ́a, mí aà gbɛ̃do kpama, ní zĩkɛmɛɛ wɛ̃̀ sopla lɔ. 28Yakɔbu wèi, à ãsɔ̃a dopi kɛ̀ ń Leao, ɔ̃ Labã a nɛ Lasɛli kpàwà nɔ ũ lɔ. 29Labã a zɔnɔɛ Bila kpà Lasɛliwa aàɔ zĩkɛɛ̀. 30Yakɔbu wùlɛ ń Lasɛlio sɔ̃, mɛ́ a yeaazi dɛ Leala. Ɔ̃ à ɛ̀a zĩkɛ̀ Labãɛ e wɛ̃̀ sopla lɔ.
Yakɔbu nɛɔ
31Dii è Yakɔbu ye Leazio, ɔ̃ à aà kɛ̀ nɛade ũ, Lasɛli sɔ̃ fĩi ũ. 32Lea nɔsì, à nɛ'ì gɔ̃ɛ ũ, ɔ̃ à tɔkpàɛ̀ Lubɛni,#29.32 Bee mɛ̀ nɛgɔ̃ɛ gwa asa à mɛ̀: Dii ma taasikɛa gwàɛ. Ma zã́ aɔ yemazi sa. 33Kɛ́ à nɔsì lɔ, à nɛ'ì gɔ̃ɛ ũ, ɔ̃ à mɛ̀: Dii mà ma zã́ yemazio, ɔ̃ à ɛ̀a nɛɛ bee kpàa lɔ. Ɔ̃ à tɔkpàɛ̀ Simɛɔ.#29.33 Bee mɛ̀ a mà 34Kɛ́ à ɛ̀a nɔsì lɔ, à nɛ'ì gɔ̃ɛ ũ à mɛ̀: Kɛ́ bee sa ma zã́ a ma dilɛkĩi eo, asa ma nɛgɔ̃ɛ ìaanɔ aaɔ̃. Ɔ̃ à tɔkpàɛ̀ Levi.#29.34 Bee mɛ̀ nakɔ̃wa 35À ɛ̀a nɔsì lɔ à nɛ'ì gɔ̃ɛ ũ à mɛ̀: Kɛ́ bee sa ma Dii saaukɛ̀, ɔ̃ à tɔkpàɛ̀ Yuda.#29.35 Bee mɛ̀ sáau Ɔ̃ aà nɛ'i zɛ̀.
اکنون انتخاب شده:
Daa 29: Boo2024
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Boko Bible © SIM International, 2024.